Выбрать язык
Книги Ветхого Завета
Книги Нового Завета
с русским текстом1Иаков тердезень эсь цёранзон и мярьгсь: «Кочкавода марс, и мон азса тейнть, мезе ули мархтонт сай пинкнень.2
Сада марс и кулхцондость,
Иаковонь цёранза, кулхцондость эсь алянтень – Израилень.
3Рувим, монь васень цёразе!
Тон монь кемошизень и алянь виезень васень иможец,
тон васенцесь – питне коряс,
васенцесь – вий коряс.
4Но тон улеть аф кирдеви, кода ведь, и сяс оду аф улят васенцекссь,
сяс мес тон кеподеть аляцень удома вастонц лангс;
визьксфтома тевса гастяйть монь мадома вастозень, кеподемок лангозонза*а.
5Симеон и Левий браттне,
синь торсна – аф ужяльдезь шави тюрембяль.
6Монь ваймозе аф кирдьсыне синь мяльснон-арьсемаснон,
монь седиезе аф сотф синь пуромксснон мархта.
Вдь синь кяжда шавозь алять,
эсь мяльснон коряс керозь букать санонзон.
7Сюдоф синь кяжсна, сяс мес сон пяк казяма,
сюдоф синь пялясшисна, сяс мес сон аф ужяльди.
Мон аф максан тейст эряма васта, кода Иаковонь лия цёранзонды,
Мон срафтсайне синь Израилень цёранзон ёткса.
8Иуда! Тонь шнатядязь-кепоттядязь браттне.
Тонь кядце душматтнень сялдазснон лангса.
Тейть сюконяйхть аляцень цёранза.
9Иуда – од лефсь,
монь цёразе, стясь кундафть сивомда меле;
Сон кирендсь и велясь, кода леф,
кода авалеф: кие смендай стяфтомс сонь?
10Оцязоронь байдексь аф прай Иудань кядьста,
оцязорксшинь мандось аф сявови сонь плманжанзон ёткста,
мзярс аф сай байдекть Азороц*б,
Ся, конань кармайхть кулхцондомонза ломаньтналхне.
11Сон сотсы ишимонц виноградонь кусторксти,
ишимвашенянц виноградть инь цебярь тарадонцты.
Сон муськсы эсь щамонц винаса,
панаронц виноградонь кярьмаснень версост.
12Сонь сельмонза пиндолдыхть винать эзда,
сонь пеенза акшет лофцть эзда.
13Завулон кармай эряма оцюведть трваса,
оцю венчнень лотксема вастснон маласа.
Сонь эряма вастоц таргави Сидонть самс.
14Иссахар – таза ишим,
кона веляф ведь шудерькснень ёткса*в.
15Сон няезе: ваймама вастсь пяк пара
и модась цебярь,
и комафтозень лафтунзон канксонь каннемс
и тиевсь урекс.
16Дан кармай судендамонза эсь ломаньтналонц,
кода Израилень юропнень эзда фкясь.
17Дан кармай куйкс ки лангса,
пупай куйкс ян лангса.
Сон пупасы алашать пильгс,
и ластясь прай копоренц лангс.
18Азор, Тонь идемацень лангс мон надиян!
19Гадонь кармайхть люпштамонза салайхне-шавихне,
но сон люпштасыне синь мельгаст молезь.
20Асиронь кшидонза ули вельф лама,
сонь танцти ярхцамбяленза улихть кода оцязоронь шраста.
21Неффалим – сярда ваз, кона ласьконди воляшиса
и канни мазы лефкст*г.
22Иосиф – иможень канды шуфтть тарадоц;
иможень канды шуфтть тарадоц, кона касы лихтибрять ваксса.
Сонь тарадонза куцихть стенать вельхкска.
23Налса ляцендихне ласьфнезь сонь,
синь ляцендсть лангозонза и люпштасть эсонза,
24но сонь налса ляцемац лядсь тангода
и кяденза вишкт
Иаковонь Вии Шкаенц кядензон вельде,
Ваныть, Израилень Кемошить, лемонц вельде.
25Катк аляцень Шкаец лезды тейть,
катк Сембонь Кирдись бславатанза тонь
вярдень менельть бславамасонза,
алдонь потмаксфтома томбать бславамасонза,
потяфтомань и шачфтомань бславамаса.
26Аляцень бславаманза сяда оцюфт кунардонь панттнень бславамаснон коряс
и пефтома пингонь панда прятнень козя казнеснон коряс.
Катк синь улихть Иосифонь прясонза,
браттнень ёткста кочкафть конясонза.
27Вениамин – кяжи врьгаз,
шобдава сон кармай кундафонц порема,
а илять кармай явондомонза кундафть».
28Тя Израилень сембе кемгафтува юромонза. И тя ся, мезе азсь тейст алясна, мзярда бславазень синь. Сон макссь эрти бславама, эрти сонценнеть.
29Иаков макссь тейст кошаркс: «Курок мон туян эсь атянь-атяненди. Калмамасть монь атянень мархта кевботмарса, кона хеттеень Ефронть паксясонза.30Ся кевботмарсь Мамреть ваксса Ханаанонь модаса, Махпелань паксясонза, конань Авраам рамазе эстейнза хеттеень Ефронть кядьста эсь ломанензон калмосемс.31Тоза калмазь Авраамонь и Сарра рьванц; тоза калмазь Исааконь и Ревекка рьванц; и тоза мон калмайне Лиянь.32Тя паксясь и кевботмарсь, кона лангсонза, рамафт хеттейхнень кядьста».
33Мзярда Иаков шумордазе цёранзонды кошарксонь максоманц, сон кеподезень пильгонзон вастонц лангс. Тяда меле сон кулось и тусь эсь атянь-атянзонды.
*а 49:4 1 Моис. 35:22; 3 Моис. 18:8
*б 49:10 Синодальнай ётафтомаса: мзярс аф сай Сетьмошинь Ладяйсь.
*в 49:14 али: кафта кяскавонзон ёткса.
*г 49:21 Тя вастсь шарьхкодеви тяфтавок: «...кона азонды мазы валхт» али «Неффалим пяк оцю тума, конань мазыхть тарадонза».
Глава 49