Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

АПОСТОЛЪЁСЛЭН УЖЪЁССЫ

Глава 22

22-тӥ ЛЮКЕТ

1«Агай-вынъёс, атайёс! Табере мынэсьтым тӥ азьын асме шонере поттонме кылзэлэ».2Соосын со еврей кылын вераськыны кутскиз шуыса кылӥзы но, соос эшшо но чус кариськизы. Со шуиз:3«Мон – иудей, Киликияысь Тарсын вордскем мурт, нош быдэ вуи та городын, Иерусалимын. Гамалиил дорын дышетскемын, атайёсмылэн законзылы пыр-поч дышетэмын. Туннэ нуналын тӥ кыӵеесь, сыӵе ик мон но Инмар понна нюръяськись вал.4Иисуслэсь дышетонзэ кабыл басьтӥсьёсты мон виён дорозь вуттылӥ, думылыса-жильыяса пытсэтэ сётылӥ – пиосмуртъёсты но, кышномуртъёсты но.5Тазьы выремме архиерей но, кенешлэн тӧроосыз но адӟизы. Соослэсь Дамаскын улӥсь агай-вынъёслы гожтэтъёс басьтыса, мон мынӥсько вал отысь Иисус Христослы оскисьёсты жильыяса Иерусалиме курадӟытон понна вайыны.

6Сюрес кузя мынӥсько вал. Дамасклы матэ вуыкум, нуназе вадес шӧдтэк шорысь инмысен туж кужмо югыт мынам котырам чилектӥз-воректӥз.7Мон музъем вылэ уси но куара кылӥ, со мыным шуиз: ”Савл, Савл! Малы тон Монэ улляськод?”8Ответ сётыса, мон шуи: ”Кузё-Инмар, кин Тон?” Со мыным шуиз: ”Мон – Назаретысь Иисус, Кудзэ тон улляськод”.9Монэн ӵош мынӥсьёс югытэз адӟизы но куалектӥзы, нош мыным Верасьлэсь куаразэ соос ӧз кылэ.10Соку мон шуи: ”Кузё-Инмар! Мар мыным кароно?” Нош Кузё-Инмар мыным шуиз: ”Султы, мын Дамаске, мар тыныд лэсьтыны кулэ, отын тыныд ваньмыз верамын луоз”.11Со югытлэн пиштӥсь данлыкезлэсь мынам синмы адӟемысь дугдӥз, соин ик монэн ӵош мынӥсьёс Дамаске монэ китӥм кутыса нуизы.

12Дамаскын улӥсь вань иудейёслэн туж гажано муртсы, Анания, асьме законъя Инмарез сӥлы карыса улӥсь воргорон,13мон доры лыктӥз но матам кариськыса шуиз: ”Савл брат! Нош ик адӟыны кутскы!” Мон соку ик сое адӟи.14Со мыным шуиз: ”Атайёсмылэн Инмарзы тонэ бырйиз, тон Солэсь эриксэ мед тодод, Шонер Улӥсез мед адӟод но Солэн кылысьтыз-ымысьтыз потэм куаразэ мед кылод шуыса.15Уго мае тон адӟид но кылӥд, вань адямиос азьын тон Иисус Христослэн адӟисез-ивортӥсез луод.16Озьыен, малы уд дыртӥськы? Султы, Кузё-Инмарлэн Иисуслэн нимызлы вазиськыса пылатӥськы, сьӧлыкъёстэ гылты”.17Нош Иерусалиме берытскем берам, храмын вӧсяськыса улыкум, мыным туж паймымон адӟон вал –18Кузё-Инмарез адӟи! Со мыным шуиз: ”Дырты! Ӝоггес Иерусалимысь кошкы. Татын тынэсьтыд Мон сярысь ивортэмдэ кабыл уз басьтэ”.19Мон шуи: ”Кузё-Инмаре! Соос тодо, Тыныд оскисьёсты мон пытсэтэ ворсалляй, сӥнагогаосын жугылӥ шуыса.20Куке Тынад адӟиседлэн-ивортӥседлэн, Стефанлэн, вирыз кисьтӥськиз, мон отын сылӥ, сое виёнэз умоен лыдъяй. Стефанэз виисьёслэсь дӥськутсэс возьмаса улӥ”.21Кузё-Инмар мыным шуиз: ”Мын. Мон тонэ кыдёке, язычникъёс доры ысто”».

22Павел тае вератозь, калык сое кылзӥськыса сылӥз, нош собере кесяськыны кутскыса шуизы: «Музъем вылысь таӵе адямиез быдты! Со улыны ярасьтэм адями».23Соос кесяськыса, дӥськутсэс зӥртылыса, омыре тузон пазяса улыку,24сюрс солдатэн кивалтӥсь Павеллы пумит мар муген кеськемзэс тодон вылысь сое, изкаре пыртыса, ньӧрен жугыны косӥз.25Нош куке сое еосын думылӥзы, вӧзаз сылӥсь сю солдатэн кивалтӥсьлы Павел шуиз: «Тӥледлы Рим кунлэсь адямизэ ньӧраны лэземын шат, эшшо ке судтэк?»26Тае кылыса, сю солдатэн кивалтӥсь сюрс солдатэн кивалтӥсь доры мыныса вераз: «Учкы, мар тон лэсьтыны ӧдъяськод? Та мурт – Рим кунлэн адямиез».27Соку сюрс солдатэн кивалтӥсь Павел доры лыктыса шуиз: «Вера мыным, тон Рим кунлэн адямиез-а?» Со шуиз: «Бен».28Сюрс солдатэн кивалтӥсь вераз: «Та кунлэн адями луонэз понна мон трос коньдон тыроно луи». Соку Павел шуиз: «Нош мон Рим кунлэн адямиез луыса вордски».29Соку Павелэз курадӟытыны дасяськемъёс со куспын ик со дорысь палэнскизы. Сюрс солдатэн кивалтӥсь, со Рим кунлэн адямиез луэ шуыса тодэм бераз, кышканы кутскиз Павелэз думылытэмез понна.

30Мукетаз нуналэ иудейёслэсь маин сое янгыше уськытэмзэс пыр-поч тодон понна Павелэз жильыетысь мозмытӥз но архиерейёсты, ваньзэс сӥнедрионэ пырись муртъёсты люкаськыны косӥз. Павелэз поттыса, соос азе султытӥз.


предыдущая глава Глава 22 следующая глава