Choose Language
Old Testament Books
New Testament Books
1Кузё-Инмар Давид доры Нафан [пророкез] ыстӥз, со Давид доры лыктыса шуиз: «Одӥг городын кык адямиос вал – огез узыр, мукетыз – начар.2Узырезлэн туж трос ыжъёсыз, кечъёсыз, скалъёсыз, ошъёсыз вал,3нош начарезлэн ыжез сяна номыриз ӧй вал, сое со пичи дыръяз басьтӥз, сюдӥз, со ас нылпиосыныз ӵош будӥз; киысьтыз няньзэ сииз, тусьтыысьтыз юиз, гадь вылаз кӧлаз, солы со вордэм ныл кадь потэ вал.4Узыр мурт доры пыдйылчи лыктӥз, но узырлы пырем пыдйылчиез сюдон понна ыжзэ яке ошсэ вандыны жаль потӥз, со куанерлэсь ыжзэ басьтӥз но со доры пырем муртлы сое сиён кариз».
5Та адямилы Давидлэн туж вожез потӥз, со Нафанлы шуиз: «Улэп Кузё-Инмар! Та ужез лэсьтӥсь муртэ виыны кулэ.6Тазьы каремез понна, жалянэз тодымтэез понна со ыжлэсь дунзэ ньыль полэс карыса берыктыны кулэ».
7Соку Нафан Давидлы шуиз: «Тазьы лэсьтӥсь мурт – со тон. Тазьы шуэ Кузё-Инмар Израильлэн Инмарез: ”Мон тонэ, вӧйын зырӟыса, Израильлы эксэе пуктӥ, Мон тонэ Сауллэн киулысьтыз мозмытӥ,8кузёедлэсь юртсэ тыныд сётӥ, кузёедлэсь кышнооссэ но тон киулэ сётӥ, Израиль юртэз, Иуда юртэз тыныд сётӥ, со но тыныд уг ке тырмы, эшшо троссэгес ватсасал на.9Малы тон Кузё-Инмарлэсь кылзэ санэ ӧд поны, Солэн син азяз урод уж лэсьтӥд? Хеттей пиез Урияез мечен виид; кышнозэ аслыд кышнолы басьтӥд, нош сое аммон пиослэн меченызы виид.10Мынэсьтым кылзӥськымтэед понна, хеттей пилэсь Уриялэсь кышнозэ аслыд кышно басьтэмед понна ноку но юрт пушкысьтыд меч уз кошкылы”.11Тазьы шуэ Кузё-Инмар: ”Аслад семья пушкысьтыд тыныд пумит лекъяськон ӝуто, син азьысьтыд кышноостэ басьто но матысь муртэдлы сёто; та шунды азьын тынад кышноосыныд со изёз.12Тон лушкемен лэсьтӥд, нош Мон та ужез вань израиль калык азьын, шунды азьын лэсьто”».
13Соку Давид Нафанлы шуиз: «Кузё-Инмар азьын сьӧлыкай». Нафан Давидлы шуиз: «Кузё-Инмар вылысьтыд сьӧлыктэ басьтӥз; тон уд кулы;14но та уженыд Кузё-Инмарлэн тушмонъёсызлы Солэсь нимзэ сантэманы муг сётӥд бере, вордӥськем пи нуныед кулоз».
15Нафан дораз бертӥз. Уриялэн кышноез Давидэн нуны ваем бере Кузё-Инмар со вылэ висён лэзиз, сое погыртӥз.16Давид Инмар азьын нуны понна вӧсяськиз, Давид визяса улӥз, ас понназ кариськиз но уйзэ муз вылын кылльыса потӥз.17Солэн юртысьтыз тӧроос со доры пыризы, сое муз вылысь ӝутыны шуыса; нош солэн султэмез ӧз поты, соосын ӵош нянь но ӧз сиы.
18Сизьыметӥ нуналаз пичи пи кулӥз, Давидлэн медоосыз нуны кулӥз шуыса, солы вераны кышказы; уго соос шуо вал: «Нуны улэп дыръя ми солы либатыса вераськомы вал, нош со милесьтым вераммес санэ ӧз понылы, кызьы табере солы шуомы: ”Нуны кулӥз”? Со маке но урод лэсьтоз».19Давид адӟиз, кызьы медоос куспазы лушкемен сипырто, соку со валаз, нуны кулӥз шуыса. Соку Давид медоосызлэсь юаз: «Нуны кулӥз-а?» Шуизы: «Кулӥз».
20Соку Давид муз вылысь султӥз, мисьтӥськиз, вӧйын зыраськиз, дӥськутсэ воштӥз но Кузё-Инмарлэн корказ мынӥз, отын вӧсяськиз. Дораз бертыса, сиыны нянь куриз, сииз.21Медоосыз солы шуизы: «Малы тон озьы лэсьтӥськод, мар шуэм со: пиед улэп дыръя тон кӧс утид, бӧрдӥд, [ӧд изьы], нош нуныед кулэм бере тон нянь сиид, [юид]?»22Давид шуиз: «Нуны улэп дыръя мон визяса улӥ, бӧрдӥ, уго малпасько вал: кин тодэ, оло, Кузё-Инмар монэ жалялоз но пичи пи улэп кылёз?23Нош со кулӥз; малы мыным визяно на? Мон сое берыктыны быгато на шат? Мон со доры мыно, но со мон доры уз берытскы».
24Давид Вирсавияез, кышнозэ, либатӥз, со доры пыриз но соин изиз; со [секытэн луиз], пи нуны вайиз, солы Соломон ним сётӥз. Кузё-Инмар сое яратӥз,25Нафан пророкез ыстӥз но, Кузё-Инмарлэн верамезъя, солы Иедидия ним сётӥз.
26Иоав аммон калыклэн Равва карезлы пумит нюръяськиз, ӧжыт гинэ ӧз киулты эксэйлэсь карзэ.27Иоав Давидлы тазьы вераны ыстӥз: «Мон Равва вылэ ожен мынӥ, городлэсь вузэ киултӥ.28Табере, кылемзэ калыкез люкаса, город доры мын, киулты сое; уго мон сое киултӥ ке, солы мынэсьтым нимме сётозы».29Давид, вань калыкез люкаса, Равва доры мынӥз, солы пумит ожмаськыса, сое киултӥз.30Эксэйзылэн йырысьтыз венец изьызэ басьтӥз, нош со бордын талант зарниез, дуноесь изъёсыз вал. Давид сое ас йыр вылаз понӥз, городысь трос ваньбур поттӥз.31Со пушкысь калыкез поттӥз но бычкыос (пилаос) улэ, корт кутэсъёс, корт тӥръёс улэ выдтӥз, ӝуась гуръёсы куштӥз. Аммонлэн вань городъёсызлы озьы лэсьтӥз. Собере Давид вань калыкен ӵош Иерусалиме берытскиз.
Глава 12
