Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЛЭСЬ ӞЕЧ ИВОР

Глава 24

24-тӥ ЛЮКЕТ

1Иисус храмысь потыса кошке вал. Со доры дышетскисьёсыз лыктӥзы, храмлэсь юртъёссэ Солы возьматыны шуыса.2Нош Иисус соослы шуиз: «Тае ваньзэ адӟиськоды-а? Зэм ик тӥледлы верасько: татчы из вылэ из но уз кыльы – ваньмыз куашкатэмын луоз».

3Елеон гурезьын пукон дыръяз дышетскисьёсыз, асьсэ понна гинэ Со доры лыктыса, Солэсь юазы: «Вера милемлы, ку та луоз? Тынад лыктонэдлэн но дунне быронлэн кыӵе тодметэз луоз?»4Соослы ответ сётыса, Иисус шуиз: «Чакласькелэ, нокин но визьдэс медаз туга;5малы ке шуоно тросэз Мынам нимыным лыктозы но, ”Мон – Христос” шуыса, тросэзлэсь визьзэ тугалозы.6Ожъёс, ожмаськонъёс сярысь иворъёс кылоды. Учкелэ, эн кышкатске, ваньмыз та луоно уго. Но та пумыз ӧвӧл на:7Калык калыклы, эксэйлык эксэйлыклы ваче пумит султозы, сютэм аръёс, урод черъёс луозы, интыен-интыен музъем зуркалоз.8Ваньмыз ик та висёнъёслэн кутсконзы.9Соку тӥледыз курадӟытыны сётозы, виылозы; Мынам нимы понна тӥледыз вань калыкъёс адӟемпотостэм карозы.10Тросэз соку сьӧлыке пырозы; огзэс огзы кутыса сётозы, ог-огзэс адӟемпотостэм карозы.11Трос ӧрекчи пророкъёс потозы но тросэзлэсь визьзэс тугалозы.12Законлы пумит улэмен сэрен тросэзлэн яратонэз сӥялоз.13Нош пумозяз чидам мурт утиськоз.14Вань калыкъёс мед тодозы шуыса, Эксэйлыклэн та Евангелиез быдэс дунне вылын тодытэмын луоз; собере пум вуоз.

15Озьыен, Даниил пророк пыр верам святой интыын сылӥсь юрӟым куашканэз адӟиды ке, – лыдӟись мурт мед валалоз, –16соку Иудея музъеме учырамъёс гурезьёсы мед пегӟозы.17Кин липет йылын, со медаз васькы, коркасьтыз марзэ ке но басьтыны шуыса.18Кин бусыын, со медаз ни берыктӥськы, дӥськутсэ басьтыны шуыса.19Кайгу луоз со нуналъёсы нуны ваёноослы, нуны нонтӥсьёслы!20Вӧсяськелэ, пегӟоно нуналды толалтэ яке суббота нуналэ медаз учыра шуыса.21Соку уго бадӟым куректон луоз, кыӵеез дуннелэн кутсконысеныз туннэ нуналозь ӧй на вал, уз но луы.22Со нуналъёс ӧй ке вакчиёмысалзы, одӥг улэп мурт но ӧй утиськысал; но быръем адямиос понна со нуналъёс вакчиёмозы.

