Выбрать язык
Книги Ветхого Завета
Книги Нового Завета
с русским текстом1Азорсь мярьгсь Моисеенди:2«Азк Израилень ломаньтналти, катк мрдайхть и стяфтсазь кошснон Пи-Гахирофть видеса, Мигдолть и оцюведть ёткса. Катк ладясазь кошснон оцюведть ваксса, Ваал-Цефонть инголе.3Фараонць мярьги Израилень ломаньтналть колга: "Синь эрьгодсть тя модаса, и шавмодась перязе киснон".4А Мон кевонзафтса фараонть седиенц, и сон кармай ласькома мельгаст, – и Мон няфтьса Эсь оцюшизень фараонть и сонь сембе ушмовиенц лангса. Эста Египетонь ломаттне содасазь: Мон Азорсь». И Израилень ломаньтналсь тись стане, кода тейст мярькфоль.
5Египетонь оцязорти пачфтезь: Израилень ломаньтналсь ворьгодсь. Эста фараонць и сонь покодиенза полафтозь эсь мяльснон Израилень ломаньтналть колга и мярьгсть: «Мезе минь тиеме? Мезенди минь нолдаськ израильтяттнень, конат покодсть лангозонк?»6Фараонць аноклазе эсь крандазонц и сявозе мархтонза ушмовиенц.7Сон сявсь кота сятт инь цебярь крандаз и Египетонь сембе лия крандаснень, и эрть лангс путсь вяти ушман.8И Азорсь кевонзафтозе фараонть, Египетонь оцязорть, седиенц, и сон тусь Израилень ломаньтналть мельге, ёрась сатомс синь. А Израилень ломаньтналсь мольсь аф пелезь*а.9Египтяттне ласьксть мельгаст – фараононь сембе алашатне, конат кильтьфтольхть крандазс, ластятне и фараононь сембе ушмовийсь, кона мольсь ялга, – и сатозь Израилень ломаньтналть оцюведть трваса, коса синь стяфтозь кошснон, Пи-Гахирофть видеса, Ваал-Цефонть инголе.10Фараонць малаткшнесь. Израилень ломаттне варжакстсть и няезь: египтяттне молихть мельгаст. Израилень ломаттне пяк эводсть и кармасть кайгиста эняльдема Азорти лездомс тейст.11Синь мярьгсть Моисеенди: «Дяряй Египетса аш калмот, мес тон вятемасть минь кулома шавмодав? Мезе тон тиеть мархтонк, лихтемок минь Египетста?12Дяряй аф сякоть минь корхнеськ тейть Египетса, мзярда мярьгоме: "Кадомасть минь, катк минь покоттяма Египетонь ломаттнень лангс?" Тейнек сяда пара улемс урекс Египетонь ломаттненди, шавмодаса куломать вастс».13Но Моисей мярьгсь ломаньтналти: «Тяда пеле. Ащеда, кода ащеде, и тинь няйсасть, кода Азорсь тячи идетядязь тинь. Ня Египетонь ломаттнень, конатнень няйсасть тяни, оду мзярдовок аф няйсасть.14Азорсь кармай тюрема инксонт, тяда пичеде».
15Азорсь мярьгсь Моисеенди: «Мезе тон кайги вайгяльхть анцят кядьстон лездома? Мярьк Израилень ломаньтналти, катк синь молихть сяда тов.16А тон кепотьк байдекцень, венептьк кядцень оцюведть шири и явфтк сонь кафтова, и Израилень ломаттне ётайхть оцюведть кучкава коське вастова.17А Мон кевонзафтсайне египтяттнень седиснон, и синь туйхть мельгаст. Эста Мон няфтьса Эсь оцюшизень фараонть, сембе сонь ушмовиенц, крандазонзон и ластянзон лангса.18И содасазь египтяттне: Мон Азорсь, мзярда Мон няфтьса Эсь оцюшизень фараонть, сонь крандазонзон и ластянзон лангса».
19Шкайть ангелоц, кона мольсь Израилень ломаньтналть инголе, кадозе ся вастть и кармась молема фталост. Коволонь орваське, кона шашнесь инголест, арась фталост.20И тяни сон ащесь Египетонь и Израилень ломаньтналхнень ёткса. Фкятненди сон ульсь коволкс и шобдакс, а омбонцненди сон валдопнезе веть. И веньберьф кафта ломаньтналхне ашесть маладов фкя-фкянди.
21Моисей венептезе кяденц оцюведть шири, и Азорсь веньберьф панць веттнень эса шинь стяма ширдень вии вармаса. Оцюведсь явожсь, и кучкац тиевсь коське вастокс.22Израилень ломаттне ётасть оцюведть кучкава, коське вастова, а веттне ульсть тейст стена лаца види и кержи ширде.23Египтяттне ласьксть мельгаст, и фараонть сембе алашанза, крандазонза и ластянза сувасть Израилень ломаттнень мельге оцюведть кучказонза.
24Варьхмодемшовор Азорсь варжакстсь толонь и коволонь орватнень ширде египтяттнень лангс и абонтфтозень синь.25Сон ляцьфтезень крандазстост шарыхнень, и синь ускомасна арась стакакс. Египтяттне мярьгсть: «Ворьготтяма Израилень ломаттнень эзда, сяс мес Азорсь тюри мархтонк синь инксост».26Эста Азорсь мярьгсь Моисеенди: «Венептьк кядцень оцюведть шири, катк веттне врьгятихть египтяттнень, синь крандазснон и ластяснон лангс».27Моисей венептезе кяденц оцюведть шири, и шобдавать самс ведсь мрдась эсь вастозонза. А египтяттне ласьксть ведть каршес. Тяфта Азорсь ваяфтозень Египетонь ломаттнень оцюведть кучкас.28Ведсь мрдась и вельхтязе фараонть сембе ушмовиенц, крандаснень и ластятнень, конат сувасть израильтяттнень мельге оцюведти. Эздост конацка ашезь ляда шиса.29А Израилень ломаньтналсь ётась оцюведть кучкава коське вастова: веттне ульсть тейст стена лаца види и кержи ширде.30Тяфта, ся шиня Азорсь идезе Израилень ломаньтналть египтяттнень кядьтост, и Израилень ломаттне няезь египтяттнень кулофста оцюведть трваса.31Израилень ломаттне няезь оцю вийть, конань Азорсь нолдазе тевс египтяттнень каршес, и ломаньтналсь пелезевсь Азорть эзда и кармась кемама Тейнза и Сонь покодиенцты Моисеенди. Эста Моисей Израилень ломаньтналть мархта марса моразь Азорти тя мороть, и корхтасть:
*а 14:8 али: Израилень ломаньтналсь мольсь Азорть сери кяденц ала.
Глава 14