Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАНЬ КОРЯС ЕВАНГЕЛИЯ

Глава 12

Ванфтода пря шамафксонь каннемада

1Ся пингоня пуромсь лама тёжянь ломань, мянь люпштасть фкя-фкянь. Иисус пшкядсь васенда тонафниензонды: «Ванфтода пря фарисейхнень шапафтомадост, лиякс мярьгомс, шамафксонь каннемада.2Сембе кяшфсь лиси лангти, и сембе салаваннесь арай содафокс.3Сяс, мезе тинь азоде шобдаса, сянь кульсазь валдса; мезе корхтасть пилес кудботмоса, сянь ювадьсазь кудбряста.

Шкайда пельхть, а аф ломаньда

(Матф. 10:28-31)

4Корхтан тейнть, Эсь ялганенди: тяда пеле ронгонь машфтыда, конатненди тяда меле лия мезевок аф тиеви.5Мон азса тейнть кида пелемс: пеледа Сянь эзда, кинь ули виец ронгонтень шавомда меле ёрдамс тинь аду. Видеста корхтан тейнть, Сянь эзда пеледа.6Кали вете кирьхксне мишендевихть аф кафта трёшникта? И эздост фкяське аф юкстаф Шкайть сельмоса.7А тинь прясонт сембе шяярьнятневок лувфт. Сяс тяда пеле: тинь сяда питнихтяда сембе кирьхкснень коряс».

Кемамацень панжеманц-азоманц колга

(Матф. 10:32,33, 12:32, 10:19,20)

8«Корхтан тейнть: ся, кие ломаттнень инголе лувсы и лемдьсы эсь прянц Моннекс, сянь Ломанень Цёраське Шкаень ангелхнень инголе лувсы и лемдьсы Сонценнекс.9А кие потай Монь эздон ломаттнень инголе, сянь эзда Монга потан Шкаень ангелхнень инголе.10Эрсь, кие сялдсы Ломанень Цёрать, сянь пежец нолдави; а кие сялдсы Иняру Ваймопожфть, сянь пежец аф нолдави.

11Мзярда тинь вяттядязь синагогас, оцюнятненди и прятненди, тяда пичедь, кода араламс пря и мезе корхтамс.12Ся пингть Иняру Ваймопожфсь тонафттядязь, мезе эряви корхтамс».

Валвеляфкс ёньфтома козя алять колга

13Ломаттнень ёткста кати-кие мярьгсь Иисусонди: «Тонафты! Азк брадозти, катк явсы мархтон тядянь-алянь эзда лятф уликс-пароньконь».14Иисус мярьгсь: «Ожу, а кие путомань Монь тейнть судьякс и уликс-паронтень явикс?»15Сяльде пшкядсь сембонди: «Ванода, ванфтода пря козяшити прафтомада, сяс мес ломанть эряфоц ащи аф козяшить эзда, кодама оцю сон афоль уле».

16Иисус азондсь тейст валвеляфкс: «Фкя козя алять паксясонза шачсь лама сёра.17Сон арьсесь эсь пачканза: "Мезе тейне тиемс? Аш коза марамс сёрозе".18И эста сон мярьгсь: "Вов мезе тиян, синнесайне утомнень и путан вастозост оцюфт, и мараса эзост марнек сёрозень и марнек паршизень.19Эста мярьган эстейне: тяни тонь мезьце аньцек аш, уликсце саты лама кизонди. Ваймосек, ярхцак, сипть, кеняртькшнек эряфти!"20Аньцек Шкайсь мярьгсь тейнза: "Ёньфтома! Тяка веня тонь ваймоцень сявсазь. Кинди ина ляды сембось ся, мезе кочкать?"

21Тяфта уленди эрь ломанть мархта, кие кочкай козяши эстейнза, а аф Шкайса козякоды».

Васендакиге вешендеда Шкаень Оцязорксши

(Матф. 6:25-34, 19-21)

22Иисус мярьгсь тонафниензонды: «Сяс корхтан тейнть: тяда пичеде эряфонтень инкса: мезьда тейнть ярхцамс и мезьса щамс ронгонтень.23Ваймось ярхцамбяльда питни, ронгсь – щамда.24Варжакстода кранчнень лангс: синь аф видихть, аф нуйхть, аш потмарсна, аш утомсна, и Шкайсь андсыне синь. А тинь ламода сяда питнихтяда нармоттнень коряс.25Ина кие эздонт, пичедезь, машты кувалгафтомс эряфонц хуш фкя частонди?26Тяфта, кда тя анцяйняське тейнть аф тиеви, эста месть лажнатада лиянкса?

27Ванода панчфнень лангс, кода синь касыхть: аф покодихть, аф кштирдихть. Аньцек корхтан тейнть, Соломонга эсь козяшинц вандолфса ашезь щакшне тяфта мазыста, кода эрь панчфсь.28Кда Шкайсь тяфта щасы тишеть, кона тячи касы паксяса, а ванды ули ёрдаф пянакудс, эста дяряй Сон аф щатядязь тинь? Вай, конашкава ёмла тинь кемаманте!29Сяс тяда вешенде мезьда тейнть ярхцамс, мезьда симомс, и тяда пичеде тянкса.30Вдь семботь тянь вешендьсазь тя масторлангонь ломаттне; а тинь Алянте содасы, мезе тейнть эряви.31Но вешендесть Шкайть Оцязорксшинц, и сембось тявок максови тейнть.

