Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЛЭСЬ ӞЕЧ ИВОР

Глава 20

20-тӥ ЛЮКЕТ

1«Ин Эксэйлык вазь ӵукна виноград бакчаяз ужасьёс медъяны потэм коркалэн кузёезлы укша.2Ужасьёсын, соослы нуналаз одӥг динарий тырон вылысь вераськыса, соосты виноград бакчаяз ужаны ыстэм.3Ог куинь час котырын потэм но, вузкарон интыысь мукетъёссэ ужтэк сылӥсьёсты адӟыса,4соослы шуэм: ”Тӥ но виноград бакчаям мынэлэ, тӥледлы йӧтонозэ тыро”. Соос мынӥллям.5Ог куать но укмыс часъёс котырын со нош ик потэм но озьы ик карем.6Ог дас одӥгетӥ час котырын потыса, со мукетъёссэ ужтэк сылӥсьёсты шедьтэм но соослы шуэм: ”Мар тӥ быдэс нунал ужтэк татын сылӥськоды?”7Соос солы шуиллям: ”Нокин но милемыз ӧз медъя”. Со соослы шуэм: ”Тӥ но виноград бакчаям мынэлэ, йӧтонозэ басьтоды”.8Ӝыт вуэм бере виноград бакчалэн кузёез ужен кивалтӥсезлы шуэм: ”Ужасьёсты ӧть но, берло лыктэмъёслы азьло лыктэмъёслы кадь ик, ваньмызлы уждунзэс сётъя”.9Дас одӥг час котырын лыктэмъёс быдэн динариен басьтӥллям.10Нырысь лыктэмъёс малпало вылэм, соос тросгес басьтозы шуыса, нош соос но басьтӥллям быдэн динариен.11Басьтэм беразы коркалэн кузёез вылэ кӧтӝожзэс вераны кутскиллям:12”Та берло лыктэмъёс ужазы одӥг час, нош тон соосты милемын, нуналлэсь секытсэ, ӝокыт пӧсез чидамъёсын, огкадь карид”.13Нош со, ответ сётыса, соос пӧлысь огезлы шуэм: ”Юлтош! Мон тонэ вӧсь уг кариськы; тон монэн динарийлы ӧд вераськы вал шат!14Басьты аслэсьтыд люкеттэ но кош татысь; мынам берпуметӥезлы но тыныд мында ик сётэме потэ уго.15Аслам ваньбуреным мар кареме потэ карыны мон кузё ӧвӧл шат? Мон лякытысь, оло, тынад синмыд вожъяськыса улэ?”16Озьы, берпумъёсыз азьпалаз луозы, азьпаласьёсыз – пумаз кылёзы; ӧтиськемъёс трос, нош быръемъёсыз – ӧжыт».

17Иисус, Иерусалиме тубыкуз, сюрес вылысен дас кык дышетскисьёссэ огназэс палэнэ ӧтьыса, соослы вераз:18«Тани асьмеос Иерусалиме тубиськомы, Адями Пиез архиерейёс, книга тодӥсьёс кие сётозы, Сое виыны судить карозы;19Сое язычникъёс кие сантэманы, жугыны, кортӵоганы сётозы; куинетӥ нуналаз Со улӟыса султоз».

20Соку Со доры йыбыртъяса, маке но Солэсь курыса, Зеведей пиослэн анайзы аслаз пиосыныз лыктӥз.21Иисус солы шуиз: «Мар тыныд кулэ?» Кышномурт шуиз: «Аслад Эксэйлыкад та кык пиосме, огзэ бурпалад, мукетсэ паллян палад пуксьыны лэзь».22Иисус ответ сётыса шуиз: «Мар куремдэс асьтэос уд тодӥське. Луоз-а тӥляд Мынэсьтым юоно чашаме юэмды яке пылатонэн, кудӥныз Мон пылатӥськисько, пылатӥськемды?» Соос Солы шуизы: «Быгатӥськом».

23Нош Иисус соослы шуиз: «Мынэсьтым юоно чашаме юоды, пылатонэн, кудӥныз Мон пылатӥськисько, пылатӥськоды, нош бурпалам яке паллян палам пуктыны – Мынам эрике ӧвӧл; отчы пуксёзы соос, кинъёслы сое Мынам Атае дасяз».24Тае кылыса, мукетъёсыз дас дышетскисьёсыз кык братъёслы вожзэс поттӥзы.25Нош Иисус соосты ӧтьыса шуиз: «Тӥ тодӥськоды, калыкъёслэн кивалтӥсьёссы соосын кузёясько, кузёйыръёссы соосты киулазы возё шуыса.26Нош тӥляд куспады озьы медаз луы: тӥ куспын кинлэн ассэ бадӟым каремез потэ, тӥледлы со ляльчи мед луоз;27тӥ куспын кинлэн ваньмызлэсь вылӥын луэмез потэ, со тӥледлы ляльчи мед луоз;28малы ке шуоно Адями Пи Ас вылаз ужатыны ӧз лыкты, Со Ачиз адямиослы ужаны-тыршыны, Аслэсьтыз лулзэ сётыса, троссэ сьӧлыкъёслэсь мозмытыны лыктӥз».

29Иерихонысь потыкузы, Иисус бӧрсьы трос калык мынӥз.30Соку сюрес дурын пукись кык синтэм адямиос Иисус вӧзтӥзы ортче шуыса кылӥзы но кесяськыны кутскизы: «Кузё-Инмармы, Давидлэн Пиез, жаля милемыз!»31Калык соосты чалмытскыны косӥз; нош соос эшшо но золгес кесяськыны кутскизы: «Кузё-Инмармы, Давидлэн Пиез, жаля милемыз!»32Иисус дугдӥз но соосты ӧтьыса шуиз: «Мынэсьтым тӥледлы мар кулэ?»33Соос Солы шуизы: «Кузёмы! Милям синъёсмы мед усьтӥськысалзы».34Иисус, соосты жаляса, син бордазы йӧтӥськиз но, соку ик синъёссы адӟыны кутскизы. Собере соос Со сьӧры мынӥзы.


*а 20:3 туала дырын ог 9 час, ӵукна


предыдущая глава Глава 20 следующая глава