Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

АПОСТОЛЪЁСЛЭН УЖЪЁССЫ

Глава 23

23-тӥ ЛЮКЕТ

1Сӥнедрионын пукисьёс шоры меӵак учкыса, Павел шуиз: «Агай-вынъёс! Мон туннэ нуналозь Инмар азьын чылкыт сюлмын, курдан-возьдаськонэн улӥ».2Нош Анания архиерей Павеллэн вӧзаз сылӥсьёсты солэн ымныраз чабкыны косӥз.3Соку Павел солы шуиз: «Тонэ Инмар тышкалоз, избурам борддор! Тон пукиськод, монэ законъя судить мед карозы шуыса, нош ачид, законэз тӥяса, монэ жугыны косӥськод».4Соку вӧзаз сылӥсьёс Павеллы шуизы: «Инмарлэсь архиерейзэ сантэмаськод?»5Павел шуиз: «Агай-вынъёсы, мон ӧй тоды уго, со архиерей шуыса; гожтэмын ук: ”Ас калыкедлэн кивалтӥсез сярысь урод кылъёс эн вера”».

6Нош татын одӥг люкетэз саддукейёс, нош мукетыз фарисейёс луо шуыса, Павел тодэм бераз сӥнедрионысен бадӟым куараен со вераз: «Агай-вынъёс! Мон – фарисей, фарисейлэн пиез; кулэмъёслэн улӟыса султонзылы оскем поннам монэ судить каро».7Тае верам бераз фарисейёсын саддукейёс куспын ченгешон потӥз, кенеше люкаськемъёс шори люкиськизы:8уго саддукейёс улӟыса султонэз но, Кылчинъёсыз но, духез но ӧвӧл, шуо, нош фарисейёс созэ но, тазэ но вань, шуо.9Кужмо черекъян потӥз но, фарисейёс палась куд-ог книга тодӥсьёс ченгешыны кутскыса шуизы: «Номыр но уродзэ та адямилэсь ми ум шедьтӥське. Нош солы дух яке Кылчин верам ке? Инмарлы пумит мыноно медам луэ».10Керетон пуромемен, Павелэз кесяса куштэмзылэсь кышкаменыз сэрен сюрс солдатэн кивалтӥсь солдатъёсыз васькыса Павелэз соос пӧлысь басьтыны но изкаре нуыны косӥз.

11Вуонояз уе Кузё-Инмар Павеллэн вӧзаз султыса шуиз: «Эн кышка, Павел! Кызьы Иерусалимын тон Мон сярысь ивортӥд, озьы ик Римын но тыныд ивортоно луоз».

12Вуонояз нуналэ куд-ог иудейёс, огазе люкаськыса, кескич сьӧд уж малпазы, – Инмар азьын кыл сётӥзы: Павелэз виытозязы, сиськытэк, юытэк улыны.13Тазьы ньыльдонлэсь но уногес адями кыл сётӥз.14Архиерейёс, тӧроос доры лыктыса, та адямиос шуизы: «Ми сӥзиськыса, Инмар азьын кыл сётыса верамы, Павелэз виытозямы, номыр но сиытэк улыны.15Озьыен, али тӥ сӥнедрионэн ӵош сюрс солдатэн кивалтӥсьлы ивортэ, ӵуказе со Павел сярысь ужпумез шонергес эскерон амал утчам карыса, сое тӥ доры мед поттоз, нош ми, матамы вуыкуз, сое виыны дасяськыса уломы».

