Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАРКЛЭСЬ ӞЕЧ ИВОР

Глава 1

1-тӥ ЛЮКЕТ

1Инмарлэн Пиезлэн Иисус Христослэн Евангелиезлэн кутсконэз.2Та гожтэмын пророкъёслэн книгаязы:

«Тани, Мон Тынад азьтӥд Кылчинме лэзисько,
со Тынад азяд Тыныд сюрес дасялоз».
3«Кыр дуннеын кеськисьлэн куараез:
Кузё-Инмарлы сюрес дасялэ, шонертэлэ Солы сюресэз».

4Иоанн лыктӥз, со кыр дуннеын пылатӥз, сьӧлыкъёсты куштон понна ӧпкельыса пылатӥськон сярысь тодытӥз.5Со доры быдэс Иудея музъемын, Иерусалимын улӥсьёс лыктӥзы; соос ваньзы сьӧлыкъёссэс Иоаннлы веразы, Иоанн соосты Иордан шурын пылатӥз.6Иоаннлэн дӥсянэз верблюд гонлэсь вал; куссэ сюмыс кускерттонэн думыса ветлӥз; ӟозъёсыз, кыр мушъёслэсь чечызэс сиыса улӥз.7Со тазьы тодытыса вераз: «Мон сьӧртӥ мынэсьтым Кужмоез лыктэ, Солэн пыдкутчанэзлэсь езэ мыкыртӥськыса пертчыны но мон ярамон ӧвӧл.8Мон тӥледыз вуэн пылатӥ, нош Со тӥледыз Святой Духен пылатоз».

9Со нуналъёсы Галилеяысь Назарет карысь Иисус лыктӥз но Иоанн пыр Иордан шурын пылатӥськиз.10Иисус вуысь потыку, инбамлэсь ваяк усьтӥськемзэ но Со вылэ дыдык выллем васькись Духез Иоанн адӟиз.11Инмысен куара кылӥськиз: «Тон Мынам Яратоно Пие, Тон бордын Мынам ӟеч эрике».

12Соку ик Дух Сое кыр дуннее нуиз.13Кыр дуннеын Со ньыльдон нунал улӥз, шайтан визьзэ сыназ; пӧйшуръёсын огазьын улӥз; Кылчинъёс Солы юрттӥськыса улӥзы.

14Иоаннэз возьмаськисьёслэн киулазы сётэмзы бере, Инмар Эксэйлыклэсь Евангелизэ тодытыса, Иисус Галилея музъеме лыктӥз.15Со шуиз: «Дыр вуиз но, матэ луиз Инмар Эксэйлык: ӧпкельыса сьӧлыкъёстылэсь куштӥське, Евангелилы оскелэ».

16Галилей зарезь дортӥ ортчыкуз, калтон куштыса улӥсь Симонэз но солэсь Андрей вынзэ адӟиз, соос чорыгасьёс вал.17Иисус соослы шуиз: «Ойдолэ Мон сьӧры, Мон тӥледыз адями кутылӥсь каро».18Калтонъёссэс куштӥзы но соку ик соос Иисус сьӧры мынӥзы.19Отысен ӧжытак мынэм беразы пыжын калтонзэс кышъяса пукись Зеведей пи Иаковез но солэсь вынзэ Иоаннэз адӟиз,20соку ик соосты Со Ас бӧрсяз ӧтиз. Асьсэлэсь атайзэс, Зеведеез, пыжын ужасьёсыныз валче кельтыса, соос Со сьӧры мынӥзы.

21Капернауме вуизы; ӝоген, суббота нуналэ, Со сӥнагогае пыриз но дышетыны кутскиз.22Солэн дышетонэзлы паймизы, Со уго соосты, книга тодӥсьёс сямен ӧз, кузё мурт кадь дышетӥз.23Соослэн сӥнагогаязы перияськем адями вал, со кеськиз:24«Эй, Назаретысь Иисус, кошкы! Ми бордын Тынад мар ужед? Тон милемыз быдтыны лыктӥд! Мон тодӥсько, кин Тон, Инмарлэн Святоез».25Нош Иисус сое дугдытыса шуиз: «Чалмытскы, пот со пушкысь».26Соку пери сое сэзъяз-куалекъятӥз но, бадӟым куараен черектӥськыса, солэн пушкысьтыз потӥз.27Ваньзы туж паймизы но ог-огзылэсь юалляськизы: «Мар та таӵе? Кыӵе таӵе та выль дышетон – кузё кариськыса, периосты косэ но, соос Солэсь кылзӥсько?»28Ӝоген Со сярысь ивор быдэс Галилея музъеме вӧлмиз.

29Сӥнагогаысь чаляк потӥзы но Иаковен Иоаннэн ӵош Симонэн Андрейлэн гуртазы лыктӥзы.30Симонлэн вармумиез пӧськылен висьыса кылле вал; со кышномурт сярысь соку ик Иисуслы веразы.31Дораз лыктӥз но, китӥз кутыса, сое султытӥз; пӧськылез соку ик быриз. Табере та кышномурт таослы юрттӥськыса улыны кутскиз.32Ӝыт пал, шунды пуксем бере, Со доры вань висись, перияськем адямиосты вайизы.33Быдэс город ӧс выжые люкаськиз.34Пӧртэм висёнъёсын курадӟисьёсты троссэ Со бурмытӥз; трос периосыз улляса поттӥз. Аслэсьтыз Христос луэмзэ Со периослы вераны ӧз лэзьы.

35Нош ӵукна вазь ик султыса потӥз но, калыктэм интые кошкыса, отын вӧсяськыса улӥз.36Симон но соин огазьын ветлӥсьёс Со сьӧры мынӥзы.37Сое шедьтэм беразы Солы шуизы: «Тонэ ваньмыз утчало».38Иисус соослы шуиз: «Ойдолэ мыноме матысь гуртъёсы, городъёсы. Мон отын но тодытыны кулэ, со понна ик Мон лыктӥ уго».39Быдэс Галилея музъемысь соослэн сӥнагогаостӥзы тодытыса ветлӥз, периосты улляса поттаз.

40Со доры гижлочерен висись мурт лыктӥз но сюлворыса, Солэн азяз пыдесъяськыса, шуиз: «Чылкытатэмед потӥз ке, Тынад монэ чылкытатэмед луоз».41Иисус сое жаляз, кизэ ӝутыса, со борды йӧтӥськиз но солы шуиз: «Мынам чылкытатэме потэ, чылкыта».42Та кылъёс бере висисьлэн мугорысьтыз соку ик гижлоосыз быризы, со чылкыт луиз.43Юн алыса, Иисус соку ик сое келяса шуиз:44«Уть, нокинлы но номыр эн вера; священник доры мыныса, солы возьматӥськы, мугорыд чылкыт луэм понна, Моисейлэсь косэмзэ ну, соослы тодытон понна».45Нош со мурт татысь потӥз но асэныз луэм учыр сярысь ваньмызлы вераны кутскиз, соин сэрен Иисус городэ чакласькытэк пырыны ӧз быгаты ини, город сьӧрысь калык ветлонтэм интыосын Со улӥз. Со доры пӧртэм палъёсысь адямиос лыктылӥзы.


*а 1:2 Мал. 3:1

*б 1:3 Ис. 40:3


предыдущая глава Глава 1 следующая глава