Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

МАРКОНЬ КОРЯС ЕВАНГЕЛИЯ

Глава 4

Валвеляфкс сёронь видить колга

(Матф. 13:1-9; Лук. 8:4-8)

1Иисус тага ушедсь тонафтома эрьхкть трваса. Перьфканза пуромсь пяк лама ломань, сяс Сон озась венчс, аф ламода аердсь эрьхкть трваста, а сембе ломаттне лядсть модалангса.

2Иисус тонафтсь валвеляфксонь азонкшнезь и тонафтомасонза корхтась тейст:3«Кулхцондода! Лиссь видись видема.4Мзярда сон видесь, лиссь тяфта: кона-кона видьмотне прасть кить ваксс. Лийсть нармотть и кочказь синь.5Кона-кона видьмотне прасть кеву вастс, коса кржаль модада. Ся видьмотне лиссть курокста, сяс мес тоса аф ламоль модада.6Но мзярда кеподсь шись, сон шятезень лисьфкятнень и синь пужсть, сяс мес ашельхть кеме юрсна.7Конат-конат прасть сялги тише ёткс. Сялги тишесь кассь и опаптозень лисьфкятнень, сяс синь ашесть канда раштафкс.8А кона-кона видьмотне прасть пара мода лангс, нолдасть лисьфкат, лисьфкятне кассть и эрь нетькскять эзда шачсь колмогемонь, кодгемонь и нльне сядонь видьмоня».9И мярьгсь Иисус: «Кинь улихть кули пиленза, ся катк кульсы!»

Валвеляфксть смузец

(Матф. 13:10-23; Лук. 8:9-15)

10Мзярда Сон тусь ломаттнень ёткста, кемгафтувотне и лия тонафнихне кизефтезь Иисусть тя валвеляфксть колга.11Сон мярьгсь тейст: «Тейнть максф содамс Шкаень Оцязорксшить салавашинзон, а лиятненди сембось азондови валвеляфксса,12тяфта синь
эсь сельмосост ваныхть и аф няихть,
эсь пилесост кулихть и аф шарьхкодихть,
и аф шарфтыхть Шкайти,
пежесновок аф нолдавихть тейст».

13Иисус кизефтезень: «Дяряй аф шарьхкодьсасть тя валвеляфксть? Кода ина тейнть шарьхкодевихть лия валвеляфксне?14Видись види вал.15Улихть ломатть ся видьмотнень лаца, конат прасть ки ваксс. Синь кульсазь валть, эстокиге сай Сатанась и нельгсы седиезост видеф валть.16Лиятне ся видьмотнень лацот, конат видефтольхть кеву вастс. Мзярда кульсазь валть, синь кенярдезь путсазь седиезост.17Но сяс мес эсост аш юрхт, синь кирдихть аф куватьс. Сяльде, мзярда валть инкса кармайхть люпштамост али панцемост, синь эстокиге потайхть кемамада.18Лиятне ся видьмотнень лацот, конат видефтольхть ся вастти, коса кассь сялги тише. Синь кульсазь валть,19но эрь шинь тефне, козякодомати прафтомась и лия тевонь кувалма мяльхне сувайхть потмозост и опаптсазь валть, и валсь аф канды раштафкс.20А лиятне ся видьмотнень лацот, конатнень видезь пара модас. Ся ломаттне кульсазь валть и сувафнесазь ваймозост, и синь кандыхть од видьмот – кие колмогемонь, кие кодгемонь, кие сядонь видьме».

Валвеляфкс валдть колга

(Лук. 8:16-18)

21Нинге Иисус мярьгсь тейст: «Мзярда сувафтыхть штатол, дяряй сонь путнесазь кядьгоня алу али аксялу? Меколанкт, сонь путнесазь штатолонь кирдемас.22Вдь сембе салаваннесь арай содафокс, и сембось, мезсь кяшф, лиси лангти.23Кинь улихть кули пиленза, ся катк кульсы!»24Нинге Сон мярьгсь: «Лацкас арьседа сянь колга, мезе кульхтяда. Мзяра ункстатада лиятненди, сняра тейнтьке ункстави, и нинге сяда лама.25Кинь ули, сянди максови, а кинь аш, сянь кядьста сявови сявок, мезец ули».

Валвеляфкс видеф и лисьф сёроть колга

26Иисус мярьгсь: «Шкайть Оцязорксшиц ся ломанть лаца, кона ёрдасы видьмоть модать лангс.27Веть ломанць уды, шобдава сон стяй. Видьмось ся пингоня лиси и касы – а кода, ломанць сонцьке аф содасы.28Вдь модась сонць касфтсы видьмоть. Васенда эвондай лисьфкя, тоса шачи пряня, прянясь пяшкодеви видьмода.29А мзярда сёротне кенерихть, ломанць эстокиге кучи тарваз мархта покодихть, сяс мес сась нумань пингсь».

Валвеляфкс горчицань видьмонять колга

(Матф. 13:31-35; Лук. 13:18,19)

30Иисус корхтась сяда тов: «Мезень лангс шары Шкайть Оцязорксшиц? Кодама валвеляфксса няфтьсаськ сонь?31Сон кода горчицань видьмонясь, кона модав видемстонза инь ёмла сембе видьмотнень ёткста.32Но, мзярда сон видеф, касы и арай перень марнек касыкснень коряс сембода оцюкс и стане тарадыяй, нльне менелень нармоттне тиендихть пизот тарадонзон ёткс».

33И лама тяфтама валвеляфксса Сон азондозе тейст Шкаень валть. Сон корхтась тейст аньцек сняра, мзяра тейст шарьхкодевсь.34Валвеляфксфтома Иисус тейст мезевок ашезь азонкшне. Но мзярда Сон лядондсь Эсь тонафниензон мархта, эста панчсезе тейст валвеляфкснень смузьснон.

Иисус сетьмолгофтсы даволть

(Матф. 8:23-27; Лук. 8:22-25)

35Сяка шиня, илять, Иисус мярьгсь тонафниензонды: «Эрьда ётатама эрьхкть тона трвазонза».36Синь нолдазь ломаттнень и сяка венчса, конаса тонафтсь Иисус, тусть эрьхкть трваста уезь. Мархтост уйсть лия венчтка.37И кеподсь вишке варма. Ведькомболксне эрьхнесть венчти, и сон кармась пяшкодема ведьта.38Иисус ся пингоня удось венчса, прялонза путфоль прял. Тонафниенза стяфнезь Сонь, корхтасть: «Тонафты! Минь ваятама! Дяряй Тейть сембе сяка?»39Эста Иисус стясь и кардазе вармать, ведтинге мярьгсь: «Сетьмок! Лоткак!» Вармась лоткась, и арась пяк сетьме.40И Сон кизефтезень: «Мес тяшкава пельхтяда? Тинь тнярс нинге аш кемаманте?»41Синь фатязе оцюдонга оцю пелема и корхнесть фкя-фкянди: «Кие Тя тяфтамсь, конань нльне вармась и ведсь кулхцондсазь?»


*а 4:12 Исаия 6:9-10


предыдущая глава Глава 4 следующая глава