23Соку тӥледлы кин ке но ”тани татын Христос” яке ”тӥни отын” шуиз ке, – эн оскелэ.24Малы ке шуоно султозы пӧяськись христосъёс, ӧрекчи пророкъёс, бадӟымесь паймымон тодметъёс но паймымон ужъёс лэсьтыса, луиз ке, быръем муртъёслэсь но визьзэс туганы соос тыршозы.25Тани, Мон тӥледлы азьвыл ик та сярысь ялӥ.26Озьыен, шуизы ке тӥледлы: ”тани Со кыр дуннеын,” – эн потэлэ; ”тани Со ватӥськон висъетын”, – эн оскелэ.27Кызьы шундыӝужанын чилектэ ке, солэн воректэмез шундыпуксёнозь адӟиське, озьы ик луоз Адями Пилэн но лыктонэз.28Кытын шӧй, отчы ӧрӟиос люкаськозы.29Соку ик, со куректон-курадӟон нуналъёс бере, шунды пеймытомоз, толэзь но аслэсьтыз югытсэ уз сёты ни, инмысь кизилиос усёзы, ин кужымъёс вырӟозы.30Соку инбамын Адями Пилэн тодметэз возьматскоз; соку музъем вылысь вань калык выжыос бӧрдозы но быдӟым кужымен, пиштӥсь данлыкен ин пилемъёс вылын лыктӥсь Адями Пиез адӟозы.31Аслэсьтыз Кылчинъёссэ бадӟым куараё гумыен ыстоз но дуннелэн ньыль палысьтыз, инлэн вань пумъёсысьтыз Солэсь быръем адямиоссэ люкалозы.

32Смоквапулэсь адӟем каре: улвайёсыз небӟыса куар поттыны кутско ке, гужем матын ни шуыса тодӥськоды.33Озьыен, ваньзэ тае адӟиды ке, тодэлэ, матэ, ӧс выжые, вуиз ини шуыса.34Зэм ик тӥледлы верасько: та выжы бырытозь, ваньмыз но та луоз.35Ин но музъем бырозы, нош Мынам кылъёсы уз быре.

36Нош со нуналэз но часэз, одӥг Мынам Атае сяна, Инмысь Кылчинъёс но, нокин но уг тоды.37Ной улон нуналъёсы кызьы луэм, озьы ик луоз Адями Пилэн лыктонэз но:38кызьы дуннеез ву нюртон нуналъёс азьын, Ной пыжаз пырытозь, сииллям, юиллям, кышнояськиллям, бызиллям,39малпаллямтэ но, бадӟым ву лыктыса ваньзэс быдтытозь, – озьы ик луоз Адями Пилэн лыктонэз но.40Соку кык ӵошен бусыын луозы: одӥгез басьтэмын луоз, нош мукетыз кельтэмын луоз.41Кӧ дурын кык ӵошен пызь изо: одӥгез басьтэмын луоз, нош мукетыз кельтэмын луоз.42Озьыен, сак улэ, уд тодӥське уго, кӧняетӥ часын Кузё-Инмарды лыктоз.43Но тазэ тӥ тодӥськоды: юртлэн кузёез лушкаськисьлэсь уйлэн мар вадесаз лыктэмзэ тодысал ке, со сак улысал но юртаз гудӟиськыса пырыны ӧй лэзьысал.44Соин ик тӥ но дась луэ, Адями Пи малпамтэ часады лыктоз уго.

45Кин меда со кузёлэн аслаз медоосызлы ас дыраз сиён сётъяны кивалтӥсь карыса пуктэм оскиськымон, визьмо ляльчиез?46Тазьы ужаса улон дыръяз кузёез ас ляльчизэ учыртӥз ке, шудо со ляльчи.47Зэм ик тӥледлы верасько: быдэс юртъерезлы сое йыр карыса пуктоз.48Нош со ляльчи лек вылэмысьтыз аслаз сюлмаз шуиз ке: ”Ӝоген уз берты ай мынам кузёе”,49но кутскоз эшъёссэ жугыны, юыса улӥсьёсын ӵош сиыны, юыны, –50Соку та ляльчилэн кузёез солэн возьмамтэ нуналаз, малпамтэ часаз вуоз но51сое ӵогыса куштоз, чеберъяськисьёсын огкадь курадӟон интые куштоз; отын бӧрдон, пинь сыскон луоз».


*а 24:15 юрӟым куашкан – ӟуч кылын: мерзость запустения (Дан. 9:27)


предыдущая глава Глава 24 следующая глава