Bible Stories
Выбрать язык
Choose Old Testament Story
Choose New Testament Story
ЕСФИРЬ – ЭКСЭЙ КЫШНО
Та уж тодмо луэм бере, Мардохей Есфирьлы косон ыстӥз: со эксэй доры мед мыноз но сюлворыса эксэйлэсь калыксэ утьыны мед куроз. Есфирь медоез пыр Мардохейлы ивор ыстӥз: «Эксэен ӧтьымтэ мурт пуш азбаре пыриз ке, солэн одӥг адӟонэз – кулон. Нош со муртлы эксэй зарни бодызэ мычиз ке, улэп кылёз». Со виын лек Аман, Мардохеез ошон понна, витьтон гырпум ӝужда ошет дасяса вуиз.
Куинь нунал ортчыса, Есфирь эксэй дӥськутсэ дӥсяса, пуш азбаре, эксэйлэн шутэтскон интыяз мынӥз. Эксэй Есфирьлы зарни бодызэ мычиз. Есфирь бодылэсь пумзэ кияз кутӥз но эксэез Аманэн ӵош куное ӧтиз. Эксэй Аманэн ӵош юон доры лыктӥзы. Мукетаз нуналэ но Есфирь эксэез Аманэн ӵошенназэс куное ӧтиз. Вина юыкузы, эксэй шуиз: «Есфирь, кыӵе тынад мылкыд каронэд? Кыӵе тынад куронэд?» Эксэй кышно шуиз: «Мылкыд каронэ – монэ улэп кельтэ, мынам куронэ – калыкме улэп кельтэ. Уго мон но, мынам калыке но виылон, быдтон понна вузамын». Озьы эксэй тодӥз кышноез еврей ныл луэ вылэм шуыса, валаз Аманлэсь кескич малпанзэ но. Эксэйлэн косэмезъя, Аманэз Мардохейлы дасям ошетэ ошизы.
Персияын улӥсь еврейёсты быдтон сярысь косонэз воштыны уг луы ни вал, уго со эксэйлэн нимыныз гожтэмын, солэн улаз эксэй чиньызэ нюртӥз. Но эксэйлэн косэмезъя, подъясьёс выль косон гожтӥзы: вань городъёсын улӥсь еврейёс огазе люкаськыса улонзэс утьыны быгато. Эксэйлэн сю кызь сизьым ёросъёсаз эксэй косонэз кутыса ворттӥзы шаплы валъёс вылын гожтэт нуисьёс; эксэй косонэз ёросэн кивалтӥсьёс кие сётӥзы. Еврейёсты утёнэз буре вайыса, Мардохей нимысьтыз праздник тупатӥз, со Пурим шуыса нимаське. Туннэ нуналъёсы но Адар толэзьлэн дас ньылетӥ, дас витетӥ нуналаз еврей калык та праздникез сӥё-дано пусъе.
Есфирь, 1-тӥ – 10-тӥ люкетъёс
244 
