Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАНЬ КОРЯС ЕВАНГЕЛИЯ

Глава 19

Закхей каяфксонь кочкайсь

1Сяльде Иисус сувась Иерихону и ётась пачканза.2Ошса ульсь фкя козя аля, каяфксонь кочкайхнень оцюнясна, лемоцоль Закхей.3Сонь пяк мялецоль варжакстомс Иисусонь лангс, кодама Сон, аньцек лама ломанень фталда ашезь няе ёмла серенц сюнеда.4Эста сон инголдазень ломаттнень и Иисусонь няеманкса куцсь смоква шуфтть пряс, конань вакска Сянди сави ётамс.5Иисус ся вастти пачкодемста, варжакстсь вяри и мярьгсь тейнза: «Закхей, валк куроконе, тячи Тейне эряви лоткамс пялот».

6Закхей эрязста валгсь и кенярдезь сявозе Сонь эсь пялонза инжикс.7Тянь няемста сембе ушедсть изгордозь корхтама: «Вай, Иисус сувась инжикс пежу ломанень пяли».8Закхей арась инголи и мярьгсь Азорти: «Азор, уликс-парозень пяленц максса ашуфненди, а кинь кядьста васькафтозь сявонь сяда лама – пандса нилень-крдаксть».9Иисус мярьгсь тейнза: «Тяни сась тя куду идемась, сяс мес Закхейге Авраамонь цёрац.10Ломанень Цёрась сась юмафнень вешемост и идемост».

Валвеляфкс покодихненди максф ярмакть колга

(Матф. 25:14-30)

11Сятненди, кит кулхцондозь тянь, Иисус азондсь нинге фкя валвеляфкс. Вдь Сон ульсь Иерусалимть маласа, и синь арьсесть, курок сай Шкаень Оцязорксшись.

12Сон мярьгсь: «Фкя цебярь юромонь ломань тусь ичкоздень масторс ва мезенкса: максолезь тейнза оцязорксшить и мрдаль меки.13Тумстонза сон тердезень кемонь покодиензон, макссь тейст кемонь зрнянь ярмакт и мярьгсь: "Монь мрдамозон нолдасть тя ярмакть тевс".14Но тя масторонь эряйхне афолезь няе сонь и кучсть мельганза ломатть эсь мяльснон пачфтема: "Минь аш мяленьке няемс тя ломанть эстейнек оцязоркс".

15Мзярда тейнза максовсь оцязорксшись и сон мрдась меки, тертьфтезень ся покодихнень, конатненди макссь ярмак, сяс мес мялецоль содамс, кие мзярксть касфтозе ярмакть.16Сась васенцесь и мярьгсь: "Азор, тонь зрнянь ярмакцень касфтыне кемоньксть".17Азорсь мярьгсь тейнза: "Пара, цебярят покодись. Сяс мес тонь лангозт ульсь кода надиямс ёмла тевса, сяфть эсь вятемацень алу кемонь ошт".18Сась омбоцесь и мярьгсь: "Азор, тонь зрнянь ярмакцень касфтыне ветексть".19Сянди азорсь мярьгсь: "Ульхть вете ошень вятикс".

20Сась колмоцесь и мярьгсь: "Азор, вов тонь ярмакце, мон ванфтыне сонь руцяня потмоса.21Мон пелень эздот, сяс мес тон ломанць казямат: сяват, мезе ашеть путне; нуят, мезе ашеть виде".22Азороц мярьгсь тейнза: "Кальдяв покоди! Эсь валсот карман судендамот. Тон содайть, мон ломанць казяман, сяван, мезе ашень путне; нуян, мезе ашень виде.23Мес ина тон ашить макса монь ярмакозень полафнема вастс? Эста мрдамдон меле мон сяволине эсь ярмакозень касфтфста".

