Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЛЭСЬ ӞЕЧ ИВОР

Глава 28

28-тӥ ЛЮКЕТ

1Суббота ортчем бере, арнялэн нырысетӥ нуналаз, ӟардон азьын Магдалина Мария но мукетыз Мария шайгу учкыны лыктӥзы.2Соку туж кужмо музъем зурказ – Кузё-Инмарлэн Кылчинэз, Инмысь васькыса, лыктӥз но шайгу ӧс бордысь изэз палэнтӥз, со вылын пукиз;3солэн тусбуйыз чилекъям кадь, дӥськутэз лымы кадь тӧдьы вал.4Солэсь кышкаса, возьмаськисьёс куалекъяны кутскизы, кулэм муртъёс кадесь луизы;5нош Кылчин, кышномуртъёслы вазиськыса, шуиз: «Эн кышкалэ, мон тодӥсько, тӥ кортӵогам Иисусэз утчаськоды шуыса.6Со татын ӧвӧл: кызьы вераз, Со улӟыса султӥз. Лыктэлэ, Кузё-Инмарлэсь кыллем интызэ учкелэ.7Ӝоггес мынэлэ но дышетскисьёсызлы вералэ, Со кулэмысь улӟыса султӥз шуыса. Со тӥляд азяды Галилеяе вуоз; отысен Сое адӟоды. Тани мон тӥледлы верай».8Шайгуысь шаплы потӥзы, кышкаса но туж шумпотыса, дышетскисьёсызлы ивортыны бызьыса мынӥзы.

9Дышетскисьёсызлы ивортыны мыныкузы, Иисус соосты пумитаз, соослы Со шуиз: «Шумпотэлэ!» Нош соос матаз лыктӥзы но, Иисуслэн пыд бордаз кутӥськыса, Солы йыбырттӥзы.10Соку Иисус соослы шуиз: «Эн кышкалэ. Мынэлэ, Мынам братъёсылы ивортэлэ. Галилеяе мед мынозы, отысен соос Монэ адӟозы».

11Соос мыныку, возьмаськисьёс пӧлысь куд-огез, городэ вуыса, архиерейёслы вань луэм учыр сярысь ивортӥзы.12Нош соос, тӧроосын валче люкаськыса, кенеш каризы, солдатъёслы трос коньдон сётыса13шуизы: «Вералэ, ми изьыку, Солэн дышетскисьёсыз уйин лыктыса лушказы Сое.14Та сярысь ивор кивалтӥсь доры вуиз ке, ми Сое оскытомы, тӥледыз но шугадӟонлэсь мозмытомы».15Коньдонзэс басьтыса лэсьтӥзы озьы, кызьы дышетэмын вал. Та кыл туннэ нуналозь иудейёс пӧлын вӧлмемын.

16Нош дас одӥгез дышетскисьёсыз Галилеяе, гурезе мынӥзы, отчы соосты Иисус мыныны косӥз вал.17Иисусэз адӟыса, Солы йыбырттӥзы, нош куд-огез оскытэк шекланӥзы.18Матазы лыктыса, Иисус соослы шуиз: «Инмын но, музъем вылын но Мыным котькыӵе кужым сётэмын.19Мынэлэ, вань калыкъёсты дышетэлэ; соосты Атайлэн, Пилэн, Святой Духлэн нимыз понна пылатэ,20ваньзэ, мае Мон тӥледлы косӥ, соосты быдэсъяны дышетэ; вань нуналъёсы, дунне бырытозь, Мон тӥледын огазьын». Аминь.


предыдущая глава Глава 28 следующая глава