Bible
Choose Language
Old Testament Books
New Testament Books
ПСАЛТИРЬ
49-тӥ ПСАЛОМ
Асафлэн крезьгурез.
1Инмаръёслэн Инмарзы*а Кузё-Инмар вераз,
шундыӝужанысен шундыпуксёнозь музъем вылэз ӧте.
2Сӥонысь, чеберлэсь но чебер интыысь, Инмар возьматскиз.
3Лыктоз милям Инмармы, шыпытэн уз лыкты:
Солэн азьтӥз сиись-юись тыл, Солэн котыртӥз кужмо сильтӧл луоз.
4Со вылысен инмез но, музъемез но ӧтёз
Аслэсьтыз калыксэ судить карон понна:
5«Мон доры Мынэсьтым дун-чылкыт улэмъёсме люкалэ,
курбон сётыса, Монэн ӵош сӥзён-косонэ пыремъёсты люкалэ».
6Инъёс Солэсь шонерлыксэ вералозы, уго Инмар луэ судить карись.
7«Кылзӥськы, Мынам калыке, Мон тӥледлы верало;
Израиль! Мон тыныд пумит кыл верало; Мон Инмар, тынад Инмаред.
8Виро сётонъёсыд понна Мон тонэ уг пыкылы,
тылын сутӥськись курбонъёсыд котьку но Мон азьын.
9Юртысьтыд ошъёстэ уг басьты,
гидкуаысьтыд кечъёстэ но кулэ уг кариськы.
10Уго нюлэскысь вань пӧйшуръёс Мынам киулам,
пудоосы – сюрс гурезьёсын.
11Гурезьёсысь вань тылобурдоосты тодӥсько,
луд вылысь кыр пудоос но Мынам син азям.
12Мынам сиеме ке потысал, Мон тыныд ӧй верасал,
уго быдэс дунне но, мар отын вань – ваньмыз со Мынам.
13Мон ошъёслэсь сӥльзэс сиисько шат,
кечъёслэсь вирзэс юисько шат?
14Инмарлы курбон интые тау карон кылъёстэ вера,
Вылысь Инмар азьын сӥзиськемдэ быдэсты.
15Куректон-кайгырон нуналад вазиськы Мыным,
Мон тонэ мозмыто, соку тон Монэ данъяса улод».
16Нош сьӧлыклэсь кышкасьтэмлы Инмар шуэ:
«Малы тон законме тодытыса ветлӥськод,
сӥзён-косонме кылад-ымад басьтӥськод,
17нош ачид Мынэсьтым дышетэмме синазькыль кариськод,
кылъёсме мышкинад зӥртылӥськод?
18Лушкаськисез адӟиськод ке, соин огазе кариськиськод,
азыса-калгыса улӥсьёсын кусып возиськод.
19Лек кылъёс вераны ымыдлы эрик сётӥськод,
кылыд кескичлык керттэ-бине.
20Пукиськод но агаед вылэ ӧвӧлтэм кыл вераськод,
выныдлы пумит кескич кылъёс ӝутӥськод.
21Тон тае лэсьтӥд, но Мон чус улӥ;
тон малпад вал, Мон тон кадь ик луисько шуыса.
Мон тонэ шарае потто, [сьӧлыкъёстэ] син азяд пукто.
22Инмарез вунэтӥсьёс, тодэлэ тае:
Мон тӥледыз киулам кутыса шымыртоно медам луы,
мозмытӥсьты уз луы.
23Кин курбон интые Монэ ушъяса улэ, со Монэ сӥлы каре,
кин аслэсьтыз сюрессэ чакласа улэ, Мон солы утиськон сёто».
*а 49:1 татын вераськон мынэ Инмарлэсь быдӟымлыксэ, Солэсь Огназлэсь данлыко, зэмос луэмзэ возьматон пумысен
Глава 49
