Выбрать язык
Книги Ветхого Завета
Книги Нового Завета
с русским текстом1Шкайсь мярьгсь Иаковонди: «Стяк и архт Вефили, эряк тоса и тик тоса алтарь Шкайти, кона эвондакшнесь тейть, мзярда тон ласькоть Исав брадцень эзда».2Иаков мярьгсь кудэряензонды и сембонди, кит ульсть мархтонза: «Ёрдасть аф афкуксонь шкайхнень, конат тинь улихть, аруяфтость прянтень и полафтость щамонтень.3Эрьда стятама и тутама Вефили. Тоса мон тиян алтарь Шкайти, кона кулемань монь, мзярда тейне пяк стакаль, и кона ульсь мархтон ки лангсон, куваня мон якань».4Эста синь максозь Иаковонди сембе аф афкуксонь шкайхнень, конат ульсть кядьсост, и пильксснон, конат ульсть пилесост, и Иаков калмазень синь тума ала, кона Сихемть маласоль.
5Тяда меле синь тусть. Сембе маластонь ошнень фатязень Шкайда пелема, и кивок ашезь карма ласькома Иаковонь цёранзон мельге.6Иаков и сембе мархтонзотне састь Лузу, лиякс мярьгомс, Вефили, кона Ханаанонь модаса.7Сон тись тоса алтарь и макссь ся вастти лем – Эл-Вефиль*а, вдь тоса тейнза эвондакшнесь Шкайсь, мзярда сон ласьксь брадонц эзда.8И тоса кулось Девора, Ревеккань потяса андыец. Сонь калмазь Вефильть маласа, тума ала, конань Иаков лемдезе авардемань тумокс.
9Иаковонь Месопотомияста мрдамдонза меле, Шкайсь тага эвондась тейнза и бславазе сонь.10Шкайсь мярьгсь тейнза:
«Тонь лемце Иаков, но тячиень шиста сявомок
тон аф кармат каннема лем Иаков,
но тонь лемце кармай Израиль».
И лемдезе сонь Израилькс.11Шкайсь мярьгсь тейнза:
«Мон Сембонь Кирди Шкайсь.
Шачфнек итть и ламолготт.
Тонь эздот лиси ломаньтнал, пяк лама ломаньтналда,
и оцязорхт шачихть тонь эздот.
12Модать, конань Мон максыне Авраамонди и Исааконди,
Мон максса тейть и тонь юромонь поладыхненди».
13Сяльде Шкайсь тусь эздонза, ся вастста, коса корхтась мархтонза.14Иаков путсь мялямгев ся вастти, коса Шкайсь корхтась мархтонза. Сон каясь лангозонза симомань озксказнекс вина и вай.15Вастть, коса Шкайсь корхтась мархтонза, Иаков лемдезе Вефилькс.
16Сяда меле синь тусть Вефильста. Мзярда нинге ляткшнесь аф оцю ки Ефрафань модати, Рахиль ушедсь шачфнема, и шачфнесь пяк стакаста.17Мзярда Рахиль пяк маятась шачфтомста, бокон соты авась*б мярьгсь тейнза: «Тят пеле, сяс мес тянивок тон шачфтат цёра».18Мзярда Рахиль ни кулома лангсоль, ваймонц мекольце таргамста, сон лемдезе цёранять Беноникс*В. Но аляц лемдезе сонь Вениаминкс*г.19Рахиль кулось, и сон калмафоль ки лангса, кона вятсь Ефрафав, лиякс, Вифлеему.20Калмонц лангс Иаков путсь мялямгев. Рахилень калмонц лангс путф мялямгевсь тянемс ащи тоса.
21Израиль*д тусь сяда тов и стяфтозе кошенц Гадер башнять фталу.22Мзярда Израиль эрясь ся модаса, Рувим мольсь и удось Валлань, алянц омба рьванц, мархта, и тя пачкодсь Израиленди.
Иаковонь ульсь кемгафтува цёрац.23Лиянь цёранза ульсть Рувим, Иаковонь васень цёрац, мельганза Симеон, Левий, Иуда, Иссахар и Завулон.24Рахилень цёранза ульсть Иосиф и Вениамин.25Валлань, Рахилень авауренц, цёранза ульсть Дан и Неффалим.26Зелфань, Лиянь авауренц, цёранза ульсть Гад и Асир. Нят Иаковонь цёранза, конат шачсть тейнза Месопотамияса.
27Иаков сась Исаак алянцты Мамрев, Кириаф-Арбав, лиякс мярьгомс, Хеврону, коса Авраам и Исаак эрясть кода ширде саф ломатть.28Исаак эрясь сяда кафксогемонь киза.29Меле сон нолдазе ваймонц и кулось. Исаак тусь эсь атянь-атянзонды, улемок пяк сирекс и топодемс эряйкс. Исав и Иаков цёранза калмазь сонь.
*а 35:7 Эл-Вефиль ётафневи кода «Вефилень Шкай».
*б 35:17 бокон соты ава – повитуха, пуповязница; акушерка
*в 35:18 Бенони лемть смузец – «маятамань цёразе».
*г 35:18 Вениамин лемть смузец – «види кядень цёразе, павазонь цёразе».
*д 35:21 Израиль – тя Иаковонь лия лемоц. Ванк: 32:28, 35:10.
Глава 35