Choose Language
Old Testament Books
New Testament Books
[Быдӟым Артаксеркс кыкетӥ арзэ эксэйын пукыку, Нисан толэзьлэн нырысетӥ нуналаз Вениамин выжыысь Кисейлэн Семей пиезлэн Иаир пиезлэн Мардохей пиез уйвӧт адӟиз. Со иудей пи вал, Сузы карын улӥз, бадӟым санэн адями, эксэй юртын ужаса-тыршыса улӥз. Вавилонлэн Навуходоносор эксэез сое пленэ вайиз, со пленэ шедемъёс пӧлысь вал, Иерусалимысь Иудеялэн Иехония эксэеныз ӵош пленэ басьтэмын вал. Уйвӧтаз со тае адӟиз: шимес куара кылӥське, гудыръя, музъем зурка, музъем вылын куалекъян-бугыръяськон; тани, кык бадӟымесь кыйёс потӥзы, соос дась вал куспазы жугиськыны; шуш куараен соос вузӥзы, соослэсь вузэмзэс кылыса, вань калыкъёс ожмаськыны дасяськизы шонер улӥсь калыкез погыртон понна; но тани – тём-тём пеймыт, ӝомало нунал вуиз, туж бадӟым ӝожлыко, ӝикаса улон, курадӟон, куалекъян музъем вылэ вуизы; вань шонер улӥсь калык мар карыны паймиз, шугадӟонъёсты чиданлэсь кышкаса, соос кулыны дасяськизы но Кузё-Инмарлы тэльмырыса вазиськылӥзы; соослэн викышъяса бӧрдэмысьтызы, пичи ошмесысь кадь, туж трос вуо туж бадӟым шур кылдӥз; югытлык, шунды пиштыны кутскиз, соку зӥбыт-востэм улӥсьёс ӝутскизы но вылтӥяськисьёсты быдтӥзы. – Та уйвӧтэз адӟем бераз Мардохей сайказ но Инмарлэсь мар лэсьтыны малпамзэ, та вӧтаз адӟемзэ со сюлмаз возиз, но пеймыт луытозь солэсь вань чыры-пыры люкетъёссэ но валамез потӥз.
Мардохей эксэй юртын Гавафаен, Фарраен, эксэй юртысь сое возьмась кык евнухъёсын ӵош улӥз, соослэсь вераськемзэс кылӥз, малпанъёссэс чаклаз-эскериз но тодӥз, соос Артаксеркс эксэез быдтыны туртто шуыса. Та сярысь со эксэйлы ивортӥз, нош эксэй та кык евнухъёсты курадӟытыса кылзэс юаз. Малпам ужзэс шарае поттэмзы бере соосты виизы. Та ужъюгдурез эксэй ваньмызлы тодазы возьытон понна гожтӥз, Мардохей но та ужъюгдур сярысь аслыз гожтӥз. Эксэй Мардохеез ас юртаз ужаса-тыршыса улыны косӥз, ужез понна солы кузьымъёс сётӥз. Соку эксэй котырын нимо-дано Аман, Амадафлэн пиез, Вугей пи, бергаз, со эксэй юртысь кык евнухъёс понна Мардохейлы но, солэн калыкезлы но урод уж лэсьтыны тыршиз.]
1Ваньмыз та Артаксеркс дыръя вал, – та Артаксеркс кузёяськиз сю кызь сизьым улосвылъёсын, Индиысен кутскыса Эфиопияозь, –2Артаксеркс эксэй Сузы шоркарысь эксэй пуконын пукыкуз,3куинетӥ арзэ кивалтон вакытаз, со юондыр ортчытӥз, – вань кузёйыръёссэ, бордаз ужась-тыршисьёссэ люказ, Персиялэн, Мидиялэн армиенызы кивалтӥсь йыръёсты, аслаз улосвылъёсыныз кивалтӥсьёссэ ӧтчаз,4аслаз эксэйлыкысьтыз туж трос узырлык люкаськемез возьматъяз, аслэсьтыз мальдытӥсь быдӟымлыксэ трос нуналъёс – сю тямыстон нуналъёс ӵоже – возьматъяса улӥз.5Та нуналъёс йылпумъяськем бере Сузы шоркарын улӥсь калыкезлы – бадӟымезлы но, покчиезлы но – эксэй юртлэн садо азбараз эксэй сизьым нунал ӵоже юондыр ортчытӥз.6Нап-горд буёло етӥн шортлэсь пунэм гозыосын-калъёсын азвесь кульчоос борды тӧдьы, чагыр буёло ыжгон катанчиос юнматэмын вал. Соос мрамор излэсь пуктэм юбоос йылын ошиськыса улӥзы.7Зарнилэсь, азвесьлэсь лэсьтэм кыллён интыос вожпыръем изъёсын, мраморен, перламутрен, сьӧдпыръем изъёсын вӧлдэм выж вылын сылӥзы.8Юонъёсты зарни сосудысь, [куамын сюрс талант сылӥсь] пӧртэм пумо сосудъёсысь лэзьяллязы; эксэй туж узыр вал, солэн винаосыз но туж трос вал. Йӧно кариськыса юизы, нокин но кужмысь ӧз косылы, малы ке шуоно эксэй ас юртаз улӥсь вань кивалтӥсьёслы косон сётӥз, ваньмызлы эрик сётэмын мед луоз шуыса.9Эксэй кышно Астинь но Артаксеркс эксэйлэн юртаз кышномуртъёслы юондыр ортчытӥз.
