Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИОАННОНЬ КОРЯС ЕВАНГЕЛИЯ

Глава 12

Мария вадьсы Иисусонь танцти шине вайса

(Матф. 26:6-13; Марк 14:3-9)

1Очижинь карша кота шида инголе Иисус сась Вифанияв, коса эрясь Лазарь, конань Иисус вельмафтозе кулофста.2Тоса анокласть Тейнза илядень ярхцама-симома. Марфа каванясь эсост, Лазарь шрать вакссоль Иисусонь и лия инжихнень мархта.

3А Мария сявсь фунтошка ару нардонь пяк питни вай, вадендезень Иисусонь пильгонзон и нарнезень эсь пряшяярьсонза; и марнек кудсь пяшкодсь тя вайть пяк танцти шинеса.4Эста Иисусонь тонафниензон эзда фкясь, Иуда, Симон Искариотонь цёрац, кона сяльде мизе Сонь, мярьгсь:5«Мес тя вайть ашезь ми колма сятт динарийда, а ярмакнень эздонза ашезь яв ашуфненди?»6Тяфта сон мярьгсь аф сяс, мес арьсесь ашуфнень колга, а сяс, мес ульсь салай ломань. Сонь кядьсонзоль марстонь ярмак мархта арзянясь и тоза кайсефнень эзда сон сявондель эстейнза.7Иисус каршезонза мярьгсь: «Кадость авать; сон тянь ванфтозе Монь калмама шизенди.8Вдь ашуфне фалу улихть вакссонт, а Мон – аф».

Оцюнятне ёрасазь шавомс Лазарень

(Матф. 21:1-9; Марк 11:1-10; Лук. 19:28-38)

9Еврейхнень ёткста ламотне содазь: Иисуссь тоса, и састь аф аньцек Сонь инксонза, но Лазареньге ванома, конань Иисус вельмафтозе кулофста.10Сяс озксвятиень оцюнятне арьсезь шавомс Лазареньге:11вдь сон ульсь туфталсь, мес еврейхнень эзда ламотне аердсть синь эздост и ушедсть кемама Иисусти.

Иисус сай Иерусалиму озада осёл лангса

12Омбоце шиня Очижи илати сафнень ёткста ламотне марязь: Иисус моли Иерусалиму.13Сявсть пальмань тараткат, лиссть Сонь каршезонза и юватькшнесть:
«Осанна!
Бславаф Азорть лемса сайсь,
Израилень Оцязорсь!»

14А Иисус мусь од осёл и озась лангозонза, кода азф Сёрматфксса:15
«Тят пеле, Сиононь стирсь!
Вага, тонь Оцязорце сай
озада од осёл лангса».

16Васенда Сонь тонафниенза тянь ашезь шарьхкоде. Аньцек мзярда Иисус вельмась и кепотьфоль Шкайть иневалдозонза, эста лятфтазь: тяфта колганза сёрматфоль, и тя тифоль Тейнза.

17Ломаттне, конат инголи ульсть Иисусть мархта, азондозь: Сон стяфтозе Лазарень калмоста и вельмафтозе сонь кулофста.18Вага мес ломаттне лиссть Иисусонь васьфтема: синь кулезь, тя тяштьксть тиезе Сон.19А фарисейхне корхтасть эсь ётковаст: «Дяряй аф няйсасть: мезьсовок аф лисенди тевоньке? Сембе масторсь моли мельганза».

Пингсь сась!

20Очижиста озондома сайхнень ёткса ульсть гректка.21Синь састь Филиппонь ваксс, кона ульсь Галилеянь Вифсаидаста, и эняльдсть тейнза: «Пара ломань! Минь мяленьке няемс Иисусонь».22Филипп мольсь и азозе тянь Андреенди, и сяльде Андрей и Филипп тянь азозь Иисусти.

23Но Иисус мярьгсь каршезост: «Сась пингсь, мзярда Шкайсь няфтьсы Ломанень Цёрать афкуксонь оцюшинц.24Видеста корхтан тейнть: кда тозеронь видьмось модати прамста аф кулы, эста ляды ськамонза; а кда кулы, эста канды лама видьмода.25Кие кельгсы эсь эряфонц, юмафтсы сонь; а тя масторлангса эсь эряфонь аф кельгись ванфтсы сонь пефтома эряфти.26Кинь мялец Тейне покодемс, молеза мельган. Косан Мон, тоса улеза покодиезевок. И кие Тейне покоди, сянь шнасы Монь Алязе».

