Bible Stories
Выбрать язык
Choose Old Testament Story
Choose New Testament Story
ИНМАРЛЭН СӤЗЁН-КОСОНЭНЫЗ КОВЧЕГ ИЕРУСАЛИМЫН
Быдэс Израильлы эксэй луэм бераз, Давид аслэсьтыз престолзэ Иерусалиме интыяз. Инмар Давидлы визьлык, кужым сётыса бакель кариз, Израильлэсь вань тушмонъёссэ Давид вормыны быгатӥз. Давид Инмарез туж яратӥз, Инмарлэн сӥзёнэныз ковчегез матаз, ас городаз ваемез потӥз. Одӥгаз ожмаськонэ та ковчегез филистим пиос киултӥзы но бӧрсязы нуизы. Берло соос сое израиль калыклы берыктӥзы, нош таос сое Кириаф-Иаримысь Аминадав нимо муртлэн юртаз интыязы. Давид малпаз сое отысь святой Иерусалим каре вайыны.
Куамын сюрс адямиосын ӵош Давид ковчегез вайыны мынӥз. Макем шудо вал Давид ковчегез Иерусалиме пыртэмзы но Сӥон гурезе интыямзы бере! Гажась-жалясь Инмарез данъяса, со крезен шудӥз, шумпотыса Кузё-Инмар азьын эктӥз. Пеллян гумыосын шудыса, кырӟаса-вераса вань калык Инмарез данъяз. Давидлэн юри та понна пуктэм тылысэзлэн (скиниялэн) шораз ковчегез пуктӥзы. Давид Кузё-Инмарлы тау карон курбонъёс сётӥз. Саваоф Кузё-Инмарлэн нимыныз калыкез бакель кариз. Собере вань израиль калыклы нянь, куарнянь, пыжем сӥль сётъяз.
Кузё-Инмар Давидлы кыл сётӥз солэсь эксэй выжызэ юнматыны: «Мон солы Атай луо, нош со Мыным пи луоз. Со сьӧлыказ ке, соку Мон кужмо муртъёслэн ньӧрынызы вӧсь каро, но сое гажамысь-жалямысь уг дугды. Тынад выжыед шонаськытэк сылоз, эксэйлыкед но Мон азьын пумтэм вапумъёс ӵоже улоз, пумтэм вапумъёс ӵоже престолэд сылоз». Кузё-Инмарлэсь та кылъёссэ Давидлы Нафан пророк вераз. Тае кылэм бераз, Давид Кузё-Инмар азе султыса, Солы шуиз: «Кузё-Инмаре, кин мон сыӵе, Кузё-Инмаре, мар со мынам выжые, мар понна Тон монэ сокем вылӥ кариськод?! Котькытын но тон быдӟым Кузё-Инмаре, Кузё-Инмаре! Тон кадез ӧвӧл, Тон сяна, мукет Инмар ӧвӧл. Инмаре Кузё-Инмаре, туннэ но, пумтэм вапумъёс ӵоже но озьы мед луоз, кызьы Тон верад ляльчиедлы, солэн выжыезлы; мар верад, сое быдэсты».
2 Эксэйлык 6:2-19; 7:14-16, 18-29
168 
