Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЛЭСЬ ӞЕЧ ИВОР

Глава 21

21-тӥ ЛЮКЕТ

1Иерусалимлы матэ вуыса, Елеон гурезь дорысь Виффагияе лыктӥзы. Соку Иисус, кыксэ дышетскисьёссэ ыстыса,2соослы шуиз: «Азьпалады адӟиськись гуртэ мынэлэ. Отысь думем мумы ишакез но соин ӵош сылӥсь ишакпиез шедьтоды. Пертче но соосты Мон доры вае.3Нош кин ке тӥледлы мар ке вераз ке, ”соос Кузё-Инмарлы кулэ, Со соку ик соосты берыктоз” шуэлэ».4Ваньмыз та пророк пыр верам кыл быдэсмон понна луиз, кудӥз шуэ:

5«Вералэ Сӥон ныллы:
”Тани тынад востэм Эксэед тон доры
мес ишак вылэ, кыткетын ветлӥсь ишаклэн пиез вылэ
пуксьыса лыктоз”».

6Дышетскисьёсыз мыныса лэсьтӥзы озьы, кызьы Иисус соослы косӥз.7Мумы ишакез, ишакпиез вайизы, соос вылэ дӥськутсэс понӥзы но, со вылэ Со пуксиз.8Трос калык сюрес вылэ дӥськутсэ вӧлдӥз, нош мукетъёсыз, писпу вайёсты вандылыса, сюрес вылэ вӧлдӥзы.9Калык азьтӥз но, бертӥз но мыныса черекъяз:

«Давидлэн Пиезлы осанна!
Кузё-Инмарлэн нимыз понна Лыктӥсь дано!
Осанна вылӥын!»

10Со Иерусалиме пырем бере быдэс город вырӟиз, куспазы вераськизы: «Кин Та?»11Калык шуиз: «Та Иисус, Галилеяысь Назарет карысь Пророк».

12Иисус Инмарлэн храмаз пыриз но храмын вань вузкарисьёсты, басьяськисьёсты улляса поттӥз, вошъяськыса улӥсьёслэсь ӝӧкъёссэс, дыдыкъёсын вузкарисьёслэсь ӟусъёссэс кымалляз.13Соослы шуиз: «Гожтэмын: ”Мынам коркае вӧсяськон корка шуыса нимаськоз”, нош тӥ сое лушкаськисьёслы люкаськон интылы пӧрмытӥды».

14Со доры храмысь синтэмъёс, пыдтэмъёс лыктӥзы, соосты Со йӧнатӥз.15Нош Солэсь паймымон ужъёс лэсьтэмзэ адӟыса, «Давидлэн Пиезлы осанна!» шуыса храмын черекъясь нылпиосты адӟыса, архиерейёс, книга тодӥсьёс туж йыркуръяськизы16но Солы веразы: «Кылӥськод-а, соос мар шуо?» Иисус соослы шуиз: «Бен! Ноку но лыдӟемды ӧвӧл шат: ”Вож нуныослэн, нонӥсь пиналъёслэн ымынызы Тон ушъян кылдытӥд”?»17Городысен, соосты кельтыса, Вифание мынӥз но уйзэ отын ортчытӥз.

18Нош вазь ӵукна, городэ берытскыкуз, Иисуслэн сиемез потӥз.19Сюрес дурысь одӥг смоквапуэз адӟыса, со доры мынӥз, но куаръёссэ сяна, номырзэ но ӧз шедьты, собере солы шуиз: «Туннэ нуналысен, вань дауръёс ӵоже, ноку но емышед медаз ни луы». Смоквапу соку ик куасьмиз.20Тае адӟыса, дышетскисьёсыз паймыса шуизы: «Кызьы бен со куспын ик смоквапу куасьмиз?»21Иисус соослы ответ сётыса шуиз: «Зэм ик тӥледлы верасько: осконды ке луиз, ӧд ке шекланэ, смоквапуэн лэсьтэмез гинэ уд лэсьтэ, но та гурезьлы ”ӝутӥськы но гылӟы зарезе” шуиды ке, – со но луоз.22Оскыса вӧсяськыкуды мае гинэ уд куре, ваньзэ басьтоды».

