Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЛЭСЬ ӞЕЧ ИВОР

Глава 27

27-тӥ ЛЮКЕТ

1Ӵукна вуэм бере вань архиерейёс, калыклэн тӧроосыз Иисус пумысен, Сое виыны сётон сярысь кенеш каризы.2Думылыса нуизы но Сое Понтий Пилатлы, кивалтӥсьлэн ки улаз, сётӥзы.

3Соку Сое вузась Иуда, Со судэ сётэмын шуыса адӟиз но ӧкыныса куамын коньы азвесь уксёзэ архиерейёслы, тӧроослы берыктӥз,4соослы шуиз: «Янгыштэм Вирез вузаса, мон сьӧлык лэсьтӥ». Нош соос Иудалы шуизы: «Милемлы маке шат? Учкы ачид».5Азвесь коньдонзэ храме зӥртыса, со потӥз но мыныса ошиськиз.6Архиерейёс азвесь коньдонъёсты басьтыса шуизы: «Храмлэн ваньбур тыроназ таосты поныны уг яра, малы ке шуоно та вирлэн дуныз».7Кенеш ортчытыса, со коньдонэн горшок лэсьтӥсьлэсь музъемзэ басьтӥзы, – палэнысь кулэм муртъёсты отчы ватон понна.8Соин ик туннэ нуналозь та музъем «Вир музъем» шуыса нимаське.9Соку быдэсмиз Иеремия пророк пыр верам кыл: «Басьтӥзы куамын азвесь коньдон – Дунъямлэсь дунзэ, – озьы дунъязы Израиль пиос,10но со уксёез, кызьы мыным вераз Кузё-Инмар, сётӥзы горшок лэсьтӥсьлэн музъемез понна».

11Иисус кивалтӥсь азе султӥз. Кивалтӥсь Солэсь юаз: «Тон иудейёслэн Эксэйзы-а?» Иисус солы шуиз: «Тон шуиськод».12Архиерейёс, тӧроос Сое янгыше уськытыкузы, Со номыр но ӧз вазьылы.13Соку Пилат Иисуслы шуиз: «Уд кылӥськы-а, Тыныд пумит кӧня янгыше уськытӥсь кылъёс верало?»14Одӥг кылызлы но Со ответ ӧз сёты, талы кивалтӥсь укыр паймиз.

15Кивалтӥсьлэн сямыз вал: Пасха понна, калыклэн куремезъя, одӥгзэ пытсэтэ сюрем муртэз лэзьыны.16Соку соослэн Варавва нимо тодмо пытсэтын пукисьсы вал.17Озьы соос люкаськем бере Пилат соослы шуиз: «Кинэ лэзьыны монэ куриськоды: Варавваез-а яке Христос шуон Иисусэз-а?»18Со тодэ вал уго, Иисусэз вожъяськеменызы сэрен кутыса сётӥзы шуыса.19Со куспын, судьялэн интыяз со пукон дыръя, кышноез солы вераны ыстӥз: «Та Шонер Улӥсьлы номыр но эн кары, малы ке шуоно туннэ мон уйвӧтам Со понна трос курадӟон адӟи».20Архиерейёс, тӧроос калыкез ӝутказы Варавваез курыны, нош Иисусэз – быдтыны.21Соку кивалтӥсь соослэсь юаз: «Кыксы пӧлысь кудзэс монэ лэзьытэмды потэ?» Соос шуизы: «Варавваез».22Пилат соослы шуиз: «Христос шуон Иисуслы мон мар каром?» Солы ваньзы шуизы: «Кортӵога!»23Кивалтӥсь шуиз: «Со кыӵе урод уж лэсьтӥз?» Нош соос уката но золгес кесяськыны кутскизы: «Кортӵога!»24Номыр но юрттымтэез, бугыръяськонлэсь кужмоямзэ адӟыса, Пилат ву басьтӥз, калык азьын кизэ миськиз но шуиз: «Та Шонер Улӥсьлэн вирыз понна мон янгыш ӧвӧл; учкелэ асьтэос».25Вань калык ответ сётыса шуиз: «Солэн вирыз ми вылын но, нылпиосмы вылын но».26Соку Варавваез мозмытӥз, нош Иисусэз жугытыса кортӵоганы сётӥз.

27Соку кивалтӥсьлэн солдатъёсыз, Иисусэз преторие вайыса, Со котыре быдэс полкез люказы.28Сое кыльыса, Солэн вылаз нап-горд басмалэсь шобыр дӥсязы.29Йыр вылаз тёрнпулэсь йыркерттэт пуныса изьыязы но Солы бур кияз боды сётӥзы. Солэн азяз пыдесъяськыса, Сое исамес карыса веразы: «Шумпот, иудейёслэн Эксэйзы!»30Солэн вылаз сялазы, боды кутыса, Солэн йыраз тышказы.