24Азорсь мярьгсь вакссонза ащихненди: "Сявость кядьстонза зрнянь ярмакть и максость сянди, кинь кемонь ярмактонза".25Тейнза мярьгсть: "Азор, сянь ни ули кемонь зрнянь ярмакоц".26"Мон корхтан тейнть, – мярьгсь оцязорсь, – эрти, кинь ули, нинге максови, а кинь аш, сянь кядьста сявови сявок, мезец ули.27А монь аф кельгинень, кит ашезь ёра монь оцязоркс арамазень, вятесть сей и сельминголен шавость"».

Иисусонь самац Иерусалиму

(Матф. 21:1-11; Марк 11:1-11; Иоанн 12:12-19)

28Валвеляфксть азондомда меле Иисус поладозе кинц Иерусалиму.29Мзярда Сон пачкодсь Виффагия и Вифания велетнень малас, тона пандти, кона лемневсь Вайшуфта панда, Сон кучезень кафта тонафниензон,30мярьгсь тейст: «Арда каршек ащи велети, эзонза сувамста няйхтяда сотнеф од осёл, конань лангса нинге кивок ашезь арне; юксость сонь и вятесть сей.31Кизефтендярятядязь кивок: "Мезенди юкссесасть?", – каршезонза мярьгода тяфта: "Сон эряви Азорти"».

32Кучфне тусть и музь семботь стане, кода Иисус мярьгсь тейст.33Мзярда синь кармасть осёлть юксомонза, азоронза мярьгсть тейст: «Мезенди юкссесасть од осёлть?»34Синь каршезост: «Сон эряви Азорти».

35Вятезь сонь Иисусонди; лаподезь осёлть лангс щамснон и озафтозь лангозонза Иисусонь.36Мзярда Сон ардсь, ломаттне ацсезь кить лангс эсь щамснон.

37Пачкодемок ся вастти, коса кись туй алу Вайшуфта пандста, сембе ламодонга лама тонафниенза ушедсть кенярдезь вярьгак вайгяльхть шнамонза Шкайть сембе дивань тефнень инкса, конатнень синь няезь.38Синь корхнесть:
«Бславаф Оцязорсь, кона сай Азорть лемса!
Сетьмоши менельса и шнама Инь Вярдень Шкайти!»

39Ломаттнень ёткста кона-кона фарисейхне мярьгсть Иисусонди: «Тонафты, кардайть тонафнихнень».40Но Сон каршезост мярьгсь: «Корхтан тейнть, лоткандяряйхть синь, эста ювадезевихть кефне».

41Мзярда маладсь Иерусалимти, ошть лангс ваномста Иисус аварьгодсь инксонза.42Сон мярьгсь: «Вай, хуш тячиень шиня тонга содалить, мезсь канды тейть сетьмоши и идема! Аньцек тяни тя кяшф сельмодот;43вдь сайхть тейть шит, мзярда душматтне маратядязь модань перяфксса, перятядязь и люпштатядязь сембе ширде.44Синь машфттядязь тинь и тинь шабантень, кев лангса кевга аф кадыхть – и сембе тя сянкса, мес тон ашить сода ся пингть, мзярда Шкайсь сашендсь максомс тейть идема».

Иисус Шкаень кудса

(Матф. 21:12-17; Марк 11:15-19; Иоанн 2:13-22)

45Шкайкудонь пирьфи сувамста Иисус ушедсь панцемост тоста мишендихнень и рамсихнень.46Корхтась тейст: «Сёрматфксса азф:
"Монь кудозе – озондомань куд,
а тинь тиесть сонь салаень-шавиень пизокс"».

47Эрь шиня Сон тонафтсь Шкаень кудса. Озксвятиень оцюнятне, койти тонафтыхне и ломаньтналонь оцюнятне вешсть туфтал машфтомс Сонь.48Но синь ашезь сода, кода тиемс тянь, сяс мес перьфканза фалу ульсть ломатть, конат кулхцондозь Сонь.


*а 19:13 Тяфтама зрнянь ярмакть, минать, питнецоль сяда динарий.

*б 19:38 Псалтирь 117:26

*в 19:46 Исаия 56:7

*г 19:46 Иеремия 7:11


предыдущая глава Глава 19 следующая глава