Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЛЭСЬ ӞЕЧ ИВОР

Глава 25

25-тӥ ЛЮКЕТ

1«Соку Ин Эксэйлык, тыл ӝуатон басьтыса, эмеспиез пумитаны потэм дас нылъёслы укшалоз.2Соос пӧлысь витез визьмоесь вылӥллям, нош витез – нодтэмесь.3Нодтэмъёсыз тыл ӝуатонзэс басьтӥллям, нош вӧй басьтӥллямтэ;4визьмоосыз тыл ӝуатонэнызы ӵош пиялаосазы вӧй басьтӥллям.5Эмеспи ӝегамен сэрен ваньзы нырулӥллям, умме усиллям.6Уйшорын кеськем куара кылӥськем: ”Эмеспи лыктэ, потэлэ солэн пумитаз!”7Соку ваньзы та нылъёс султӥллям но асьсэлэсь тыл ӝуатонъёссэс тупатӥллям.8Нодтэмъёс визьмоосызлы шуиллям: ”Ваелэ милемлы вӧйдэс, милям тыл ӝуатонъёсмы кысо”.9Нош визьмоосыз ответ сётыса шуиллям: ”Ми но, тӥ но медам ёрме шуыса, вӧй вузасьёс доры мыныса, тӥ асьтэлы басьтэлэ”.10Соос басьтӥськыны кошкем бере эмеспи вуэм но дасьёсыз соин ӵош сюан юонэ пыриллям, ӧсъёс ворсаськиллям.11Собере мукетъёсыз нылъёс вуо, соос шуо: ”Кузёмы! Кузёмы! Усьты милемлы”.12Нош со ответ сётыса шуэ: ”Зэм ик тӥледлы верасько: уг тодӥськы тӥледыз”.13Озьы бере, сак улэ! Адями Пилэсь лыктон нуналзэ но, чассэ но уд тодӥське уго.

14Ляльчиоссэ ӧтьыса, юртъерзэ соос кие кельтыса, мурт шаере кошкись адями кадь Со лэсьтоз:15одӥгезлы со вить талант коньдонзэ сётэм, мукетызлы кык, куд-огезлы – одӥг, ваньзылы кужымезъя. Собере ачиз кошкем.16Вить талант басьтӥсь мурт мынэм но соосты уже кутэм, эшшо вӧзаз вить талант утэм.17Чылкак тазьы ик лэсьтэм кык талант басьтӥсь но, вӧзаз кык талант утэм на.18Нош одӥг талант басьтӥсь мурт мынэм но сое сюе согем, кузёезлэсь азвесьсэ ватэм.19Кема дыр ортчыса, та ляльчиослэн кузёзы вуэм но лэсьтэм ужзэс вераны косэм.20Вить талант басьтӥсь мукетъёссэ вить талантъёссэ вайыса шуэм: ”Кузё! Тон мыным вить талант сётӥд; тани мукетъёсыз вить талантъёс, соослы мон утӥ”.21Кузёез солы шуэм: ”Ярам, лякыт, оскиськымон ляльчи! Ӧжытын тон оскымон вал, табере тонэ тросэзлы вылӥ карыса пукто; кузёеныд валче шумпот”.22Кык талант басьтӥсь но лыктыса шуэм: ”Кузё! Тон мыным кык талант сётӥд; тани мукетъёсыз кык талантъёс, соослы мон утӥ”.23Кузёез солы шуэм: ”Ярам, лякыт, оскиськымон ляльчи! Ӧжытын тон оскымон вал, табере тонэ тросэзлы вылӥ карыса пукто; кузёеныд валче шумпот”.24Одӥг талант басьтӥсь но лыктыса шуэм: ”Кузё! Мон тодӥсько вал, тон лек адями шуыса, араськод кизьымтэ интыысьтыд, бичаськод кисьтымтэ интыысьтыд.25Кышкай но мыныса таланттэ сюе ватӥ; ме, басьты аслэсьтыдзэ”.26Нош кузёез солы ответ сётыса шуэм: ”Кескич ляльчи, азьтэм! Тон тодӥськод вал кизьымтэ интыысь арамме, кисьтымтэ интыысь бичамме.27Соин ик тыныд азвесьме коньдон вошъясьёслы сётоно вал, соку мон вуысал но аслэсьтым люкетме пайда поттыса басьтысал.28Табере, солэсь талантсэ басьтыса, дас талантэз ванё муртлы сётэ.29Уго ванё муртлы сётӥськоз, эшшо ватсаськоз. Нош ӧвӧло муртлэн, маиз вань, созэ но басьтозы.30Нош лэсянтэм ляльчиез сэрпалтэ педло пеймыт азе: отын бӧрдон, пинь сыскон луоз”». Тае верам бераз бадӟым куараен шуиз: «Кылыны пельыз вань мурт – мед кылоз!»

