Выбрать язык
Выбрать рассказ Ветхого Завета
Выбрать рассказ Нового Завета
Таԓат матсат. Хон хон юпийн манас, па Израиль муван Ахав хон пора ёхтас. Ахав Иезавель нэмпи имеԓан Ваал турма пойкащты вохса, па Иезавель ԓаӈхас паратты иса щитат, хой яна Турма вещката¹ хащас. Щи пора кеман израиль мир ёх Турам юш эԓты еԓ пайтащсат.
Туп Илия – Турам ясаӈ туты вещкат хоят¹, иса мохет ԓыԓаӈ Турам ещаԓт питты вохас. Ипуш Турам пāртас Илияя Ахав хон хоща манты па ястаты, ԓуԓан Ахав иса Ваал турам ясаӈ туты ёх вохас, па иса израиль мир ёх Кармил кев ԓōӈаԓ хоща ёхатты. Хун хоԓыя¹ актащсат, Илия ԓувиԓаԓа ястас: ”Хув нын хоԓна тыеԓт-тохеԓт нумасты питԓаты? Куща Турам яна ки Турам, āув ясаӈԓаԓ хуват уԓаты, па Ваал турам яна ки Турам – ԓув ясаӈԓаԓ хуват уԓаты. Āт маԓаюв ям ԓāват кат мис пошахан, па и мис пошах ԓувеԓ āт уԓат, хорман¹ катна āт пайтԓэԓ па рат юха понԓэԓ, туп ăтăт ущитԓэԓ. Ма кимет мис пошах щиты ԓэщатԓэм. Нын нын турман вохаԓан, па ма ма Куща Турмем вохԓам. Щит, Хой ты тут китаԓ - щит воԓԓы яна ԓыԓаӈ Турам уԓ.” Ёха щи вер рахас.
Ваал ясаӈ туты ёх ай мисеԓ рат юха потсэԓ па увты питсат: ”Ваал! Муӈев хуԓанты!” Щиты ԓув отшама йиты унты¹ моԓты арат щёс увсат, туп ԓувиԓаԓа ёхԓы ясаӈ антом ус. Щи юпийн Илия мохета ястас: ”Ма хощаем юваты.” āув кеват эԓты паԓ таха верас Турма порыԓытыя¹, щи юх понас, ай мис хорман катна пайтсаԓы па щит юха потсаԓы. Щаԓта порыԓыты хара йиӈк шошамты партас, мис пошах нёхи па юхат иса йиӈка йисат. Щи юпийн Илия пойкащты питас: ”Куща, Авраам, Исаак па Израиль Турам! Там мохета этаԓты, муй Наӈ яна Турам!” Турам Илия пойкащты вер хуԓсаԓы. Турам эԓты ԓув порыԓыты вояԓа тут питас, тутан воԓԓы¹ ԓэса порыԓыты отаԓ, юхат па иса порыԓыты таха кеват, па мува питам йиӈк иса воԓԓы тутан ԓэса. Щит шияԓаман, хоԓыя веншан иԓԓы пеԓа мува ракатсат па ястасат: ”Куща яна Турам! Куща яна Турам!” Щиты Куща Турам иса мохета этаԓтас, āув – и уԓты Турам, па Ваал ясаӈ туты отат – олмащты¹ ёх.
3 Арсыр хон верат (3 Царств) 16:29-33; 18:1-39
50 