Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЛЭСЬ ӞЕЧ ИВОР

Глава 26

26-тӥ ЛЮКЕТ

1Иисус вань та кылъёссэ вераса быдтэм бераз Аслаз дышетскисьёсызлы шуиз:2«Тӥ тодӥськоды, кык нунал ортчыса, Пасха луоз шуыса, соку Адями Пи кортӵоганы сётэмын луоз».

3Со виын архиерейёс но, книга тодӥсьёс но, калыклэн тӧроосыз но Каиафа нимо архиерейлэн азбараз люкаськизы,4кенешазы Иисусэз кескич амалэн кутыса виён сярысь вераськизы;5«Калык пӧлын бугыръяськон медаз ӝутӥськы, та ужез праздник нуналэ ум лэсьтэ» шуизы.

6Иисус Вифанияысь гижлочерен висись Симонлэн корказ улыку,7Со доры, алавастр посудаен дуно миро вайыса, кышномурт лыктӥз но Солэн, сиськыса кыллись муртлэн, йыр вылаз сое кисьтӥз.8Тае адӟем беразы дышетскисьёсыз йыркуръяськыса шуизы: «Малы юнме арам каронэз?9Та мироез дуно дунын вузаны но кураськисьёслы сётъяны луысал ук».10Нош Иисус, тае валаса, соослы шуиз: «Малы тӥ кышномуртэз кепыр вайытӥськоды? Со Мон понна ӟеч уж лэсьтӥз.11Кураськисьёс ялан тӥ котырын, нош Мон ялан тӥледын огазьын ӧвӧл.12Мынам Мугор вылам мирозэ кисьтыса, со Монэ ватыны дасяз.13Зэм ик тӥледлы верасько: быдэс дунне вылын, кытын гинэ та Евангелие тодытэмын луиз, сое буре вайыса, солэн мар каремез сярысь котькытын но верамын луоз».

14Соку дас кык пӧлысь одӥгез, Искариот Иуда нимоез, архиерейёс доры мыныса,15соослы шуиз: «Мон Сое кутыса сётӥ ке, мар тӥ мыным сётоды?» Соос солы куамын азвесь коньдон ӵектӥзы.16Та дырысен, Сое кутыса сётон понна, Иуда кельшымон учыр утчаса улӥз.

17Юмал нянь сиёнлэн нырысетӥ нуналаз ик Иисус доры дышетскисьёсыз лыктыса шуизы: «Кытчы Тыныд Пасхалы ыжпиез вандыса дасяны косӥськод?»18Со шуиз: «Мынэлэ городэ сыӵе-сыӵе мурт доры но солы шуэлэ: ”Дышетӥсь шуэ: Мынам дыры матэктӥз, тон дорын Аслам дышетскисьёсыным Пасхаез ортчыто”».19Дышетскисьёсыз лэсьтӥзы озьы, кызьы Иисус косӥз, Пасхалы ыжпиез вандыса дасязы.

20Ӝыт вуэм бере Со дас кык дышетскисьёсыныз огазе пуксиз.21Сиськыкузы шуиз: «Зэм ик тӥледлы верасько: тӥ пӧлысь одӥгез Монэ вузаса сётоз».22Соос туж ӝожомизы, ваньзы ик Солы вераны кутскизы: «Кузё-Инмаре! Мон ӧвӧл-а?»23Нош Со ответ сётыса шуиз: «Монэн ӵош тусьтые кизэ лэзись, со Монэ вузаса сётоз.24Адями Пи мынэ ке но, кызьы Со сярысь гожтэмын вал, но Сое вузаса сётӥсь муртлы, кудӥз пыр Адями Пи вузаське, куректон луоз: со ӧй ке вордӥськысал, солы умойгес луысал».25Сое вузась Иуда но шуиз: «Равви, мон ӧвӧл-а?» Иисус солы шуиз: «Тон шуид».

26Сиськон дыръязы Иисус нянь басьтӥз, бакель карыса тӥялтӥз но дышетскисьёсызлы сётъяса шуиз: «Басьтэлэ, сиелэ: та Мынам Мугоры».27Чаша кутыса, тау карыса, соослы сётыса шуиз: «Ваньды татысь юэлэ;28уго та Мынам трос адямиослэсь сьӧлыкъёссэс куштон понна кисьтӥськись Выль Сӥзён Виры.29Тӥледлы верасько: Атаелэн Эксэйлыказ тӥледын огазьын выль вина юон нуналозям та виноград емышлэсьсэ винаез Мон уг ни юы».