23Храме лыктыса дышетыса улыкуз, Со доры архиерейёс, калыклэн тӧроосыз лыктыса шуизы: «Кыӵе кужымен Тон тае лэсьтӥськод? Кин Тыныд таӵе кужым сётӥз?»24Соослы, ответ сётыса, Иисус шуиз: «Мон но тӥледлы одӥг юан сёто. Сое Мыным верады ке, Мон но тӥледлы верало, кыӵе кужымен Мон тае лэсьтӥсько.25Иоаннлэн пылатонэз кытысь вал: Инмысен-а яке адямиос бордысен-а?» Соос куспазы кенешизы: «”Инмысен” ке шуимы, Со шуоз асьмелы: ”Малы нош тӥ солы ӧд оске?”26Нош шуоно ке ”адямиос бордысь” – калыклэсь курдаськомы, уго ваньмыз но Иоаннэз пророк шуыса сӥлы каро».27Иисуслы ответ сётыса шуизы: «Ум тодӥське». Со но соослы шуиз: «Мон но тӥледлы уг вера, кыӵе кужымен Мон тае лэсьтӥсько».

28«Кызьы кадь тӥледлы потэ? Одӥг муртлэн кык пиез вылэм. Нырысетӥез доры лыктыса шуэм: ”Пие, туннэ виноград бакчаям мыныса ужа”.29Нош со ответ сётыса шуэм: ”Мылы уг поты”; нош берло ӧкынэм но мынэм.30Мукетыз доры лыктэм но озьы ик верам. Таиз ответ сётыса шуэм: ”Мынӥсько, кузёе”, но мынымтэ.31Кыкез пӧлысь кудӥз атаезлэсь куронзэ быдэстӥз?» Солы шуо: «Нырысетӥез». Иисус соослы вераз: «Зэм ик тӥледлы верасько: выт бичасьёс но калгись кышноос тӥляд азяды Инмар Эксэйлыке мыно.32Уго Иоанн тӥ доры шонерлык сюрестӥ лыктӥз, но тӥ солы ӧд оске, нош выт бичасьёс но калгись кышноос солы оскизы. Нош тӥ, тае адӟыса вылысь, берло но ӧд ӧкынэ».

33«Мукетсэ мадёнэз кылзэ: ”Вылэм одӥг юрт кузё. Со виноград бакча мерттэм но сое кенерен котыртэм. Отчы вина виятон гу гудӟем, каланча пуктэм, сое виноград будэтӥсьёс кие сётэм но ачиз кошкем.34Емыш бичан дыр вуэм бере со ляльчиоссэ виноград будэтӥсьёс доры емышсэ вайыны лэзем.35Виноград будэтӥсьёс ляльчиоссэ кутылӥллям но кудзэ тышкаллям, кудзэ вииллям, кудзэ изэн лэзьяса быдтӥллям.36Со нош ик ыстэм мукетъёссэ, азьло сярысь троссэгес ляльчиоссэ; но соосты но озьы ик кариллям.37Пумаз ини со аслэсьтыз пизэ соос доры ыстыса шуэм: ”Пиелэсь возьдаськозы”.38Нош виноград будэтӥсьёс, пизэ адӟыса, ог-огзылы шуиллям: ”Та атай юртлы кузёе кылёно. Ойдолэ, мыныса сое виёме но солы кылёно ваньбурез киултоме”.39Сое кутӥллям но виноград бакча сьӧры поттыса вииллям.40Озьы, виноград бакчалэн кузёез лыктӥз ке, мар кароз со та виноград будэтӥсьёсын?»41Солы шуо: «Та лек муртъёсты лек курадӟытыса виылоз, нош виноград бакчазэ мукет виноград будэтӥсьёслы сётоз, соос ас дыраз солы емыш сётозы».42Иисус соослы шуиз: «Священной Гожтэмысь ноку но лыдӟемды ӧвӧл шат:

”Корка пуктӥсьёслэн кулэтэм карыса куштэм иззы
корка сэреглэн улаз инъет йыр луыса пуксиз:
та – Кузё-Инмарлэсь, паймымон луэ асьмелэн син азямы”?

43Соин ик тӥледлы верасько: тӥ дорысь Инмар Эксэйлык басьтӥськоз но солэсь емышсэ вайись калыклы сётӥськоз.44Кин та из вылэ усёз – пазьгиськоз, нош кин вылэ со усёз, сое паньгатоз».

45Солэсь та мадёнъёссэ кылыса, архиерейёс но фарисейёс валазы, соос сярысь Со вера шуыса.46Сое кутыны тыршизы, но калыклэсь кышказы, уго Сое пророк шуыса сӥлы каро вал.


*а 21:5 Ис. 62:11

*б 21:9 осанна – еврей кыл: «юртты; уть» шуэм луэ

*в 21:9 Пс. 117:25-26

*г 21:42 Пс. 117:22-23


предыдущая глава Глава 21 следующая глава