Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ЛУКАНЬ КОРЯС ЕВАНГЕЛИЯ

Глава 7

Римонь сядонь оцюнять кемамац

(Матф. 8:5-13; Иоанн 4:43-54)

1Иисус азозе ломаттненди семботь, мезе мялецоль азомс, и тяда меле тусь Капернаум ошу.2Тоса фкя сядонь оцюнять ульсь покодиец, конань сон кельгозе. Тя покодись сярятькстсь и ульсь кулома лангса.3Сядонь оцюнясь, кодак марясь Иисусонь колга, кучсь Тейнза евреень оцюнят эняльдема – саль покодиенц идема.4Синь мольсть Иисусти и седиге эняльдезь корхтасть: «Тя сядонь оцюнясь пяк цебярь ломань, сяс эняльттяма, лезтт тейнза!5Сон кельгсы ломаньтналоньконь и путсь тейнек синагога».6Иисус тусь мархтост.

Мзярда Сон ни аф ичкозель кудонц эзда, сядонь оцюнясь кучезень ялганзон азомс Тейнза: «Азор, тят томошинда пря. Мон аф кондястян сувафтомс Тонь эсь кудботмозон;7сяс монцьке ашень моле тейть, лувса прязень инголет аф кондястикс. Тон аньцек аст вал, и монь покодиезе пчкяй.8Монь монценьге лангсон улихть оцюнят, и монцьке оцюнян ушматтнень лангса. Мярьган фкяти: "Мольхть", – и сон моли; омбоцети: "Сак", – и сай; тейне покодити мярьган: "Тик сянь", – и тисы».9Тянь кулемста Иисус дивандась, шарфтсь мельганза моли ломаттненди и мярьгсь: «Корхтан тейнть, Израильсонга Мон ашень васьфне тяфтама кемама».10Куду мрдамста кучфне няезь покодить шумбраста.

Иисус вельмафтсы кулофста удавать цёранц Наин ошса

11Курок тяда меле Иисус мольсь Наин ошу. Мархтонза мольсть тонафниенза и пяк лама лия ломань.12Ся ёткть, мзярда Сон маладсь ошень ортатненди, лихтсть калмамс ловажа, удава-тядять фкя-тяка цёранц; удавать мархта ошста мольсь лама ломань.13Няемстонза, Азорти ужялькс арась авась, мярьгсь тейнза: «Тят аварде».14Иисус нежедсь и токафтозе кяденц лазксненди; кандыенза лоткасть. Сон мярьгсь: «Цёра, мярьган тейть, стяк!»15Кулофсь озась и кармась корхтама; Иисус мрдафтозе сонь тядянцты.

16Сембонь сявозень пелема, синь кармасть шнамонза Шкайть: «Пяк оцю пророк эвондась минь ётксонк, Шкайсь сась лездома Эсь ломаньтналонцты».17Иисусонь колга азкссь срадсь марнек Иудеява и перьфпяльдень сембе аймакова.

Иоанн Кстиндайть кизефксоц Иисусти

(Матф. 11:2-19)

18Иоаннонь тонафниенза азондсть Иоаннонди Иисусонь тевонзон колга. Иоанн серьгядсь кафта тонафнихть,19кучезень Азорть кизефтемонза: «Тон Ся, конанди эряви самс, али учемс тейнек киньге лиянь?»20Синь састь Иисусти и мярьгсть: «Иоанн Кстиндайсь кучемазь кизефтемот: "Тон Ся, конанди эряви самс, али учемс тейнек киньге лиянь?"»

21Тя ульсь ся пингть, мзярда Иисус пчкафтсь пяк лама ломань урмада и стака сярядемада, ламоста панць кяжи ваймопожфт, ламонц сокорхнень тиезень няикс.22Иисус мярьгсь каршезост: «Арда, азондость Иоаннонди, мезе няеде и куледе:
сокорхне няихть,
шаморхне якайхть,
наксафты урмаса сярядихне аруякшнихть,
пяряфне кулихть,
кулофнень вельмафнесазь,
и ашуфненди пачфневи Пара кулясь.

23Павазу ся, кие аф юмафтсы Тейне кемамать!»

