Bible Stories
Выбрать язык
Choose Old Testament Story
Choose New Testament Story
ЕСФИРЬ – ЭКСЭЙ КЫШНО
Персиялэн Артаксеркс эксэез кышнояськыны малпаз. Быдэс Персияысь аслыз самой чебер кышно шедьтон понна, эксэйлыкезлэн вань палъёсаз нимысьтыз адямиосты ыстӥз. Со вакытэ Персияын трос вал еврей выжыысь потэм муртъёс.
Сузы карын улӥз Мардохей нимо иудей. Аслаз агаезлэсь Есфирь нимо нылзэ со ас дораз вордӥз. Чебер, веськрес мугоро со будӥз. Анаез, атаез кулэм бере, Мардохей сое дораз ныллы басьтӥз. Чебересь нылъёсты Сузы шоркаре люкамзы бере, эксэй юртэ Есфирь но сюриз. Вань нылъёс пӧлысь эксэйлы Есфирь кельшиз. Солэн йыр вылаз со эксэй изьы понӥз но эксэй кышно сое кариз. Мардохейлэсь верамзэ кылзӥськыса, кыӵе калык пӧлысь потэмзэ Есфирь нокинлы но ӧз вера.
Ӝоген кузёйыръёсыз пӧлысь одӥгзэ, Аманэз, эксэй вылэ ӝутӥз, вань кузёйыръёслы кивалтӥсь кариз. Эксэйлэн косэмезъя, эксэй юртын вань ужасьёс Аман азе пыдесъяськыса йыбырттылӥзы. Одӥг Мардохей гинэ со азе ӧз йыбыртты, ӧз пыдесъяськы. Соку Аман йырыз курен малпаз Артаксеркслэн эксэйлыкысьтыз вань иудейёсты быдтыны.
Артаксеркслы со шуиз: «Тынад эксэйлыкедлэн вань люкетъёсаз, ёросъёсаз пазьгиськыса улӥсь калык вань. Мукет калыкъёслэн законъёссы сярысь, соослэн законзы музон, эксэйлэсь законзэ соос уг быдэсъяло». Эксэй Аманлы луонлык сётӥз, та калыклы мар каремез потӥз, сое карыны. Артаксеркслэн эксэйлыкезлэн вань палъёсаз ворттыса кошкизы гожтэт нуисьёс. Отын таӵе косон гожтэмын вал: дас кыкетӥ толэзьлэн дас куинетӥ нуналаз виёно, быдтоно вань иудейёсты – пичиоссэ но, пересьёссэ но, пиосты но, кышноосты но, ваньбурзэс талано. Эксэй косон вуэм бере, иудейёс пӧлы туж бадӟым куректон-кайгу пыриз; визь (кӧс) утьыны, бӧрдыны, викышъяны кутскизы.
(кылемзэ учкы)
242 