10Сизьыметӥ нуналаз, вина юыса эксэйлэн сюлмыз шулдыр луэм бере, со Мегуманлы, Бизфалы, Харбоналы, Бигфалы, Авагфалы, Зефарлы, Каркаслы – Артаксеркс эксэй дорын ужаса-тыршыса улӥсь сизьым евнухъёслы – косон сётӥз:11Астинь эксэй кышноез, йыраз эксэй изьы поныса, эксэй азе калыкъёслы, кивалтӥсьёслы солэсь чеберлыксэ возьматыны мед, пе, ваёзы, уго со туж чебер вал.12Нош Астинь эксэй кышнолэн лыктэмез ӧз поты, эксэйлэсь евнухъёс пыр верам кылзэ санэ понэмез ӧз поты.13Эксэйлэн туж йырыз кур луиз, вожпотон пушказ ӝуатскиз. Валляна аръёсты тодӥсь визьнодчиослы эксэй вераз, – уго эксэйлэн ужъёсыз вань законэз но правоез тодӥсьёс азьын лэсьтӥськизы, –14со виын солэн матысь муртъёсыз вал: Каршена, Шефар, Адмафа, Фарсис, Мерес, Марсена, Мемухан – Персияысь, Мидияысь сизьым кивалтӥсьёс, соослы, эксэй азе капчиен пырыны быгатӥсьёслы, та эксэйлыкын нырысетӥ радъёсын пукылӥсьёслы, эксэй вераз:15«Законъя мар кароно эксэйлэн Астинь кышноеныз Артаксеркс эксэйлэсь евнухъёс пыр верам кылзэ санэ понымтэез понна?»
16Эксэй азьын, кивалтӥсьёс азьын Мемухан шуиз: «Эксэй азьын гинэ Астинь эксэй кышно янгыш ӧвӧл, со янгыш вань кивалтӥсьёс, вань калыкъёс азьын, Артаксеркс эксэйлэн вань улосвылъёсаз улӥсьёс азьын;17малы ке шуоно эксэй кышнолэн та ужез вань кышномуртъёс доры вуоз, соку соос кузпалъёссэс санэ понэмысь дугдозы но шуозы: ”Артаксеркс эксэй ас кышнозэ Астинез ас азяз вуттыны косӥз, нош со ӧз мыны”.18Табере Персияысь, Мидияысь кивалтӥсьёслэн кышнооссы эксэй кышнолэн та ужез сярысь кылозы но эксэйлэн вань кивалтӥсьёсызлы тазьы ик вераны кутскозы; кылзӥськытэк улонъёс, ӝоже усёнъёс трос луозы.19Эксэйлы ярамон ке, со эксэй пуктон-косонзэ мед гожтоз но сое Персия, Мидия кунъёслэн законъёсазы мед пыртозы, азьланяз со пуктон-косон медаз ни воштӥськылы, Астинь Артаксеркс эксэйлэн азяз уз ни пота шуыса, нош солэсь эксэй кышно луон данлыксэ эксэй мукетызлы, солэсь умойгес луисезлы сётоз.20Эксэйлэн та пуктон-косонэз потыса, солэн туж бадӟым, быдэс куназ вӧлмем бере вань кышномуртъёс асьсэлэсь картъёссэс, – узыресь-а вал соос, куанересь-а вал соос, – сӥлы карыса улыны кутскозы».
21Та кылъёс эксэйлы но, кивалтӥсьёслы но яразы; Мемуханлэсь верам кылзэ санэ поныса, эксэй та ужзэ лэсьтӥз.22Эксэй вань улосвылъёсаз та гожтэтэз келяз, котькудӥзлэн аслаз алфавитэныз, котькуд калыклэн ас кылаз берыктыса гожтэт гожъязы, отын верамын: котькудӥз но воргорон аслаз кышноезлы, семьяезлы кузё мед луоз, та сярысь котькуд адямилы анай кылыныз ялоно.
Глава 1