16Та кескич сьӧд уж сярысь Павеллэн сузэрезлэн пиез кылӥз. Со татчы лыктӥз но, изкаре пырыса, Павеллы та сярысь ивортӥз.17Соку ик Павел одӥгзэ сю солдатэн кивалтӥсез ӧтьыса шуиз: «Та пияшез сюрс солдатэн кивалтӥсь доры ну, солэн мар ке но веранэз вань солы».18Соиз сое кутӥз но сюрс солдатэн кивалтӥсь доры вайыса шуиз: «Жильыетын пукись Павел монэ дораз ӧтьыса куриз та пияшез тон доры нуыны, солэн, пе, мар ке но тыныд веранэз вань».19Сюрс солдатэн кивалтӥсь сое китӥз кутӥз но палэнэ нуыса юаз: «Мар тынад сыӵе мыным веранэд вань?»20Со ответ сётӥз: «Тон ӵуказе сӥнедрион азе Павелэз мед поттод шуыса, иудейёс тынэсьтыд курыны куспазы вераськизы. Со сярысь ужпумез шонергес эскерон понна, пе, со ужрад мед луоз.21Нош тон соосты эн кылзӥськы. Ньыльдонлэсь но ятыр мурт лушкемен сое возьмаса улэ. Соос кыл сётӥзы, Павелэз виытозязы, сиськытэк но, юытэк но улыны. Соос али ик дасесь ни, тынэсьтыд косондэ гинэ возьмаса уло на».22Соку сюрс солдатэн кивалтӥсь пияшез лэзиз но солы шуиз: «Нокинлы но эн вера, тон тае мыным ивортӥд шуыса».

23Сю солдатъёсын кык кивалтӥсьёсты дораз ӧтьыса, сюрс солдатэн кивалтӥсь шуиз: «Дасялэ мыным пыдын мынӥсь кык сю солдатъёсты, вал вылын мынӥсь сизьымдон солдатъёсты, пукыӵен кык сю ыбылӥськисьёсты, – уйин куинетӥ часын Кесарияе мыныны мед быгатомы.24Валъёсты дасялэ. Феликс кивалтӥсь доры Павелэз улэпкын-быдэскын вуттыны мед луоз».25Таӵе пуштросъем гожтэт но гожтӥз:26«Клавдий Лисий – гажано кивалтӥсьлы Феликслы – салам верасько!27Та адямиез иудейёс кырмизы но дась вал ини сое виыны. Со Рим кунлэн адямиез луэ шуыса тодӥ но, солдатъёсын лыктыса, мон сое киулысьтызы басьтӥ.28Маин сое янгыше уськытэмзэс тодэме потыса, соослэн сӥнедрионазы сое вайи.29Но валай, асьсэлэн законысьтызы валаны шугъяськоно интыезъя сое янгыше уськыто шуыса. Виён яке жильыетын возён понна солэн нокыӵе но янгышез ӧвӧл.30Та адямилы пумит иудейёслэн кескич сьӧд уж малпамзы сярысь ивор кылӥ но чик ӝегатскытэк сое тон доры ыстӥ. Янгыше уськытӥсьёсты солы пумит мар веранзы вань ке, сое тон азьын вераны косӥ. Ӟеч лу».

31Озьы, косэмез кылзӥськыса, солдатъёс Павелэз кутӥзы но уйин Антипатрида каре нуизы.32Мукетаз нуналэ вал вылын мынӥсь солдатъёсын ӵош сое азьлане келязы, нош асьсэос казармаязы берытскизы.33Вал вылын мынӥсьёс Кесарияе вуэм беразы кивалтӥсьлы гожтэтсэс возьматӥзы, нош Павелэз солэн киулаз сётӥзы.34Кивалтӥсь гожтэтэз лыдӟем бераз Павеллэсь юаз, кыӵе шаерын со вордӥськемын шуыса. Киликияысь луэмзэ тодэм бераз солы шуиз:35«Тынад янгыше уськытӥсьёсыд вуизы ке, соку мон тонэ кылзо». Павелэз Иродлэн преторияз пытсэтын возьыны косӥз.


*а 23:2 сурано ӧвӧл Дамаскысь Анания дышетскисез (Ап.уж. 9:10-19) Иерусалимысь Анания архиереен; со пӧртэм муртъёс

*б 23:23 туала дырын 9 час, ӝытазе


предыдущая глава Глава 23 следующая глава