Bible Stories
Выбрать язык
Choose Old Testament Story
Choose New Testament Story
КАЛЫК ИНМАРЛЫ ВАЗИСЬКЕ
Та толэзьлэн кызь ньылетӥ нуналаз ваньзы израиль пиос огазе люкаськизы; соос визяса (кӧс утьыса), чурыт, бышкись дӥськут дӥсяса, йыр вылазы пень пызьнаса улӥзы. Израиль пиос мурт калыкъёс пӧлысь люкиськизы. Асьсэлэн но, атайёссылэн но йыружъёссы понна ӧбкельыса сьӧлыкъёссылэсь куштӥськизы. Ас интыязы сылыса, нуналлэсь ньылетӥ люкетсэ Инмарзылэсь Кузё-Инмарлэсь закон книгазэ лыдӟыса ортчытылӥзы, нош ньылетӥ люкетсэ – сьӧлыкъёссэс вераса, Инмарзы Кузё-Инмар азьын вӧсяськыса. Ӝужыт интыын сылӥзы Иисус, Вания, Кадмиил, Шевания, Вунний, Шеревия, Вания, Хенани нимо левитъёс. Соос бадӟым куараен Инмарзылы Кузё-Инмарлы вазиськылӥзы. Левитъёс шуизы: «Султэлэ, пумтэм вапумъёс ӵоже Инмардэс Кузё-Инмарез данъялэ. Бакельлыко Тынад, Кузё-Инмаре, нимыд, вань данъян, ушъян кылъёслэсь но со вылӥын! Тон, Кузё-Инмаре, – одӥг, Тон сяна, мукет инмаръёс ӧвӧл. Тон инэз кылдытӥд, инъёслэсь инзэс но – мар отын вань; музъемез но мар отын вань, зарезез но мар отын вань. Тон ваньмызлы улон сётӥськод, ин кужымъёс Тыныд тэрытскыса уло».
Сьӧлыкъёсыз понна, Кузё-Инмар бордысь палэнскемез понна калык туж тэльмырыса ӧбкелиз но вӧсяськыса шуиз: «Али но, милям Инмармы, быдӟым, кужмо, кышкыт Инмармы, Аслэсьтыд сӥзёндэ утиськод, Ас калыктэ гажаськод-жаляськод! Тынад милемыз вӧсь каронъёсыд шонересь; милемыз шонер судить карид, ми янгышоесь. Соин ик ми гожтыса кыл сётӥськомы: Инмар законъя улыны, Солэсь вань курон-косонъёссэ, пуктон-косонъёссэ чакланы, утьыны. Ми улаз гожтӥськиськомы, со вылэ кивалтӥсьёсмы, левитъёсмы, священникъёсмы кизэс нюрто». Вылӥ кивалтӥсьёс та сӥзён улэ гожтӥськылӥзы но сое печатен юнматылӥзы. Вань калык, священникъёс, левитъёс, капка возьмасьёс, кырӟась-чирдӥсьёс – храмын вань ужась-тыршисьёс, та гожтэтэз кыл сётыса кабыл басьтӥзы.
Неемия 9:1-6; 9:32 - 10:30
248 
