Выбрать язык
Книги Ветхого Завета
Книги Нового Завета
с русским текстом1Иаков поладозе эсь кинц, и Шкаень ангелхне васьфтезь сонь.2Няемстост, Иаков мярьгсь: «Тя Шкаень ушмовий», и лемдезе ся вастть Маханаимкс*а.
3Иаков эстедонза инголи кучсь кулянь пачфтихть Исав брадонцты, Сеир модав, Едомонь масторти.4Сон кошардозень синь, мярьгомок: «Тяфта мярьгода монь азорозти Исавонди: "Вага мезе корхтай тонь покодице Иаков: Мон эрянь Лаванонь ширеса и тя пингс улень тоса.5Монь улихть букане и ишимне, учане и сяване, аляурене и аваурене. Мон сянкса кучине тейть, азорозти, тя кулять эсь колган, васьфтелемайть пара мяльса"».6Кулянь пачфтихне мрдасть Иаковонди и мярьгсть: «Минь якаме тонь брадцти Исавонди. Сон моли каршезт, и мархтонза ниле сятт ломань».7Иаков пяк эводсь и сонь пянкштадсь седиец. Сон явфтозень кафтова ломаттнень, конат мархтонзотольхть, тяфта жа учатнень-сяватнень, тракснень-букатнень и верблюттнень,8сяс мес арьсесь: «Кда Исав врьгяти фкятнень лангс и шавсыне синь, эста омбоцетне ворьгодевихть».
9Иаков мярьгсь: «Алязень Авраамонь Шкаец и алязень Исааконь Шкаец, Азорсь, кона мярьгсь тейне: "Мрдак эсь модазт, эсь тналонь ломаттненди, и Мон карман тейть паронь тиема!"10Тейне ашель мезенкса максомс сембе ся паротнень и видешинь тефнень, конатнень Тон тиить Эсь покодицти. Мон ётайне тя Иорданть фкя байдек мархта, а тяни монь ломаньдон и жуватадон сяшкава лама, нльне кафтова явфтыне синь.11Араламак монь Исав брадозень кядьтонза. Мон пелян: сон сай и шавсамань моньге и тядятненьге идьснон мархта.12Вдь Тон мярьготь: "Мон карман тейть паронь тиема и тисайне тонь юромонь поладыхнень оцюведень шуварть лаца, кона аф лувови, сяс мес эздонза пяк лама"».
13Иаков ётафтозе тоса ся веть, а меле кочкась эсь уликсонц эзда казне Исав брадонцты:14кафта сятт сява, комсь атясява, кафта сятт уча, комсь боран,15колмогемонь потяфты аваишим вашеняснон мархта, нильгемонь тракс, кемонь букат, комсь аваишим и кемонь атяишипт.16Сон максозень синь эсь покодиензонды, эрти башка стада, и мярьгсь тейст: «Моледа инголен и кирдеда ётка стадатнень ёткса».17Васенцекс молити сон мярьгсь: «Мзярда брадозе Исав васьфттянза тонь и кизефттянза: "Киннят тон, ков молят и кинь стаданза молихть инголет?",18эста азк: "Иаков покодицень. Ня стадатне кучфт казнекс Исав азорозти, сонцьке Иаков моли мельганк"».19Сякоть сон азозе омбоце молити, колмоцети и сембонди, кит панцть стадат. Сон мярьгсь: «Тяфта мярьгода Исавонди, мзярда васьфтьсасть сонь.20Нинге азость тейнза: "Вона, Иаков покодице моли мельганк"». Иаков арьсесь эсь пачканза: «Пади казнетнень вельде, конатнень мон кучине эстедон инголи, ляпоми Исавонь седиец и сон пара мяльса васьфтьсамань монь».21Тяфта, Иаковонь казненза ульсть кучфт инголи, а сонць Иаков лядсь лоткама вастс*б вень ётафтома.
22Ся веня Иаков стясь, сявозень кафцьке рьванзон, кафта аваурензон и кефкие цёранзон и ётазе Иавок ляйть маця вастова.23Сон ётафтозень синь ляйть тона ширезонза, и ётафтозе тов сембе уликс-паронц, конац сонь ульсь.24И вага, Иаков лядсь ськамонза, и Кати-кие валдашкодомать самс тюрсь мархтонза.25Няемок, Иаков Тейнза аф сяськови, Сон эрьхтезе Иаковонь сюрок ланга и сязезе сюроконь эзненц*в, мзярда Иаков тюрсь мархтонза.26И мярьгсь: «Нолдамак Монь, сяс мес валдашкоткшни». Иаков мярьгсь: «Аф нолдате Тонь, мзярс аф бславасамак».27Сон мярьгсь Иаковонди: «Кода тонь лемце?» Ся каршезонза мярьгсь: «Иаков».28Эста Сон мярьгсь тейнза: «Тячиень шиста тонь лемце аф Иаков, а Израиль*г, сяс мес тон тюреть Шкайть мархта и ломаттнень мархта, и сяськоть».29Иаков кизефтезе Сонь: «Азк, кода Тонь лемце?» Сон мярьгсь: «Мезенди тон кизефнесак Монь лемозень?» И Сон бславазе тоса Иаковонь.
30Иаков макссь ся вастти лем Пенуэл*д, сяс мес сон корхнесь: «Мон шамада шамас няине Шкайть, и лядонь шиса».31Мзярда шись кеподсь, Иаков ётнезе Пенуэлть шамордозь фкя пильгонц лангс.32Тянкса Израилень ломаттне тянемс аф ярхцайхть ся санда*е, кона сюроконь пукшеса, сяс мес Иаковонь мархта Тюрись эрьхтезе Иаковонь сюроконь санть ланга.
*а 32:2 Маханаим валть смузец – «кафта ушмовийхть» али «кафта лоткама вастт».
*б 32:21 лоткама васта, ломаньтналть лоткама вастоц – стан, лагерь
*в 32:25 эзне – сустав
*г 32:28 Израиль валть смузец – «тюремс Шкайть мархта».
*д 32:30 Пенуэл валть смузец – «Шкайть шамац».
*е 32:32 сан – сухожилие, связки
Глава 32