30Вӧсь гуръёс чирдыса, Елеон гурезе кошкизы.31Соку Иисус соослы вераз: «Та уе ваньды тӥ Мон бордысь куштӥськоды, гожтэмын уга: ”Ыж возьмасьсэ погырто но, уллёысьтыз ыжъёсыз пазьгиськозы”.32Улӟыса султэм берам Мон тӥледыз Галилеяысен азьпалто».33Петр Солы ответ сётыса шуиз: «Ваньзы но Тынэсьтыд куштӥськизы ке, мон ноку но Тынэсьтыд уг куштӥськы».34Иисус солы шуиз: «Зэм ик тыныд верасько: та уе, атас чортытозь, куинь пол тон Мон бордысь куштӥськод».35Петр Солы шуиз: «Тонэн ӵош мыным кулоно ке но луиз, Тон бордысь уг куштӥськы». Мукет дышетскисьёсыз но ваньзы тазьы ик веразы.

36Собере Иисус, соосын ӵош Гефсимания шуон интые лыктыса, дышетскисьёсызлы шуиз: «Мон отчы мыныса вӧсяськытозь тӥ татын пукелэ».37Сьӧраз Петрез но кыксэс ик Зеведей пиосты басьтӥз; куректыны, курадӟыны кутскиз.38Соку Иисус соослы шуиз: «Мынам лулы кулоно кадь ик куректэ; татын улэ, Монэн ӵош сак улэ».

39Ӧжытак палэнэ кошкиз но, музъем вылэ ымныр вылаз выдыса, вӧсяськыса шуиз: «Атае! Луоно ке, Мон вӧзтӥ мед ортчысал та чаша; но, Мыным кызьы кулэ, озьы эн кар, озьы кар, кызьы Тыныд кулэ».40Дышетскисьёсыз доры лыктӥз, адӟиз: ваньмыз умме усемын. Соку Со Петрлы шуиз: «Тӥляд одӥг час но Монэн валче сак улэмды ӧз лу-а?41Визь сынаськонэ медад сюре шуыса, сак улэ, вӧсяське: дух сэзь, нош лулмугор кужымтэм».42Эшшо кыкетӥ ползэ Со кошкиз но тазьы вераса вӧсяськиз: «Атае! Мон медам юы шуыса, та чашалэн Монэ ортчемез уг ке луы, Тынад эрикедъя мед луоз».43Берен вуыкуз, адӟиз: нош ик ваньмыз умме усемын: синъёссэс ум нюртэм.44Соосты кельтыса, нош ик кошкиз но, со кылэз ик вераса, куинетӥ ползэ вӧсяськиз.45Соку, Аслаз дышетскисьёсыз доры лыктыса, соослы шуиз: «Тӥ ялан изиськоды, кыллиськоды на? Тани, час вуиз но, Адями Пиез сьӧлыкоос кие сёто.46Султэлэ, мыноме: тани, Монэ вузась мурт матам лыктӥз ини».

47Со вераськон куспын дас кык дышетскисьёсыз пӧлысь одӥгез, Иуда, вуиз. Соин ӵош мечъёс, зыръёс кутыса, архиерейёслэн, калык тӧроослэн лэзем трос адямиоссы лыктӥзы.48Сое вузась мурт соослы тодмет сётыса шуиз: «Кинэ мон чупало, Со ик вань Со, кутэ Сое».49Со куспын ик, Иисус доры лыктыса, «Шумпот, Равви!» шуиз но чупаз Сое.50Нош Иисус солы шуиз: «Юлтош, мар понна тон лыктӥд?» Соку, дораз лыктыса, Иисусэз кырмизы, ки улазы басьтӥзы.51Тани, Иисусэн ветлӥсьёс пӧлысь одӥгез, кизэ ӝутыса, мечсэ поттӥз но архиерейлэн ляльчиезлэсь пельзэ ӵогыса уськытӥз.52Соку Иисус солы шуиз: «Мечтэ аслаз интыяз пон, ваньмыз меч кутэмъёс мечлэсь бырозы уго.53Оло, Мон али Атаелэсь курыны уг быгатӥськы но, Со Мыным дас кык легионлэсь трос Кылчинъёссэ уз лэзьы шуыса малпаськод-а?54Кызьы бен быдэсмозы Гожтэмъёс, кудъёсыз верало, озьы луыны кулэ шуыса?»55Соку ик Иисус калыклы шуиз: «Йырвандӥсь мурт доры сямен мечъёсын, зыръёсын Монэ кутыны потӥды. Вань нуналъёсы Мон тӥледын храмын дышетыса пуки, нош тӥ Монэ ӧд кутэ.56Ваньмыз но та луиз, мед быдэсмозы пророкъёслэн гожъямъёссы». Соку, Сое кельтыса, ваньмыз дышетскисьёсыз бызьыса кошкизы.

