Выбрать язык
Книги Ветхого Завета
Книги Нового Завета
с русским текстом1Моисей ванць учат Иофор атявозенц, Мадиамонь озксвятить, ширеса. Весть Моисей панезень учатнень ичкози шавмодав и пачкодсь Шкайть пандонцты Хориву.2Тоса Азорть ангелоц эвондась тейнза толгяльса, кона лисендсь кусторксста. Моисей няезе: кусторкссь юрнай толса, но сонць кусторкссь аф палы.3Моисей мярьгсь эсь пачканза: «Молян ванца тя оцю дивать, мес кусторкссь аф палы».4Мзярда Азорсь няезе, Моисей сай ванома, Сон пшкядсь тейнза кусторксть потмоста, мярьгомок: «Моисей! Моисей!» Сон мярьгсь: «Мон тясан!»5Шкайсь мярьгсь: «Тят малаткшне сей! Каяйть пильгстот карьсембяльхнень, сяс мес вастсь, конань лангса тон ащат, иняру*а».6И нинге мярьгсь: «Мон аляцень Шкаецан, Авраамонь Шкаецан, Исааконь Шкаецан и Иаковонь Шкаецан». Моисей кяшезе шаманц, сяс мес пельсь варжакстомс Шкайть лангс.
7Азорсь мярьгсь: «Мон няине, кода ломаньтналозе маятай Египетса и кулине, кода сон куфци люпштаензон кядяла. Мон содасайне сонь ризфонзон.8Тянкса мон валгонь и молян нолдамост синь египтяттнень кядялда, лихтемост ся модаста цебярь и кели модас, коса шуди лофца и медь, ханаанейхнень, хеттейхнень, аморрейхнень, ферезейхнень, евейхнень и иевусейхнень модазост.9И вага, Израилень ломаньтналть ювадемац пачкодсь ни Монь пилезон, и Мон няйса, конашкава пяк египтяттне люпштайхть эсост.10Эрь, архт: Мон кучте тонь фараонти; лихтьк Египетста Монь ломаньтналозень, Израилень ломаттнень».11Моисей мярьгсь Шкайти: «Киян мон тяфтамсь – молемс фараонти и лихтемс Египетста Израилень ломаньтналть?»12Шкайсь мярьгсь: «Мон улян мархтот. Тя Мон кучте тонь. И тянь няфтеманкса, вага, Мон максан тейть тяштькс: мзярда тон лихтьсак ломаньтналть Египетста, тинь сюконятада Шкайти тя пандть лангса».
13Моисей мярьгсь Шкайти: «Мзярда мон саян Израилень ломаньтналти и азса тейст: "Алянтень Шкайсна кучемань монь тейнть", а синь каршезон мярьгихть: "Кода Сонь лемоц?", эста мезе тейне азомс тейст?»14Шкайсь мярьгсь Моисеенди: «Мон Ся, кие Фалу Ули»*б. И нинге мярьгсь: «Тяфта азк Израилень ломаньтналти: "Фалу Улись кучемань монь тейнть"».15Шкайсь нинге мярьгсь Моисеенди: «Тяфта мярьк Израилень ломаньтналти: "Азорсь, тинь алянтень Шкайсна – Авраамонь Шкаец, Исааконь Шкаец и Иаковонь Шкаец кучемань монь тейнть". Тя Монь лемозе*в пефтома пингс, и тя лемса кармайхть лемнемон юромста юромс.16Архт кочкайть Израилень оцюнятнень и мярьк тейст: "Азорсь, алянтень Шкайсна – Авраамонь, Исааконь и Иаковонь Шкайсна эвондась тейне и мярьгсь: Мон няине, мезе мархтонт тиендихть Египетса, и сань лездома тейнть.17Мон лихттядязь тинь Египетонь люпштамада ся модав, коса эряйхть ханаанейхне, хеттейхне, аморрейхне, ферезейхне, евейхне и иевусейхне, модав, коса шуди лофца и медь".18Израилень оцюнятне кулхцондсазь сянь, мезе тон азат. Эста тон и Израилень оцюнятне марса моледа Египетонь оцязорти и мярьгода тейнза: "Азорсь, еврейхнень Шкайсна, эвондась тейнек. Сяс нолдамасть минь колма шинь кис шавмодав озксказнень кандома Азорти, эсь Шкаеньконди".19Но Мон содаса: Египетонь оцязорсь аф нолдатядязь тинь шавмодав, кда сонь аф кошардомс вии кядьса.20Сяс Мон венептьса кядезень и эрьхтьса Египетть сембе Эсь дивань тевнень*г мархта, конатнень тисайне тоса. Тяда меле Египетонь оцязорсь нолдатядязь тинь.21Мон ладясайне египтяттнень седиснон кельгозь тя ломаньтналти, и мзярда тинь тутада, тутада аф шавонь кятть:22эрь авась анай шабранц кядьста и кудсонза эряй авать кядьста сиянь и зрнянь паршихть и щапт. Ня щапнень тинь щафтсасть эсь цёрантень и эсь стирентень лангс, и тяфта лихтьсасть египтяттнень козяшиснон».
*а 3:5 иняру – святой
*б 3:14 Евреень кяльса: «ЙХВХ» – «Мон Ся, киян Мон». Тяса Шкайсь панчсесы Моисеенди Эсь лемонц. Тя лемть смузец «Мон Фалу Улян», и сяс мзярда Шкайсь корхтай Эсь колганза, тя няфнесы: Шкайсь фалу ульсь и ули. Сон тиезе сембе масторлангонь и менелень перьфпяльть и семботи макссь эряф, но Сонцень Шкайть аш ушетксоц и аш пец. Тяфта жа Сонь лемоц лятфнесы тейнек: Шкайсь фалу мархтонк и Сонь мялец лездомс тейнек. Сяда тов тя валсь ётафневи кода «Азор».
*в 3:15 Шкайть лемоц: Фалу Улись
*г 3:20 дивань тев – чудо
Глава 3