Выбрать язык
Книги Ветхого Завета
Книги Нового Завета
с русским текстом1«Мон моран Азорти,
сяс мес Сон оцюдонга оцю.
Алашать и ластяенц
Сон ёрдазень оцюведти.
2Азорсь – виезе и шнамань морозе,
Сон идемань монь.
Сон монь Шкаезе, и мон шнаса Сонь.
Сон алязень Шкаец, Мон шнаса-оцюлгофтса Сонь.
3Азорсь тюри ушман,
Сонь лемоц Азор*а.
4Фараонть крандазонзон и ушмовиенц
Сон ёрдазень оцюведти,
и инь цебярь ушманвятиенза
ваясть Якстерь оцюведти.
5Крхка ведсь вельхтязень синь:
синь ваясть, тусть ведьботмаксу, кода кев
6Азор, Тонь види кядце
инь оцю и виидонга вии.
Азор, Тонь види кядце
тапазе душманть.
7Эсь иневалдцень*б и азорксшицень мархта
Тон тапайть сятнень, кит кеподсть каршезт.
Тон кучить Эсь кяжцень
и сон плхтазень синь, кода шужярь тишеть.
8Тон таргайть ваймоцень
и веттне кеподсть,
ведькомболксне арасть стена лаца;
крхка веттне тустомсть оцюведть кучкасонза.
9Душманць мярьгсь:
"Ласькан мельгаст, сатсайне
и явса сянь, мезе сяван кядьстост сяськомдост меле.
Топодемс анца ваймозень,
лихтьса торозень
и эсь кядьсон шавсайне синь".
10Но Тон уфать Эсь вармасот,
и оцюведсь вельхтязень синь:
синь киви*в лаца
тусть оцюдонга оцю веттнень потмос.
11Азор, кие Тонь лацот шкайхнень ёткса?
Кие Тонь лацот
пяк оцю инярушиса,
Тонь лацот пельфти иневалдса
и лацот дивань тии?
12Мзярда Тон венептить Эсь види кядцень,
модась нилезень синь.
13Эсь аф полафни кельгомацень вельде Тон вятьсак тя ломаньтналть,
конань идить,
– Тон Эсь вийсот вятьсак сонь
иняру эряма вастозт.
14Ломаньтналхне кулезь и трнатозевсть:
оцю пелема фатязень Филистимонь эряйхнень.
15Эста эводсть Едомонь оцюнятне,
трнатомась фатязень Моавонь вятихнень,
таяскодсть пелемать эзда Ханаанонь сембе эряйхне.
16Катк пелемась и трнатомась фатясыне синь.
Катк Тонь вии кядцень ала синь шуфтомихть,
кода кев, мзярс аф ётай Тонь ломаньтналце;
Азор, мзярс аф ётай ся ломаньтналсь, конань Тон сявить Эстейть.
17Сувафтк сонь и юрыяфтк Эсь пандцень лангса,
ся вастса, конань Тон тиить Эстейть эряма вастокс, Азор,
ся иняру вастти*г,
конань тиезь Тонь кяттне, Азор!
18Азорсь кармай оцязорондама
фалу и пефтома пингс».
19Мзярда фараонть алашанза крандаснень и ластятнень мархта сувасть оцюведти, эста Азорсь мрдафтозень оцюведень веттнень синь лангозост, а Израилень ломаньтналсь ётась оцюведть пачк коське вастова.
20Меле Мариам пророк авась, Аарононь сазороц, сявсь кядезонза коряй*д, и сембе аватне коряйхнень мархта, кштизь, лиссть мельганза.21Мариам ушедсь морама инголест:
«Морада Азорти,
сяс мес Сон оцюдонга оцю.
Алашать и ластяенц
Сон ёрдазе оцюведти».
22Моисей сявозе Израилень ломаньтналть Якстерь оцюведть эзда, и синь састь Сур шавмодав. Синь колма шит мольсть шавмодава и ашесть мушенда ведь.23Сяльде синь састь Меррав, но ашесть симов Меррань ведьта, сяс мес сон сяпиель. Тянкса тя вастти максф лем – Мерра*е.24Ломаньтналсь ушедсь изгордома Моисеень лангс, корхтамок: «Мезьда тейнек симомс?»25Моисей эняльгодсь Азорти, и Азорсь няфтсь тейнза шуфта лангс. Моисей ёрдазе ведти шуфть тарадонц, и ведсь тиевсь цебярькс симомс. Тоса Шкайсь макссь ломаньтналти ладяфкс и кой, и тоса варчсезе ломаньтналть.26Сон мярьгсь: «Кда тон мялень путозь кармат кулхцондомонза Азор Шкайцень вайгяленц и тиендемонза сянь, мезе виде Сонь сельмосонза, и улят кулхцондыкс Сонь кошардоманзонды, и кармат ванфнемост сембе Сонь ладяфксонзон, эста Мон аф кучан лангозт фкявок стама урма, кодапт кучень Египетть лангс, сяс мес Мон Азорсь, тонь пчкафтыце».
27Меле синь састь Елиму. Тоса ульсь кемгафтува лихтибря и сизьгемонь финиконь шуфта. Тоса, ведть маласа, синь стяфтозь эсь кошснон.
*а 15:3 Синодальнай ётафтомаса и евреень текстса: Иегова (Яхве). Тяфта корхтай Эсь колганза Сонць Шкайсь: «Мон Ся, киян Мон». Ванк 3:14-15.
*б 15:7 иневалда – слава
*в 15:10 киви – свинец
*г 15:17 иняру васта – святилище
*д 15:20 коряй – бубенец
*е 15:23 Мерра – сяпи
Глава 15