Choose Language
Old Testament Books
New Testament Books
1Ахалиялэн Неемия пиезлэн кылъёсыз. Кислев толэзе, кызетӥ арын, мон Сузы шоркарын вал.2Агай-вынъёсы пӧлысь одӥгез, Ханани нимоез, Иудеяысь лыктӥз, соин ӵош кӧня ке мурт вал. Соослэсь мон улэп кылем иудейёс сярысь юай, кинъёсты пленэ ӧз нуэ, озьы ик Иерусалим сярысь но юай.3Соос мыным шуизы: «Пленэ нуытэк кылемъёс ас шаеразы ик уло, туж ёрмыса-ӝикаса уло, соосты ултӥяло; Иерусалимлэн борддорез куашкатэмын, солэн капкаосыз тылын сутэмын».
4Та кылъёсты кылэм берам мон пукси но бӧрдыны кутски, кӧня ке нунал ӝожомыса ветлӥ, визяй, Инмысь Инмар азьын вӧсяськи но5шуи: «Инъёслэн Инмарзы Кузё-Инмар, быдӟым но кышкыт Инмар, сӥзён-косонэз утись, Тонэ яратӥсьёслы, Тынэсьтыд курон-косонъёстэ быдэсъяса улӥсьёслы гажан-жаляндэ возьматӥсь!6Пельёсыд сакесь мед луозы, синъёсыд усьтэмын, Ас ляльчиедлэсь вӧсяськемзэ кылон понна табере мон уй но нунал Израильлэн пиосыз, Тынад ляльчиосыд пумысен вӧсяськисько, израиль пиослэн сьӧлыкъёссы понна ӧпкелисько, Тон азьын ми сьӧлыкамы, сьӧлыкамы – мон но, атаелэн выжы-кумыез но.7Тон азьын ми йыруж лэсьтӥсьёс луимы, курон-косонъёстэ ӧм уте, пуктон-косонъёстэ, законъёстэ но, кудъёссэ Тон Ас ляльчиедлы, Моисейлы, сӥзид.8Ас ляльчиедлы, Моисейлы, сӥзьыса, тазьы верам кылдэ тодад вай: ”Тӥ йыруж лэсьтӥсьёс луиды ке, Мон тӥледыз мурт калыкъёс пӧлы пазьго.9Нош Мон пала берытскиды ке, Мынэсьтым курон-косонъёсме утиды ке, быдэсъяды ке, инлэн пумаз ке но тӥ уллямын луиды, отысь Мон тӥледыз люкало но Аслам быръем интыям ваё отчы Аслэсьтым нимме юнматон понна”.10Соос уго Тынад ляльчиосыд, Тынад калыкед, Аслад туж бадӟым кужыменыд, Аслад кужмо киыныд Тон соосты мозмытӥд.11Кузё-Инмаре, Тонэ тэльмырыса курисько: Ас ляльчиедлэсь вӧсяськемзэ кылыны пельыд сак мед луоз, Ас ляльчиосыдлэсь вӧсяськемзэс кыл, соос Тынад нимыдлэсь кышкаса-куалекъяса улыны ярато. Али нош Ас ляльчиедлы ӟеч мылкыддэ возьматы, та адямилэн (эксэйлэн) гажан-жалян пӧлаз пырты».
Мон эксэй дорын вина омыръясь вал.
Глава 1
