Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

АПОСТОЛЪЁСЛЭН УЖЪЁССЫ

Глава 24

24-тӥ ЛЮКЕТ

1Вить нунал ортчыса, Анания архиерей тӧроосын но Тертулл нимо адвокатэн ӵош Кесарияе лыктӥз. Соос Павел вылэ кивалтӥсьлы урттылӥськизы.2Павелэз ӧтем беразы Тертулл сое янгыше уськытыны кутскыса шуиз:3«Гажано Феликс! Котьку, котькытысен, котькызьы но ми тыныд тау карыса вераськомы: тон пыр ми трос каньыллык басьтӥмы, тынад сюлмаськеменыд, та калыклэн улонэз ӟеч пала берытскиз.4Нош тонэ, трос жадьытонтэм вылысь ӟеч мылкыддэ возьматыса, милемыз вакчияк кылзыны куриськомы.5Ми тодӥмы: та адями сьӧдчер кадь, быдэс дунне вылын улӥсь иудейёс пӧлын бугыръяськонъёс ӝутка. Назорейёслэн осконэз тугась-пожась дышетонзылэн со кивалтӥсез луэ.6Со храмез саптаны малпа вал, но ми сое кутӥмы. Сое ми асьме законъя судить карыны ӧдъяськомы вал;7нош Лисий, сюрс солдатэн кивалтӥсь, лыктӥз, сое бадӟым кужымен милям киулысьтымы басьтӥз но тон доры ыстӥз.8Милемды но, сое янгыше уськытӥсьёсты, тон доры лыктыны косӥз. Сое эскерид-чаклад ке, солэсь аслэсьтыз юалляськид ке, тон со сярысь ваньзэ тодыны быгатод, маин ми сое янгыше уськытӥськомы».9Павелэз янгыше уськытон борды иудейёс но итӥськыса шуизы: «Зэмзэ но, озьы вал».

10Кивалтӥсь Павеллы вераськыны кыл сётэм бере со тазьы шуиз: «Та калыкез тон трос аръёс ӵоже шонер судить кариськод шуыса тодӥсько, соин ик мон капчи сюлмын аслэсьтым ужме судын тон азьын утьыны тыршо.11Тон тодыны быгатод: Иерусалиме йыбырттыны лыктэме дырысен дас кык нунал ӧз на ортчы;12храмысен но, сӥнагогаысен но, городын но мынэсьтым кинэн ке но ченгешемме яке калык пӧлын бугыръяськон ӝутэмме нокин но ӧз адӟы.13Али монэ маин янгыше уськыто, сое соослэн номырин но юнматэмзы уг луы.14Но таизэ тыныд шонерак верасько: со дышетонэз утьыса, кудзэ соос осконэз туган-пожан (ересь) луэ шуо, мон атайёсмылэн Инмарзылы з эм ик ужасько-тыршисько. Моисей законын но, пророкъёслэн но вань гожъямъёссылы оскисько.15Та адямиос кадь ик Инмарлы оскисько: Со шонер улэмъёсты но, шонер улымтэосты но кулэмысь улӟытыса султытоз.16Соин ик, ачим но Инмар азьын, калык азьын чылкыт сюлмын, курдан-возьдаськонэн улыны тыршисько.17Трос аръёс ортчыса, аслам калыкелы кузьымъёс, саламъёс вайыса, мон Иерусалиме лыктӥ.18Чылкытатӥськон сямез ортчем берам соос монэ храмысен шедьтӥзы, отын нокыӵе калык люкаськон, кесяськон-куашетон но ӧй вал.19Отын Асияысь куд-ог иудейёс вал, соос тон азе султыны но монэ янгыше уськытыны кулэ вал, – мыным пумит лэсьтыны соослэн кыӵе ке но мугзы вань ке.20Яке татын пукисьёс мед вералозы, сӥнедрион азьын мынэсьтым юалляськыкузы, кыӵе янгышме соос шедьтӥзы?21Одӥг кыл понна гинэ ке шат, кудзэ мон, соос пӧлын сылыкум, кеськыса верай: ”Кулэмысь улӟыса султонлы оскем поннам туннэ тӥ монэ судить кариськоды”».

22Та сярысь кылэм бераз Феликс та ужез берлолы кельтӥз, уго та дышетонэз со ӟеч тодэ вал. «Тӥлесьтыд уждэс сюрс солдатэн кивалтӥсь Лисий лыктэм бере учко-эскеро», – со шуиз.23Сю солдатэн кивалтӥсьлы Павелэз возьманы косӥз. Ёртыса возьыны ӧз косы, вань матысьёсызлы юрттӥськыны, гуртаз ветлыны лэзиз.

24Кӧня ке нунал ортчыса, Феликс аслаз иудей кышноеныз, Друзиллаен, ӵош лыктӥз но Павелэз ӧтьытӥз, солэсь Иисус Христослы осконэз сярысь верамзэ кылзӥз.25Нош Павел шонерлыко улон, возиськон-чидатскон но вуоно суд сярысь вераны кутскем бере Феликс кышканы кутскыса шуиз: «Али мын, нош куке дыр шедьтӥ ке, тонэ ӧтё».26Со дыре ик, Павел ассэ поттытон понна солы коньдон сётоз шуыса, со оскиське вал, соин ик ӵем сое ӧтчатылӥз но соин вераськыса улӥз.

27Нош кык ар ортчем бере Феликс интые Порций Фест пуксиз. Иудейёслы яран-кельшон понна Феликс Павелэз жильыетэ ик кельтӥз.


предыдущая глава Глава 24 следующая глава