Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЛЭСЬ ӞЕЧ ИВОР

Глава 23

23-тӥ ЛЮКЕТ

1Соку Иисус калыклы, Аслаз дышетскисьёсызлы вераны кутскиз.2Со шуиз: «Моисейлэн пукон интыяз книга тодӥсьёс, фарисейёс пуксизы.3Озьыен, ваньзэ, мае тӥледыз соос утьыны косо, утелэ, быдэсъялэ. Нош ужъёссыя эн лэсьтэ, уго соос верало, нош асьсэос уг лэсьто:4керттыло секытэсь, ӝутыса вормонтэм ныпъетъёс. Соосты адямиослэн пельпум вылазы тыро, нош асьсэлэн чиньыен но соосты вырӟытэмзы уг поты.5Вань ужъёссэс лэсьто ке, лэсьто, адямиос мед адӟозы шуыса. Законысь басьтыса гожтэм кылъёсын йыркерттэтъёссэс паськытато, дӥськут сӧзыысьтызы тугъёссэ кузято.6Ярато сиён-юонъёс дыръя азьпал радъёсын пуконэз, сӥнагогаосын азьпал радын пуконэз,7калык люкаськон интыосын ӟечкыламез, адямиослэсь соосты ”дышетӥсь! дышетӥсь!” шуэмзэс.8Нош тӥ ”дышетӥсь” шуыса эн нимаське, тӥляд уго одӥг Дышетӥсьты – Христос, нош тӥ ваньды – агай-вынъёс.9”Атай” шуыса музъем вылысь нокинэ эн нималэ, тӥляд уго одӥг Атайды, – Со Инмын.10”Валэктӥсь” шуыса но эн нимаське, тӥляд уго одӥг Валэктӥсьты – Христос.11Кин тӥ пӧлын бадӟым, со тӥледлы медо мед луоз:12уго кин ассэ вылӥе пуктэ, со улӥе усёз, нош кин ассэ ултӥя, со вылӥе пуктэмын луоз.

13Куректон тӥледлы, книга тодӥсьёс, фарисейёс, чеберъяськисьёс, адямиослы Ин Эксэйлыкез ворсамды понна; асьтэос но уд пыриське, пырем потӥсь муртэ но уд лэзиське уго.14Куректон тӥледлы, книга тодӥсьёс, фарисейёс, чеберъяськисьёс, палкышноослэсь юртъёссэс сииськоды но чеберъяськыса кема вӧсяськиськоды: со понна тӥ эшшо но юнгес судить каремын луоды.15Куректон тӥледлы, книга тодӥсьёс, фарисейёс, чеберъяськисьёс, одӥгзэ ке но берыктон понна, зарезез но музъемез котыръяськоды, нош куке со пӧрме, сое тӥ асьтэлэсь кык пол уродгес, геенналы пи кариськоды.

16Куректон тӥледлы, синтэм валтӥсьёс, тӥ шуиськоды: ”Кин храмен кыл сётэ, номыр ик ӧвӧл; нош кин храмысь зарниен кыл сётэ, со сётэм кылзэ быдэстыны кулэ”.17Визьдэс ыштэмъёс, синтэмъёс! Мар бадӟымгес: зарни-а яке зарниез дун-чылкыт карись храм-а?18Озьы ик: ”Кин курбон сётон ӝӧкен кыл сётэ, номыр ик ӧвӧл; нош кин отын кыллись курбонэн кыл сётэ, со сётэм кылзэ быдэстыны кулэ”.19Визьдэс ыштэмъёс, синтэмъёс! Мар бадӟымгес: курбон-а яке курбонэз дун-чылкыт карись курбон сётон ӝӧк-а?20Озьыен, курбон сётон ӝӧкен кыл сётӥсь мурт соин но, мар со вылын вань, ваньмыныз кыл сётэ;21храмен кыл сётӥсь мурт храмен но, отын Улӥсен но кыл сётэ;22Инмен кыл сётӥсь мурт Инмарлэн пукон интыеныз но, со вылын Пукисеныз но кыл сётэ.