Иисус азонды Эсь куломанц колга

27«Монь колавсь марнек ваймозе; и мезе Мон азан? Аляй! Ванфтомак тя пингть эзда? Но тя пингть инкса Мон и сань.28Аляй! Няфтьк Эсь лемцень оцюшинц!»

Эста менельста сась вайгяль: «Мон ни няфтине Эсь лемозень оцюшинц и нинге няфтьса».29Ломаттне, марямок тянь, корхтасть: «Тя атямсь». А лиятне корхтасть: «Ангелсь мархтонза корхтась».30Иисус тянь каршес мярьгсь: «Тя вайгяльсь ульсь аф Тейне, а тейнть.31Тяни сась масторлангть судендама пингоц; тяни тя масторлангть азороц ули паньф тяста.32И мзярда Мон масторть лангста кеподеван вяри, сембонь сявсайне Эсь ширезон».33Ня валхнень вельде Сон макссь тейст содамс, кодама куломаса Сон кулы.

34Ломаттне корхтасть Тейнза: «Минь содаськ Сёрматфксста, Христоссь эряй пефтома. Кода ина Тон корхтат, Ломанень Цёрась ули кепотьф вяри? Кие тя Ломанень Цёрась?»35Эста Иисус мярьгсь тейст: «Нинге аф лама пингс валдсь ляды мархтонт. Якада, мзярс нинге валдсь мархтонт, афоледязь комача шобдась: кие якай шобдашиса, ся аф содасы, коза моли.36Мзярс валдсь мархтонт, кемада валдти. Эста аратада валдти идькс». Тянь азомда меле Иисус аердсь и кяшсь эздост.

Еврейхне аф кемайхть Иисусти

37Тняра тяштькс Сон тись инголест; и синь сембе сяка ашесть кема Тейнза.38Тя лиссь сяс, мес эрявсь пяшкодевомс Исаия пророкть валонцты:
«Азор! Кие кемась минь валоньконди?
И кинди панчфоль Шкайть виец?»

39Тейст ашель кода кемамс, сяс мес, кода нинге азозе Исаия:40
«Ня ломаттне сокоргофтозь эсь сельмоснон
и калготкстоптозь эсь седиснон:
афольхть няе эсь сельмосост
и афольхть шарьхкоде седисост,
афольхть шарфта Тейне
и афолине пчкафта синь».

41Исаия тянь азозе, сяс мес няезе Христость оцюшинц и корхтась Сонь колганза.

42Оцюнятнень эздовок ламотне кармасть кемама Иисусти; аньцек фарисейхнень инголе ашесть виденця, сяс мес пельсть синагогаста панемада.43Ня оцюнятне Шкайть шнаманц коряс сяда пяк кельгозь ломаттнень эзда шнамать.

Иисусонь валоц ули судьякс мекольце шиня

44Иисус кайгиста азозе: «Тейне кемайсь кемай аф аньцек Тейне, но Монь Кучиезтивок.45Монь няиезе Монь Кучиезеньге няйсы.46Мон сань масторлангти валдокс, Тейне фкявок кемайсь афоль ляда шобдашиса.47И кда кие марясыне Монь валнень и тии аф синь корязост, сянь аф судендаса. Мон сань масторлангть идема, аф судендама.48Эздон аердыть, Монь валозень аф кулхцондыенц ули ни судендаец: Монь валозе кармай сонь судендамонза мекольце шиня.49Вдь Мон аф Эсь эздон корхтань, а Кучиезе, Монь Алязе, Сон мярьгсь Тейне, мезе азомс и мезе корхтамс.50И Мон содаса, Сонь кошардомвалоц – тя пефтома эряфсь. И Мон корхтан аньцек сянь, мезе мярьгсь корхтамда Алязе».


*а 12:13 Псалтирь 117:25-26

*б 12:15 Захария 9:9

*в 12:38 Исаия 53:1

*г 12:40 Исаия 6:10


предыдущая глава Глава 12 следующая глава