57Иисусэз басьтӥсьёс Сое Каиафа архиерей доры нуизы, отчы книга тодӥсьёс, тӧроос люкаськизы.58Нош Петр палэнэтӥ Со бӧрсьы архиерейлэн азбар дорозяз мынӥз; пумзэ адӟон понна, пушказ пырыса, медоосын огазе пуксиз.59Архиерейёс, тӧроос – сӥнедрионын вань пукисьёс, Иисуслы пумит, Сое виыса сётон вылысь ӧвӧлтэм шекъёссэ утчазы,60но ӧз шедьтэ. Трос ӧрекчаськыса ӧвӧлтэмзэ верасьёс вуылӥзы ке но, шекъёссэ ӧз шедьтэ. Нош пумаз кыкез ӧрекчаськыса ӧвӧлтэмзэ верасьёс лыктыса61шуизы: «Со вераз: быгатӥсько, пе, Инмар храмез куашкатыны но куинь нунал куспын сое пуктыны».62Архиерей султыса Солы шуиз: «Тон номыр но уд-а вераськы? Маин соос Тонэ янгыше уськыто?»63Иисус ӧз вазьы. Архиерей Солы шуиз: «Улэп Инмарен мон Тонэ курисько, вера милемлы, Тон-а Христос, Инмар Пи?»64Иисус солы шуиз: «Тон шуид; эшшо верасько на тӥледлы: азьланяз тӥ, Кужымлэн бурпалаз пуксьыса, ин пилемъёс вылын лыктӥсь Адями Пиез адӟоды».65Соку архиерей дӥськутсэ шорияк кесьыса шуиз: «Со Инмарез сантэма! Малы кулэ на асьмелы адӟисьёс? Тани табере тӥ кылӥды Солэсь Инмарез сантэмамзэ!66Мар тӥ шуоды?» Нош соос, ответ сётыса, «виыны кулэ» шуизы.67Соку Солэн ымныраз сялазы, Сое мыжгазы, нош мукетъёсыз Солэн бамаз тышкаса68шуизы: «Христос, тодмад ке, кин Тонэ шуккиз, вера милемлы».

69Нош Петр педлон, азбарын пукиз. Со доры одӥгез медо кышномурт лыктыса шуиз: «Тон но Галилеяысь Иисусэн огазьын вал».70Нош со ваньмыз азьын танӥськыса шуиз: «Уг тодӥськы, мар тон вераськод».71Капка сьӧры потыкуз, мукетыз кышномурт, сое адӟыса, отын сылӥсьёслы шуиз: «Та но Иисус Назореен ӵош вал».72Со, нош ик кыл сётыса, Та Адямиез уг тодӥськы шуыса танӥськиз.73Ӧжыт улыса, отын сылӥсьёс Петр доры лыктыса шуизы: «Зэм ик, вераськемедъя ик тонэ тодманы луэ, тон соос пӧлысь шуыса».74Соку со кыл сётыса, танӥськыса шуиз: «Та Адямиез уг тодӥськы». Соку ик атас чортӥз.75Соку Петр тодаз вайиз, Иисуслэсь «атас чортытозь, куинь пол тон Мон бордысь куштӥськод» шуэм кылзэ. Педло потыса, туж зол бӧрдӥз.


предыдущая глава Глава 26 следующая глава