23Куректон тӥледлы, книга тодӥсьёс, фарисейёс, чеберъяськисьёс! Бутниклэсь, анислэсь, калямперлэсь дасэтӥ люкетсэ сётӥськоды, нош законлэсь туж бадӟымзэ – шонер судзэ, гажан-жалянэз но осконэз – палэнтӥды. Таоссэ кулэ кароно вал, сооссэ но кулэтэм кароно ӧй вал.24Синтэм валтӥсьёс, чибинез сӥсъясьёс, нош верблюдэз ньылӥсьёс!

25Куректон тӥледлы, книга тодӥсьёс, фарисейёс, чеберъяськисьёс, тусьтылэсь, тэркылэсь педпалзэ сузяськоды, со дыре ик соослэн пушсы тырмемын лушкаськонэн, шонертэм улонэн.26Синтэм фарисей! Педпалыз чылкыт мед луоз шуыса, азьло ик тусьтылэсь, тэркылэсь пушсэ сузя.

27Куректон тӥледлы, книга тодӥсьёс, фарисейёс, чеберъяськисьёс, тӥ буям шайгуослы укшаськоды, кыр ласянь соос чебер адӟисько, нош пушсы тырмемын кулэм мурт лыосын но пӧртэм кырсь макеосын.28Озьы ик тӥ но вылтустыя шонер улӥсьёс шуыса адямиослы адскиськоды, нош пушты тырмемын чеберъяськонэн, законлы пумит улонэн.29Куректон тӥледлы, книга тодӥсьёс, фарисейёс, чеберъяськисьёс, пророкъёслы шӧй возён коркаос лэсьтӥськоды, шонер улэмъёслэсь синпелетъёссэс (памятникъёссэс) чеберъяськоды но

30шуиськоды: ”Атайёсмылэн улон нуналъёсазы ми улысалмы ке, пророкъёслэсь вирзэс кисьтыкузы, ми соослы юрттӥськыса ӧй улысалмы”.31Озьы тӥ асьтэдыз асьтэос шарае поттӥськоды, пророкъёсты виылӥсьёслэн пиоссы луиськоды шуыса.32Тырмытэлэ ук атайёстылэсь мертэтсэс.33Кыйёс, сьӧд кыйлэн вордосъёсыз! Кызьы меда пегӟоды кысылӥсьтэм тылэ куштыны судэ сётонлэсь?34Соин ик, тани тӥ доры Мон пророкъёсты, визьнодоосты, книга тодӥсьёсты ыстӥсько. Одӥгъёссэ тӥ виёды, кортӵогалоды, нош мукетъёссэ сӥнагогаосады жугоды но городысь городэ улляса возёды.35Шонер улэм Авельлэн вирыз бордысен кутскыса Варахиялэн храмен курбон сётон ӝӧк вискын вием Захария пиезлэн вирыз дорозь – дунне вылын кисьтӥськем вань сьӧлыктэм вир тӥ вылэ мед вуоз.36Зэм ик тӥледлы верасько, та ваньмыз но та выжы вылэ усёз.

37Иерусалим, Иерусалим, пророкъёсты виылӥсь, тон доры ыстэмъёсты изъёсын жугылӥсь! Кызьы тылобурдо бурд улаз аслэсьтыз пиоссэ люка, кӧня пол Мон тынэсьтыд нылпиостэ люканы турттӥсько вал, нош тӥ кулэ ӧд каре.38Тани тӥляд коркады тӥледлы тырттэм кельтӥське.39Уго тӥледлы верасько: туннэ нуналысен ”Кузё-Инмарлэн нимыз понна Лыктӥсь дано!” шуыса кеськытозяды, тӥ Монэ уд ни адӟе».


предыдущая глава Глава 23 следующая глава