Иисус азонды Иоанн Кстиндайть колга

24Иоаннонь кучфонзон тумдост меле, Иисус кармась корхтама ломаттненди Иоаннонь колга: «Мезень ванома тинь якаде шавмодав? Нюдить, конань вармась шерьфтьсы?25Ина мезень ванома якаде тинь? Арьседе няемс козя щамса щаф ломань? Питниста щафне и козяста эряйхне – сят оцязоронь кудгат.26Ина мезень ванома якаде тинь? Пророконь? Виде, Мон азса тейнть, сон пророкта оцю.27Сон ся, конань колга сёрматф:
"Тонь инголет Мон кучса кулянь кандыезень,
и сон анокласы Тейть кить".

28Сяс корхтан тейнть: сембе шачфнень ёткса аш фкявок пророк, кона улель Иоаннда оцю; но сембода ёмлась Шкаень Оцязорксшиса сондедонза оцю.

29Сембе ломаттне, кит кулхцондозь Сонь, нльне каяфксонь кочкайхневок, лувозь видекс Шкаень арьсефть и кстиндафтсть пря Иоаннонь кядьста.30А фарисейхне и койти тонафтыхне тусть Шкайть мяленц каршек и ашезь кстиндафта пряснон.

31Кинь мархта ладясайне тя пингонь ломаттнень? Кинь лангс синь шарыхть?32Синь кода шабат, конат озафт мишендема-рамсема вастова и фкя-фкянди пешкоткшнихть: "Минь мораме тейнть нюдиса, и тинь ашеде кшти; минь мораме тейнть явсемань морот, и тинь ашеде аварде".33Сась Иоанн Кстиндайсь, кшида аф ярхцай, винада аф сими, и тинь корхтада: "Сонь эсонза кяжи ваймопожф".34Сась Ломанень Цёрась, ярхцай и сими; корхтада: "Ванода, вов тетькись и симилась, каяфксонь кочкайхнень и лия пежуфнень ялгасна".35Но Шкайть сембе иденза няфнесазь эсь тевсост Шкаень смузьшить видешинц».

Фарисей Симонць и пежу ава

36Фкя фарисейсь тердезе Иисусонь мархтонза ярхцама. Сон сась фарисейть кудс и озась шрать ваксс ярхцама.37Ся ошса эрясь фкя усксеви ава. Мзярда сон кулезе – Иисус ярхцай фарисейть пяле, мольсь тов и мархтонза кандсь алебастрань кядьгоняса танцти шине вай.38Сон арась Иисусонь фталонза, пильгонзон ваксс, и авардезь кармась валондомост пильгонзон сельмоведьса и шяярьса нарнемост, палсезень пильгонзон и вадендезень вайса.

39Тянь няемста фарисейсь, Иисусонь серьгядиец, арьсесь эсь пачканза: «Улендяряль тя Ломанць афкуксонь пророк, содалезе, кие и кодама ава токсесы Сонь, вдь авась пежу».40Иисус шарфтсь тейнза и пшкядсь: «Симон, Монь ули корхтамазе тейть». Ся мярьгсь: «Азк мезе, Тонафты».

41«Пандомда фкя макссить ульсть кафта шумувонза», – ушедсь Иисус, – «Фкясь шумуволь вете сятт динарий, омбоцесь – ведьгемонь.42Сяс мес кафцьконди ашель мезьса пандомс, сон кафцьконь шумоснон нолдазень. Азк ина, кона эздост сяда пяк кармай кельгомонза?»43Симон каршезонза мярьгсь: «Арьсян, ся, конанди сяда лама нолдась шумода». Иисус мярьгсь тейнза: «Видеста арьсить».44Сяльде шарфтсь авать шири и мярьгсь Симононди: «Няйсак тя авать? Мзярда Мон сань пялот, тон Тейне пильгонь штамс ведь ашеть макса; а сон сельмоведьса валозень пильгонень и шяярьсонза нардазень.45Тон васьфтемстон ашемайть пала; а сон самстонкиге афи лоткси палсемдост пильгонень.46Тон тяфтамка вайса ашить ваде прязень; а сон танцти шине вайса вадезень пильгонень.47Сяс корхтан тейть: тя авась Монь пяк кельгсамань, сяс мес нолдафт лама пеженза. Кинди кржа пежеда нолдави, ся кржа кельги».48Авати мярьгсь: «Тонь пежетне нолдафт».

49Мархтонза шрать ваксстотне эсь пачкаст арьсесть: «Кие тя тяфтамсь, кона пежетка ноляй?»50Иисус мярьгсь авати: «Кемамаце идензе тонь, мольхть сетьмоши мархта».


*а 7:27 Малахия 3:1


предыдущая глава Глава 7 следующая глава