31Ултӥямысь дугдэм беразы Солэн вылысьтыз эксэй шобырзэ кылизы, Аслэсьтыззэ дӥськутсэ дӥсязы но кортӵоганы нуизы.32Потыкузы Киринеяысь Симон нимо пиосмуртэз соос пумитазы; сое Иисуслэсь кироссэ нуытӥзы.33Голгофа шуон интые вуыса, кудӥз «Кымес инты» шуэм луэ,34Иисуслы сэпен сурам уксус юыны сётӥзы; веръяз, но юэмез ӧз поты.35Сое кортӵогасьёс, пус чӧлтыса, Солэсь дӥськутсэ люкылӥзы;36отын Сое возьмаса пукизы.37Солэн йыр йылаз янгыше уськытонзэ возьматӥсь гожтэм пул шуккизы: «Та – Иисус, иудейёслэн Эксэйзы».38Соку Соин ӵош кортӵогазы кык йырвандӥсьёсты: одӥгзэ – бурпалаз, мукетсэ – паллян палаз.39Вӧзтӥз ортчисьёс, йыръёсынызы сэзъяса, Солы лек кылъёс веразы,40шуизы: «Храмез сэрттыса куиньмойскын Пуктӥсь! Уть Астэ Ачид; Инмар Пи ке Тон, киросысь васькы».41Таос кадь ик ултӥяса, архиерейёс книга тодӥсьёсын, тӧроосын, фарисейёсын вераськизы:42«Мукетъёссэ мозмытылӥз, нош Ассэ Ачиз мозмытэмез уг луы! Израильлэн Эксэез ке Со, киросысьтыз табере мед васькоз, соку ми Солы оскомы.43Инмарлы оскиськиз: Инмарлы Со ярано ке, табере Со мед мозмытоз Сое. Со шуиз ук: ”Мон Инмар Пи”».44Озьы ик Соин ӵош кортӵогаськем йырвандӥсьёс но Сое урод кылъёсын куаретӥзы.

45Куатетӥ часысен укмысэтӥ час котырозь быдэс дунне вылын пеймыт улӥз.46Укмысэтӥ час котырын Иисус бадӟым куараен кеськыса вераз: «Или, Или! Лама савахфани?» яке: «Инмаре! Инмаре! Малы Тон Монэ кельтӥд?»47Отын сылӥсьёс пӧлысь куд-огез тае кылыса шуизы: «Илияез Со ӧте».48Соку ик одӥгез бызьыса мынӥз, губкаез басьтыса, уксусэн тырмытӥз но, боды йылэ шедьытыса, Солы юыны сётӥз.49Нош мукетъёсыз шуизы: «Дугдэ ай, учком, Илия Сое мозмытыны лыктоз-а».

50Иисус нош ик бадӟым куараен вазиськиз, соку Солэн лулыз потӥз.51Со куспын ик храм пушкысь катанчи йылысеныз улӥозяз шорияк кесиськиз; музъем зурказ, изъёс пильылӥськизы.52Шайгуос усьтӥськизы но, трос кулэм святойёс мугоръёсынызы улӟыса султӥзы.53Шайгуосысьтызы потыса, Со улӟыса султэм бере, святой городэ лыктӥзы но тросэзлы возьматскизы.54Сю солдатэн кивалтӥсь но соин ӵош Иисусэз возьмасьёс музъем зуркамез – ваньзэ, мар луиз, адӟем беразы туж юн курдаса шуизы: «Зэм ик, Со Инмар Пи вал».55Отын трос вал Иисус сьӧры, Солы служить карыса, Галилеяысен лыктэм кышномуртъёс, соос палэнысен учкыса сылӥзы;56соос пӧлын вал Магдалина Мария, Иаковен Иосиялэн анайзы Мария но Зеведей пиослэн анайзы.

57Ӝыт вуэм бере Аримафеяысь Иосиф нимо узыр адями лыктӥз, со но Иисуслэн дышетскисез вал.58Пилат доры лыктыса, со Иисуслэсь Мугорзэ куриз. Соку Пилат Мугорзэ сётыны косӥз.59Мугорзэ басьтыса, Иосиф сое чылкыт тӧдьы дэраен шобыртӥз но60аслаз выль шайгуаз понӥз, со гурезьысь из пушкы гудӟыса лэсьтэмын вал. Кошкыкуз шайгуэ пырон ӧс борды бадӟым из пыкъяса кельтӥз.61Отын Магдалина Марияен ӵош мукетыз Мария вал. Соос шайгулы ваче пумитын пукизы.

62Пятница бӧрсьы лыктӥсь нуналэ Пилат доры архиерейёс, фарисейёс люкаськизы,63соос шуизы: «Кузё! Ми тодамы вайимы, кызьы со пӧяськись эшшо улэп дыръяз вераз: ”Куинь нунал бере улӟыса султо”.64Озьы бере, куинь нунал ортчытозь, шайгузэ возьманы кос: Солэн дышетскисьёсыз, уйин лыктыса, Сое медаз лушкалэ но калыклы медаз шуэ: ”кулэмысь улӟыса султӥз”. Соку берпуметӥез пӧяськон нырысетӥезлэсь но уродгес луоз».65Пилат соослы шуиз: «Возьмаськисьёсты вань; кызьы тодӥськоды, мынэлэ но возьмалэ».66Соос мыныса шайгу доры возьмаськисьёсты пуктӥзы, из вылэ печать нюртӥзы.


*а 27:29 тёрнпу – шиё-венё бышкись будос

*б 27:33 Кымес инты – ӟуч кылын: Лобное место; арамей кылын: Голгофа


предыдущая глава Глава 27 следующая глава