Bible
Choose Language
Old Testament Books
New Testament Books
ПСАЛТИРЬ
58-тӥ ПСАЛОМ
1Хорлэн кивалтӥсезлы. «Эн быдты». Давидлэн гожтэмез Саул сое виён вылысь солэн корка дораз возьмаськисьёсты ыстэм бере.*а
2Тушмонъёсылэсь мозмыты монэ, Инмаре,
пумит султӥсьёслэсь уть монэ!
3Законлы пумит лэсьтӥсьёслэсь мозмыты,
вир кисьтӥсьёслэсь уть монэ.
4Лулме быдтыны возьмаськыса соос уло;
мон вылэ кужмоос урдӥськизы – йыруж лэсьтэме понна ӧвӧл,
сьӧлыке понна но ӧвӧл, Кузё-Инмаре.
5Мон янгыш ке но ӧвӧл,
соос, огазе люкаськыса, ожмаськонлы дасясько;
мыным юрттыны султы но учкы.
6Тон, Кузё-Инмаре, ин кужымъёслэн Инмарзы,
Израильлэн Инмарез, султы, вань калыкъёс доры вуылы,
одӥгзэ но сьӧлыклэсь кышкасьтэмез, законлы пумит улӥсез эн жаля.
7Ӝыт соос берытско но, пуны кадь вузыса, город котыртӥ ветло.
8Дугдылытэк керето-йырйисько, ымзы лэчыт пурт кадесь.
Соос малпало: «Кин кылэ?»
9Нош Тон, Кузё-Инмаре, соосты серем карод,
вань калыкъёсты возьытэ вуттод.
10Кужым соос дорын, нош мон Тон доры лыктӥсько, Инмаре,
Тон мынам дурбасьтӥсе уго.
11Монэ гажась-жалясь Инмаре азьпалам султоз,
тушмонъёсылэсь быронзэс Со мыным возьматоз.
12Мынам калыке тае медаз вунэты шуыса, соосты эн виылы;
Аслад кужыменыд пазьгы соосты, уськыты соосты,
Кузё-Инмаре, милям Утисьмы.
13Ымысьтызы потэм вань кылзы сьӧлык луэ;
вылӥ мылкыдын каргаськыса, ӧрекчаськыса вераськемзы понна
сьӧлтэтэ мед сюрозы.
14Пазьгы соосты, вожед потыку, пазьгы, медаз ни кыле соос;
музъемлэн пумысеныз пумозяз Инмар Иаковлы кузё луэ шуыса,
мед тодозы.
15Ӝытазе соос берытско но, пуны кадь вузыса, город котыртӥ ветло.
16Сиён утчаса, солань-талань ворттыло,
кӧтсы сюмаку, уйёсы вузыса уло.
17Нош мон Тынэсьтыд кужымдэ кырӟаса данъяло,
вазь ӵукнаысен гажан-жаляндэ ушъяса верало,
уго шугадӟон нуналъёсам Тон мынам дурбасьтӥсе,
ватӥськон интые вал.
18Тон мынам кужыме! Тонэ кырӟаса данъяло.
Инмар – мынам дурбасьтӥсе, Инмаре монэ жаля уго.
*а 58:1 1 Экс. 19:11
Глава 58
