Bible Stories
Выбрать язык
Choose Old Testament Story
Choose New Testament Story
ИЕРУСАЛИМЛЭСЬ БОРДДОРЪЁССЭ ӜУТОН
Иерусалимысь Персияе вуиз одӥг иудей. Персиялэн Артаксеркс эксэйлэн юртэныз кивалтӥсьёс пӧлысь одӥгез, Неемия нимо еврей пи, солэсь юалляськиз Иерусалиме кылем иудейёс сярысь. Со мурт Неемиялы тазьы вераз: «Пленэ нуытэк, отчы кылем еврейёс туж курадӟыса уло. Иерусалимлэн борддорез куашкатэмын, капкаосыз сутэмын». Таӵе ивор кылыса, Неемия пуксиз но бӧрдыны кутскиз. Кӧня ке но нунал со ӝожомыса улӥз, визяз. Инмысь Инмарлэсь вӧсяськыса куриз, Артаксеркс эксэй сое, Иерусалиме мыныса, городлэсь борддоръёссэ ӝутыны мед лэзьысал шуыса.
Артаксеркс эксэй Неемияез Иерусалиме мыныны лэзиз. Неемия израиль калыкен ӵош куашкатэм борддоръёсты, капкаосты тупатъяны кутскизы. Та сярысь израиль калыклэн тушмонъёсыз кылӥзы но, кышкатыса люкетыны выризы та ужез нуыны. Нош Неемия калыксэ пыӵал тӥрлык кутытӥз. Адямиос пал киынызы борддор тупатъянэ из нуллӥзы, мукет киязы шибоды возизы, нош лэсьтӥськисьёслэн бордазы мечъёссы вал. Озьы соос ужазы. Уй но нунал тыршизы. Инмарлэн киыз лэсьтӥськисьёсты утьыса возиз. Вавилон ожгарчиос Иерусалимез куашкатэм, сутэм бере, сю ньыльдон ар ортчыса, борддоръёс нош ик тупатэмын, ӝутэмын вал.
Сизьыметӥ толэзь вуэм бере, одӥгтэм вань калык кар падвоже (площаде) люкаськиз. Книга тодӥсь Ездраез калык куриз Моисей законэн книгаез вайыны. Ездра священник законэн книгаез ваиз но ӵук ӟардонысен нуназе шорозь вань люкаськем пиосмуртъёс, кышномуртъёс – ваньмыз азьын, кин валаны быгатэ, чирдӥз со книгаез. Калык туж сак кылзӥськиз. Ездра Кузё-Инмарлы, быдӟым Инмарлы, тау карон кылъёс вераз, нош калык, кизэ вылэ ӝутыса, «Аминь, аминь» шуиз. Пыдесъяськыса, ымныр вылазы выдыса, Кузё-Инмарлы тау каризы.
Неемия, 1-тӥ – 8-тӥ люкетъёс
246 
