Выбрать язык
Книги Ветхого Завета
Книги Нового Завета
с русским текстом1Иосиф лаподсь алянц шаманцты, авардсь вельхксонза и палсезе сонь.2Иосиф макссь кошаркс эсь покодиензонды – пчкафтыхненди, вадемс алянц ронгонц вадембяльса, кона ванфтсы сонь наксадомада; и пчкафтыхне вадендезь Израилень вадембяльса.3Тянди ётась нильгемонь ши, сяс мес тняра ши эрявсь ловажать вадендемс. Египетонь ломаттне явсезь сонь сизьгемонь ши.
4Мзярда явсемань пингсь аделавсь, Иосиф мярьгсь фараонть кудвятиензонды: «Кда тинь мяленте ладяфт тейне, эста азость фараонти тяфта:5алязе сявсь кядьстон вал, мярьгомок: "Мон кулома лангсан. Калмамак монь ся калмоса, конань мон аноклайне эстейне Ханаанонь модаса". Нолдамак, мон молян алязень калмама, а меле мрдан меки».6Фараонць мярьгсь: «Архт и калмак аляцень, кода тон варать тейнза».
7Иосиф тусь алянц калмама. И мархтонза тусть фараонть сембе покодиенза, кудонь оцюнянза, Египетонь масторть сембе оцюнянза,8Иосифонь сембе кудоц, брадонза и алянц кудоц. Аньцек идьснон, учаснон, сяваснон, траксснон и букаснон синь кадозь Гесемса.9Тяфта жа Иосифонь мархта мольсть крандаст и алашаса ластя ардыхне. Иосифонь мархта молида ульсь пяк лама.10Синь пачкодсть Горен-гаатадав, кона Иорданть омба трвасонза, и кеподсть тоса пяк оцю авардема. Сисем шит Иосиф явсезе эсь алянц.11Мзярда тона модань ломаттне, ханаанейхне, няезь явсемать Горен-гаатадса, синь мярьгсть: «Египетонь ломаньтналса оцю ризф». Сяс тя вастсь лемтьф Авел-Мицраимкс – «Египетонь ломаньтналть ризфоц». Тя вастсь Иорданть омба ширесонза.
12Иаковонь цёранза тисть аляснон мархта стане, кода сон кошардозень синь.13Цёранза кандозь сонь Ханаанонь модав и калмазь кевботмарса, кона ащи Махпела паксяса. Тя паксять Авраам рамазе хеттеень Ефронть кядьста эсь ломанензон калмосемс. Тя вастсь аф ичкозе Мамреть эзда.
14Алянц калмамда меле Иосиф мрдась Египету: сонць, брадонза и сембе, кит якасть мархтонза алянц калмама.
15Мзярда Иосифонь брадонза няезь: алясна кулось, синь мярьгсть: «Кода улемс, кда тяни Иосиф шарфтсы эздонк шаманц и пандсы тейнек сембе ся кяжть, конань минь тиеськ тейнза?»16И синь кучсть азомс Иосифонди: «Аляце куломда инголе мярьгсь азомс тейть:17"Тяфта мярьгода Иосифонди: эняльдян, нолдак браттненди муворшиснон и пежеснон, конас синь сувасть, мзярда тяфта кальдявста тисть тонь мархтот". И тяни нолдак муворшить аляцень Шкаенц покодиензонды». Иосиф авардсь, мзярда тейнза азозь ня валхнень.
18Сяльде састь синць браттне, прасть инголенза модать лангс и мярьгсть: «Вага, минь тонь уретне».19Но Иосиф мярьгсь: «Тяда пеле! Мон вдь аф Шкаян.*а20Тинь арьседе тиемс тейне кяж, но Шкайсь шарфтозе тянь паронди. Сонь мялецоль тиемс сянь, мезе тяни ули: ванфтомс ламодонга лама ломаттнень эряфснон.21Сяс тяда пеле: мон карман трямонт тинь, идентеньге». Тяфта сон озафтозень синь седиснон и корхнесь мархтост ляпоста.
22Иосиф и сонь алянц юромоц лядсть эряма Египетса. Иосиф марнек эрясь сяда кемонь киза.23Тейнза максфоль няемс Ефремонь идензон, синь унокснон и уноконь-унокснон. Тяфта жа Махиронь, Манассиянь цёранц, иденза лувовсть идькс Иосифонди.24Иосиф мярьгсь брадонзонды: «Мон кулома лангсан, но Шкайсь сай тейнть и лихттядязь тинь тяста ся модати, конань колга Сон варась Авраамонди, Исааконди и Иаковонди».25Иосиф сявсь Израилень цёратнень кядьста вал, мярьгомок: «Мзярда Шкайсь сай тейнть, эста лихтесть тяста монь пакарнень».
26Иосиф кулось, мзярда тейнза ульсь сяда кемонь киза. Сонь вадезь вадембяльса и путозь лазксс Египетса.
*а 50:19 Синодальнай ётафтомаса: Мон пелян Шкайть эзда.
Глава 50