31«Адями Пи Аслаз данэныз, Соин валче вань святой Кылчинъёс лыктэм бере Со Аслаз пиштӥсь данлыкезлэн пукон вылаз пуксёз.32Соку Со азе вань калыкъёс люкаськозы; одӥгъёссэ мукетъёсызлэсь висъялоз, кызьы пудо возьмась ыжъёсты висъя кечъёслэсь.33Ыжъёсты Аслаз бурпалаз кароз, нош кечъёсты – палляназ.34Соку Аслаз бурпаласьёсызлы Эксэй шуоз: ”Лыктэлэ, Мынам Атаелэн бакель карем муртъёсыз, басьтэлэ дунне кылдэм дырысен тӥледлы дасям Эксэйлыкез:35Уго Мынам сиеме потӥз но, тӥ Монэ сюдӥды; сюэ куасьмиз но, тӥ Монэ сектады; пыдйылчи вал, тӥ Монэ гуртады пыртӥды;36гольык вал, тӥ Монэ дӥсяды; висисько вал, тӥ Монэ утялтӥды; пытсэтын вал, тӥ Мон доры лыктӥды”.37Соку шонер улэмъёс, ответ сётыса, Солы шуозы: ”Кузё-Инмармы! Ку ми Тынэсьтыд сием потэмдэ адӟимы но Тонэ сюдӥмы? Сюэд куасьмыку, сектамы?38Ку ми Тонэ, пыдйылчи дыръяд адӟыса, гуртамы пыртӥмы? Гольык дыръяд дӥсямы?39Ку ми Тонэ висьыкуд яке пытсэтысь адӟимы но Тон доры лыктӥмы?”40Нош Эксэй соослы ответ сётыса шуоз: ”Зэм ик тӥледлы верасько: тае тӥ Мынам покчи братъёсы пӧлысь одӥгезлы лэсьтӥды бере, тӥ сое Мыным лэсьтӥды”.

41Соку паллян паласьёсызлы но вералоз: ”Мынэлэ Мон дорысь, каргамъёс, диаволлы но солэн кылчинъёсызлы дасям ноку но кысылӥсьтэм тыл пӧлы:42Уго Мынам сиеме потӥз, но тӥ Мыным сиён ӧд сётэ; юэме потӥз, но Монэ ӧд секталэ;43пыдйылчи вал, но Монэ ӧд пыртэ; гольык вал, но Монэ ӧд дӥсялэ; виси, пытсэтын вал, но Мон доры ӧд лыктэ”.44Соку соос но Солы ответ сётыса шуозы: ”Кузё-Инмар! Ку ми Тонэ сютэм дыръяд яке сюэд куасьмыку, яке пыдйылчиын ветлыкуд, яке гольык дыръяд, яке висьыкуд, яке пытсэтысь адӟимы но Тыныд ужаса-тыршыса ӧм улэ?”45Соку соослы ответ сётыса шуоз: ”Зэм ик тӥледлы верасько: тае покчиос пӧлысь одӥгезлы тӥ ӧд лэсьтэ бере, тӥ сое Мыным ӧд лэсьтэ”.46Таосыз мынозы пумтэм курадӟонэ, нош шонер улэмъёс – быронтэм улонэ».


предыдущая глава Глава 25 следующая глава