Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

АПОСТОЛЪЁСЛЭН УЖЪЁССЫ

Глава 9

9-тӥ ЛЮКЕТ

1Савл Кузё-Инмарлэсь дышетскисьёссэ ялан кышкатыны, виылыны выриз на. Архиерей доры со мынӥз 2но Дамаскысь сӥнагогаосы солэсь гожтэтъёс куриз, – та дышетон пала мынӥсьёсты шедьтӥз ке, пиосмуртъёсты но, кышномуртъёсты но, думылыса Иерусалиме вайыны мед быгатоз шуыса.

3Мынон сямен, Дамасклы матэ вуыкуз, шӧдтэк шорысь инмысен солэн йылаз югыт чилектӥз-воректӥз. 4Со музъем вылэ усиз но куара кылӥз, со куара солы шуиз: «Савл, Савл! Малы тон Монэ улляськод?» 5Со шуиз: «Кузёе, кин тон?» Нош Кузё-Инмар шуиз: «Мон – Иисус, кудзэ тон улляськод; секыт луоз тыныд йылсо бодылы пумит мыныны». 6Со куалекъяса, кышкаса шуиз: «Кузёе! Мар карыны Тон монэ косод?» Кузё-Инмар солы шуиз: «Султы но городэ мын, отысен тыныд верамын луоз, мар лэсьтыны кулэ». 7Савлэн ӵош мынӥсь адямиос пумем кадь сылӥзы: куара кыло, нош нокинэ но уг адӟо. 8Савл музъем вылысь султӥз, синъёсыз усьтэмын ке но вал, номыр но ӧз адӟы. Сое, китӥз кутыса, Дамаске нуизы. 9Куинь нунал ӵоже со номыр но ӧз адӟы, ӧз но сиськы, ӧз но юы.

10Дамаскын Анания нимо одӥг дышетскись вал. Кузё-Инмар адӟон пыр солы шуиз: «Анания!» Со шуиз: «Мон кылзӥсько, Кузё-Инмаре». 11Кузё-Инмар солы шуиз: «Султы но, ”Шонер” шуыса нимаськись ульчае мын, юа Иудалэн коркасьтыз Тарс карысь Савл нимо адямиез; со али вӧсяське. 12Солы возьматэмын вал, кызьы Анания нимо пиосмурт пыре но, со адӟыны мед кутскоз шуыса, со вылэ кизэ понэ». 13Анания ответ сётӥз: «Кузё-Инмаре! Мон трос муртъёслэсь кылӥ ни Тынад вӧсяськись калыкедлы пумит Иерусалимын кӧня урод ужъёс лэсьтӥз та адями. 14Татчы но со ваньзэс Тыныд оскисьёсты думылыны-кутылыны шуыса архиерейёслэсь басьтэм косонэн лыктэмын». 15Но Кузё-Инмар солы шуиз: «Мын, со – Мынэсьтым нимме язычникъёслы, эксэйёслы, израиль пиослы тодытыны Мынам быръем сосудэ.16Мон солы возьмато, Мынам нимы понна кӧня курадӟон адӟыны со кулэ!»17Анания мынӥз. Корка пырем бераз Савл вылэ кизэ поныса шуиз: «Савл брат! Кузё-Инмар Иисус, мыноно сюрес вылысеныд тыныд возьматскись, монэ ыстӥз, тынад синъёсыд мед усьтӥськозы но Святой Духен тыр мед луод шуыса».18Со куспын ик Савллэн син бордысьтыз чорыг сьӧм выллем маке усиз но, со адӟыны кутскиз. Соку ик со султыса пылатӥськиз.19Сиськем бераз кужым пыриз. Кӧня ке нунал ӵоже Савл дышетскисьёсын огазьын Дамаскын улӥз.

20Соку ик Савл сӥнагогаосын Иисус сярысь Со Инмар Пи луэ шуыса тодытыны кутскиз.21Ваньмыз кылзӥсьёс паймыса шуизы: «Та самой со ӧвӧл-а, кудӥз Иерусалимын та Нимлы вазиськисьёсты быдтыны тыршиз? Татчы но со ӧз-а лыкты соосты думылыса архиерейёс доры нуон понна?»22Нош Савл кужмогес но кужмогес тодытыны кутскиз. Дамаскын улӥсь иудейёсты со куалекъятӥз Иисус – Христос луэ шуыса дышетэменыз.

