Bible
Choose Language
Old Testament Books
New Testament Books
ПСАЛТИРЬ
59-тӥ ПСАЛОМ
1-2Хорлэн кивалтӥсезлы. Шушан-эдуф шудонэн. Месопотамияысь но Цованысь арамей калыкен ожмаськем бераз Иоав*а берытскыкуз Сылало нёжалысен дас кык сюрс идумейёсты быдтӥз; Давидлэн дышетон гожтэтэз.*б
3Эй, Инмаре! Тон милемыз куштӥд, Тон милемыз сузмытӥд,
вождэ поттӥд; ми пала берытскы.
4Тон музъемез зуркатӥд, пильылӥд сое;
сӧриськем интыоссэ бурмыты, со куалекъя ук.
5Аслад калыкедлы лекез-уродэз возьматӥд,
милемыз паймытӥсь винаен сектад.
6Тынэсьтыд кышканэн улӥсьёслы знамя кузьма,
зэмлык понна сое мед ӝутозы.
7Яратоно муртъёсыд мозмытэмын мед луозы.
Аслад бур киыныд уть соосты, кыл монэ.
8Вӧсяськон интыысен Инмар шуиз: «Шумпото-шулдыръясько,
люко Сӥхемез, Сокхоф нёжалэз мертало.
9Галаад – Мынам, Манассия – Мынам,
Ефрем – йырылэн юнлыкез, Иуда – эксэй бодые,
10Моав – мисьтӥськон тусьтые; Едом вылэ пыдкутчанме пукто».
Ӟечкыласа Мыным вазиськы, филистим музъем!
11Кин монэ юнматэм каре пыртоз? Кин монэ Едомозь вуттоз?
12Тон ӧвӧл-а, Инмаре? Милемыз куштӥд но
ожмаськись муртъёсынымы ӵош уд ни потӥськы-а, Инмаре?
13Ӝикаса улыкумы, милемлы юрттэт сёт,
уго адямилэн юрттэтэз ӧвӧлтэмлэсь гинэ вань.
14Инмарлэн юрттэменыз, ми кужмоесь луомы,
Со милесьтым тушмонъёсмес уськытъялоз.
*а 59:1-2 Иоав – Давид эксэйлэн армиеныз кивалтӥсь (2 Экс. 20:23)
*б 59:1-2 2 Экс. 8:13
Глава 59
