Bible
Choose Language
Old Testament Books
New Testament Books
ПСАЛТИРЬ
50-тӥ ПСАЛОМ
1Хорлэн кивалтӥсезлы. Давидлэн крезьгурез.2Давид Уриялэн Вирсавия кышноез доры пырем бере со доры Нафан пророк лыктӥз.*а
3Эй, Инмаре, Аслад быдӟым ӟечлыкеныд жаля монэ,
Аслад туж шырыт сямыныд законлы пумит улэмъёсме ӵошкаты.
4Законлы пумит улэмысьтым монэ быдэсак миськы,
сьӧлыкелэсь но монэ чылкытаты.
5Законлы пумит улэмме тодӥсько уго, сьӧлыке но котьку син азям.
6Тыныд Огнадлы мон сьӧлыкай, урод ужез Тынад син азяд лэсьтӥ;
шонер Тынад судэ сётонэд, Аслад судад Тон дун-шектэм.
7Законлы пумит улыку, мон сюремын, сьӧлыкен монэ анае ваем.
8Сюлмысь зэмлыкез Тон яратӥд, мынам пушкам визьлык сётӥд.
9Иссоп турынэн монэ пазьгы но, мон чылкытало;
миськы монэ – лымылэсь но тӧдьы луо.
10Шумпотон, шулдыръяськон куараез мыным кылыты –
Тонэн пырдытэм лыосы шумпотозы.
11Аслэсьтыд ымнырдэ сьӧлыкъёсылэсь палэнты,
законлы пумит лэсьтэм вань урод ужъёсме ӵошкаты.
12Эй, Инмаре, сюлэмме чылкыт кар,
мынам пушкам выльдэм юн дух пон.
13Аслад син азьысьтыд монэ эн улля,
Аслэсьтыд Святой Духтэ мон бордысь эн басьты.
14Утиськон понна шумпотондэ мыным берен сёт,
кужмо Духеныд монэ юнматы.
15Законлы пумит улӥсьёсты Тынад сюресэдлы дышето,
сьӧлыклэсь кышкасьтэмъёс Тон пала берытскозы.
16Эй, Инмаре, монэ утись Инмаре, вир кисьтонлэсь монэ мозмыты,
мынам кылы Тынэсьтыд шонерлыктэ ушъяса вералоз.
17Кузё-Инмаре, ымме усьты, мон Тыныд тау карон кылъёс верало.
18Виро сётонэз Тон кулэ уд кариськы – мон сое сётысал;
тылын сутӥськись курбонлы но ӟеч мылкыдыд ӧвӧл.
19Инмарлы курбон – чигиськись-тэрытскись дух;
чигиськыса востэм улӥсьлэсь сюлэмзэ Тон, Инмаре, уд ултӥя.
20[Кузё-Инмаре,] Аслад ӟеч эрикеныд Сӥонлы ӟеч кар,
Иерусалим карлэсь борддоръёссэ ӝут.
21Соку Тон шонерлыклэсь курбонзэ, вылэ ӝутонэз,
тылын сутӥськись курбонэз кабыл карод;
соку курбон сётон интыяд кунянъёс понозы.*б
*а 50:2 2 Экс. 12:1-15
*б 50:21 татын вераськон мынэ вашкала еврейёслэн пӧртэм учыръёсы пӧртэм пумо курбонъёс сётонзы сярысь
Глава 50