23Трос нуналъёс ортчем бере иудейёс сое виыны вераськизы.24Но соослэсь та урод малпанзэс Савл тодӥз; иудейёс уй но нунал, сое виён понна, кар капкаос дорын возьмаськыса улӥзы.25Соин ик дышетскисьёсыз уйин сое, корзинае пуктыса, борддор кузя васькытӥзы.

26Савл Иерусалиме вуиз но Иисуслэн дышетскисьёсыз борды кариськыны тыршиз; нош соос ваньзы, солэн дышетскись луэмезлы оскытэк, солэсь кышкаса улӥзы.27Нош Варнава сое, эш карыса, апостолъёс доры вайиз. Соослы вераз, кызьы Савл сюрес вылысен Кузё-Инмарез адӟиз но мар солы Кузё-Инмар вераз, кызьы со Дамаскын Иисуслэн нимыныз кышкатэк тодытӥз.28Лыктылыса-кошкылыса со Иерусалимын дышетскисьёсын огазьын каньылэн улӥз. Кузё-Инмарлэн Иисуслэн нимыз понна Ӟеч Иворез кышкатэк тодытӥз.29Озьы ик вераськылӥз ченгешоно луылэм грек кылын вераськись иудейёсын, нош соос Савлэз виыны малпазы.30Агай-вынъёс та сярысь тодэм беразы Савлэз Кесарияе келязы, отысен Тарс каре ыстӥзы.

31Та вадесын быдэс Иудеяысь, Галилеяысь, Самарияысь черкъёслы каньылэн улон дыр вуиз. Соос юнматскизы, Кузё-Инмарлэсь кышканэн улӥзы, Святой Духлэн дэлетэныз оскисьёслэн лыдзы тросгес но тросгес луиз.

32Котькытчы но вуылон сяменыз Петр адӟиськыны пыриз Лиддаысь вӧсяськисьёс доры.33Отысен со Еней нимо адямиез шедьтӥз. Со мурт тямыс ар ӵоже ини пери шуккем куеныз курадӟыса кылле вал.34Петр солы шуиз: «Еней! Тонэ Иисус Христос бурмытэ; султы валес вылысьтыд, окты валестэ». Еней соку ик султӥз.35Лидда карын, Сарон нёжалын улӥсьёс тае адӟем беразы ваньзы Кузё-Инмар пала берытскизы.

36Иоппияын Тавифа нимо одӥг дышетскись вал, солэн нимыз ”кыр кеч” шуэм луэ. Со трос ӟеч ужъёс лэсьтыса улӥз, ёрмыса улӥсьёслы трос юрттэт сётъяз.37Со нуналъёсы озьы луиз: Тавифа висьыны кутскиз но кулӥз. Сое гылтӥзы но коркалэн бадӟым палаз понӥзы.38Лидда но Иоппия каръёс ог-огзылы матын сыло. Дышетскисьёс Петр Иоппияын шуыса тодӥзы но соку ик со доры кык адямиосты, ӝегатскытэк со татчы мед лыктоз вал шуыса, ӧтьыны ыстӥзы.39Петр султӥз но соосын ӵош татчы лыктӥз. Вуэм бераз сое коркалэн бадӟым палаз пыртӥзы, вань палкышноос бӧрдыса сое котыртӥзы. Кыр Кечлэсь соосын огазьын улыкуз лэсьтылэм дэремъёссэ, дӥськутъёссэ возьматъязы.40Петр ваньзэс педло поттэм бераз пыдесъяськыса вӧсяськиз но кулэм мугор пала берытскыса шуиз: «Тавифа! Султы!» Тавифа синъёссэ усьтӥз но Петрез адӟыса пуксиз.41Петр солы, кизэ сётыса, султыны юрттӥз. Ваньзэс вӧсяськисьёсты, палкышноосты ӧтиз но соослы Тавифа улӟиз шуыса возьматӥз.42Быдэс Иоппияе та ивор вӧлмиз; та бере тросэз Кузё-Инмарлы оскыны кутскизы.43Петр трос нуналъёс ӵоже Иоппияын ку посӥсь Симон дорын улӥз.


*а 9:15 сосуд – татын: «Инмарлы ужась-тыршись» шуэмез возьматэ


предыдущая глава Глава 9 следующая глава