32Тят пеле, ёмла стада, вдь Алянтень ули паромялец максомс тейнть Оцязорксши.33Мишендесть уликсонтень и лездода ашуфненди. Аноклада эстейнть ярмаконь путомс кяскавнят, конат аф каладыхть; кочкада эстейнть аф юмафтови козяши менельса, коза салайсь аф маладови и коса ки мелавсь аф пори.34Вдь коса козяшинте, тоса ули седиентевок».

Покодись, кона учсы азоронц саманц

(Матф. 24:45-51)

35«Най уледа анокт: щамонте улест карксафт, толонте крьвястьфт.36Уледа сятнень лаца, конат учендсазь азорснон мрдаманц рьвяямань иласта, синь анокт эстокиге панжемс азорти, кодак ся сай и чакай кенкшти.37Павазуфт ся покодихне, конатнень азорсь мрдамстонза сатсыне аф удозь. Видеста корхтан тейнть, азорсь карксасы перьфонц и озафтсыне синь шра ваксс, кармай каванямост.38Павазуфт ся покодихне, конатнень азорсь сатсыне аф удозь, мзярса сон афоль мрда, пялеветь али варьхмодемста.39Тейнть содаф тя: содандярялезе кудазорсь, конашкада сай салайсь, эста сон афоль мада и афолезе нолда салайть кудозонза.40Тиньге уледа анокт, сяс мес Ломанень Цёрась сай ся пингоня, мзярда тинь аф учсасть Сонь».

41Эста Пётр кизефтезе: «Азор, тя валвеляфксть азондыть аньцек тейнек али сембонди?»

42Азорсь мярьгсь: «Уледа ёню и кулхцонды кудвятить лаца, конань азорсь апак пельхть путозе сембе покодиензон лангс оцюнякс и кошардозе эрявикс пингста явондомс тейст ярхцамбяльть.43Павазу ся покодись, конань азороц мрдамстонза сатсы тяфта тиендикс.44Видеста корхтан тейнть: кудазорсь путсы сонь оцюнякс марнек уликс-паронц лангса.45Мярьгондяряй сяка покодись седиге: "Аф курок сай азорозе", и ушеды пикссемост покодихнень, аванек-алянек, кармай ярхцама, симома иредемозонза,46эста сай азороц ся шиня, мзярда сон аф учсы, и ся ёткть, мзярда сон аф арьси саманц колга. Азорсь пялева керсы сонь и ёрдасы аф кемайхнень ёткс.

47Ся покодись, кона содазе азоронц мяленц, и ашезе пяшкоде сонь, ули пяк пиксф.48А ся, кона ашезе сода азоронц мяленц и тись мезевок стама, мезенкса пиксомаль, пиксови аф пяк. Кинди лама максф, сянь кядьста лама кизефтеви; кинь лангс лама надияфтови, сянь кядьста сяда лама вешеви».

Иисус арай явоманди туфталкс

(Матф. 10:34-36)

49«Мон сань толонь кандома модать лангс, и конашкава мялезе – крьвязеза ни сон!50Тейне сави кстиндафтомс пря маятамань кстиндамаса; конашкава стака Тейне, мзярс сон аф тиеви!51Тинь арьсетяда, Мон сань модать лангс сетьмошинь кандома? Аф! Мон сань явомань кандома.52Тя пингста сявомок, фкя кудонь вете ломаттне явихть эсь ётковаст: колмотне арайхть кафттнень каршек, и кафттне колмотнень каршек;53алясь кармай молема цёранц каршек, цёрась алянц каршек; тядясь стиренц каршек, стирсь тядянц каршек; авозсь рьвянянц каршек, рьвянясь авозенц каршек».

Пингть тяштьксонза

(Матф. 16:2,3)

54Иисус мярьгсь ломаттненди: «Мзярда няйхтяда ковол, кона кеподи шинь валгома ширде, эстокиге мярьктяда: "Ули пизем"; стане и уленди.55Мзярда уфай лямбе ширдень варма, тинь мярьктяда: "Пси ули"; стане и уленди.56Шамафксонь каннихть! Тинь модать и менельть лангс ваномста машттада содамонза, кодама ули ушесь, а кодама сась тяни пингсь – тянь шарьхкодема аф машттада.

Ладяк каршек молицень мархта

(Матф. 5:25,26)

57Мес ина эстейнть аф арьсеви, мезсь виде, а мезсь аф?58Мзярда тон срхкать судс каршек молицень мархта, ки кувалмова путк сембе вийцень мархтонза ладяманкса, афток сон вяттянза судьяти, а судьясь макстанза ванфтыти, а ванфтысь ёрдатанза пякстамгудс.59Корхтаса тейть: аф лисеват тоста, мзярс аф пандсак сембе шумоцень трёшниконьбес».


предыдущая глава Глава 12 следующая глава