Choose Language
Old Testament Books
New Testament Books
1Давид нош Израильысь быръем куамын сюрс адямиосты люказ.2Давид но со котыре люкаськем вань калык султӥзы но Иудей музъемысь Ваал карысь Инмарлэсь ковчегзэ, херувимъёс вылын пукись Саваоф Кузё-Инмарлэн нимызлы сӥзем ковчегез, вайыны сюрес вылэ потӥзы.3Инмарлэсь ковчегзэ выль уробо вылэ пуктӥзы но вырйылэ пуксем Аминадавлэн коркасьтыз поттӥзы. Нош Аминадавлэн Оза но Ахио пиосыз выль уробоез валтӥзы.4Аминадавлэн вырйылэ интыяськем коркасьтыз Инмарлэсь ковчегзэ уробоын нуизы; [Кузё-Инмарлэн] ковчегезлэн азьпалтӥз Ахио мынӥз.5Нош Давид но вань израиль пиос Кузё-Инмарлэн азяз кипарис пулэсь лэсьтэм пӧртэм шудонъёсын шудӥзы – цитраосын, псалтирьёсын, тимпанъёсын, сӥстраосын, кимвалъёсын.
6Нахонлэн итымез доры вуэм бере Оза кизэ Инмарлэн ковчегез пала сое кутыса возьыны мычиз, уго ошъёс огпала мыкыртӥзы сое.7Нош Кузё-Инмар Озалы вожзэ поттӥз. Инмар сое укыр кышкасьтэм луэмез понна интыяз ик погыртӥз; Инмарлэн ковчег дораз ик со кулӥз.
8Кузё-Инмар Озаез погыртӥз шуыса, Давид ӝоже усиз. Туннэ нуналозь но та инты ”Озалэн погранэз” шуыса нимаське.9Со нуналэ Давид Кузё-Инмарлэсь туж кышказ, со шуиз: «Кузё-Инмарлэн ковчегез кызьы мон доры пыроз?»10Кузё-Инмарлэсь ковчегзэ Давидлэн ас дораз, Давидлэн городаз, нуэмез ӧз поты, сое Геф карысь Аведдар доры нуытӥз.11Кузё-Инмарлэн ковчегез Гефысь Аведдарлэн корказ куинь толэзь улӥз, Аведдарез но солэн юртаз улӥсьёсты Кузё-Инмар бакель кариз.
12Давид эксэйлы таӵе ивор вуттэм бере «Инмарлэн ковчегез понна Кузё-Инмар Аведдарез но маиз солэн вал, ваньзэ бакель кариз», Давид шумпотыса-шулдыръяськыса мынӥз но Инмарлэсь ковчегзэ Аведдарлэн коркасьтыз Иерусалиме нуиз.13Кузё-Инмарлэсь ковчегзэ нуисьёс куать вамыш лэсьтэм бере со кунянэз но ыжез курбон сётылӥз.14Давид Кузё-Инмарлэн азьтӥз вань кужымзэ поныса тэтчаса мынӥз; Давид етӥнлэсь куэм ефод дӥсен дӥсяськемын вал.15Озьы Давид но вань израиль калык Кузё-Инмарлэсь ковчегзэ шумпотон куараен кесяськыса, гумыен шудыса нуизы.
16Кузё-Инмарлэсь ковчегзэ Давидлэн городаз пыртыку, Сауллэн Мелхола нылыз укное учкыса улэ вал; Кузё-Инмарлэн азьтӥз тэтчаса, эктыса мынӥсь Давид эксэез адӟиз но ас сюлмыныз сое ултӥяз.17Кузё-Инмарлэсь ковчегзэ вайизы но Давидлэн ковчеглы сӥзьыса пуктэм скиниялэн шораз интыязы; Кузё-Инмар азьын Давид тылын сутӥськись курбонъёс, тупаса улонлы сӥзем курбонъёс сётӥз.18Тылын сутӥськись курбонъёс, тупаса улонлы сӥзем курбонъёс сётэм бераз Давид Саваоф Кузё-Инмарлэн нимыныз калыкез бакель кариз.19Вань калыклы, туж трос израиль муртъёслы, [Дан музъемысен кутскыса Вирсавияозь улӥсьёслы], кызьы ке пиосмуртъёслы, озьы ик кышномуртъёслы, быдэн колды нянь, тылын кебатэм сӥль люкет, быдэн уднянь сётъяз. Собере вань калык ас дораз бертӥз.
20Аслэсьтыз юртсэ бакель карыны Давид берытскем бере Сауллэн Мелхола нылыз, со доры потыса, [сое ӟечкылаз но] шуиз: «Израильлэн эксэез туннэ макем висъяськиз, ляльчи пиосызлэн ляльчи нылъёссы азьын гольык кыльыса, укылтэм муртлэн гольык кельтӥськемез кадь!»21Давид Мелхолалы шуиз: «Кузё-Инмар азьын [экто. Данлыко Кузё-Инмар], Со монэ атаедлэсь, выжы-кумыосызлэсь вылӥгес кариз, Кузё-Инмарлэн израиль калыкезлы азьветлӥсь кариз; Кузё-Инмар азьын крезен шудо, [экто];22асме эшшо покчи каро, асме ярантэм маке луисько шуыса возьмато, тынад верано медо нылъёсыд азьын мон дано луо».23Сауллэн Мелхола нылызлэн кулытозяз нылпиез ӧй вал.
Глава 6
