Choose Language
Old Testament Books
New Testament Books
1Саул Ионафан пиезлы, вань медоосызлы Давидэз виыны кулэ шуыса вераз. Нош Ионафан, Сауллэн пиез, туж яратӥз Давидэз.2Ионафан Давидлы ивор сётӥз: «Атае, Саул, тонэ виыны ӧдъя; ӵуказе утиськы; ватӥськы, лушкем интыын ул;3нош мон пото но бусыын атаелэн вӧзаз султо, отын тон луод, тон сярысь атаеным верасько, мае адӟо, сое тыныд верало».
4Ионафан атаезлы, Сауллы, Давид сярысь ӟеч кылъёс вераз, солы шуиз: «Давид ляльчиезлы пумит эксэй медаз сьӧлыка, уго со тон азьын нокыӵе но сьӧлык ӧз лэсьты, тон понна со пайдаё ужъёс гинэ лэсьтэ;5улонэзлы кышкытлык кылдэмын шуыса ӧз учкы филистим ожгарчиез погыртон понна. Кузё-Инмар Израильлы бадӟым утиськон сётӥз; тон сое адӟид но шумпотыса улӥд. Малы сьӧлыктэм вирлы пумит сьӧлыканы ӧдъяськод, нокыӵе мугтэк Давидэз виыны малпаськод?»
6Ионафанлэсь верамзэ Саул кылзӥськиз, Саул кыл сётӥз: «Улэп Кузё-Инмар, Давид уз кулы».7Ионафан Давидэз ӧтиз, ваньзэ та кылъёсты Ионафан Давидлы вераз; Ионафан сое Саул доры вуттӥз, со вӧзын вал со, кызьы толон но, толон валлян но со вӧзын вал.8Нош ик ожмаськон кутскиз, Давид филистим калыкен ожмаськыны потӥз, соослы со туж зол шуккет сётӥз, соос азьысьтыз бызьыса кошкизы.
9Инмарлэн эрикезъя лэзем лек дух Саул вылэ урдскиз, со корказ пукиз, шибодыез кияз вал, нош Давид сиосты киыныз бичаса шудӥз.10Саул Давидэз шибодыеныз борддор борды бышкалтыны турттэ вал, нош Давид Саул дорысь тэтчыны вуиз, шибоды борддоре бышкалскиз. Со уе Давид пегӟиз но утиськыны быгатӥз.11Саул медооссэ, Давидлэн юртэз доры возьмаськыса улыны но сое ӵукнаозь виыны шуыса, лэзиз. Кышноез, Мелхола, Давидлы шуиз: «Та уе астэ ӧд ке утьы, ӵуказе виемын луод».12Мелхола Давидэз укно пыр лэзиз, со бызьыса кошкиз но утиськиз.
13Мелхола из сульдэрез кутӥз но валес вылэ понӥз, йыр палаз кечку понӥз но дӥськутэн шобыртӥз.14Давидэз кутыны Саул медооссэ лэзиз, нош Мелхола соослы шуиз: «Со висе».15Давидэз эскерыны Саул медооссэ ыстӥз, шуиз: «Мон доры валесэныз валче вае, виыны мед быгатом».16Медоос лыктӥзы, но тани: валесын сульдэр, йыр дораз – кечку.17Соку Саул Мелхолалы шуиз: «Малы тон тазьы монэ ӧрекчад, тушмонме келяд, пегӟыны лэзид?» Мелхола Сауллы шуиз: «Со мыным шуиз: лэзь монэ, ӧд ке лэзьы, мон тонэ виё».
18Давид пегӟиз, утиськиз, Самуил доры Рамае вуиз, мар солы Саул лэсьтӥз, ваньзэ солы вераз. Самуилэн ӵош со кошкиз но, [Рамаысь] Навафе вуыса, соос отчы дугдӥзы.
19Сауллы таӵе ивор вуттӥзы: «Тани, Давид Рамаысь Навафын».20Давидэз кутыны Саул медооссэ ыстӥз. Соос азьпалзэ тодытӥсь трос-трос пророкъёсты но Самуилэз адӟемзы бере, кудӥз соосын кивалтыса улӥз, Инмарлэн Духез Сауллэн медоосыз вылэ васькиз но соос азьпалзэ тодытыса вераны кутскизы.21Та сярысь Сауллы ивор вуттӥзы, соку со мукетъёссэ медооссэ лэзиз, но таосыз но азьпалзэ тодытыны кутскизы. Собере Саул куинетӥ радзэ медооссэ ыстӥз, но таосыз но азьпалзэ тодытыны кутскизы.
22[Йырыз курен] Саул ачиз Рамае мынӥз, Сефуысь бадӟым ошмес доры вуыса, тазьы юаз: «Кытын Самуилэн Давид?» Шуизы: «Рамаысь Навафын».23Соку со Рамаысь Навафе мынӥз, со вылэ но Инмарлэн Духез васькиз но со, Рамаысь Навафе вуытозяз, азьпалзэ тодытыса вераса мынӥз.24Дӥськутсэ со но кылиз, Самуил азьын азьпалзэ тодытыса улӥз, быдэс нунал, быдэс уй но дӥсяськытэк кыллиз; соин ик шуо: «Оло, Саул но пророк луиз-а?»
Глава 19
