Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЛЭСЬ ӞЕЧ ИВОР

Глава 18

18-тӥ ЛЮКЕТ

1Со виын Иисус доры дышетскисьёсыз лыктыса шуизы: «Ин Эксэйлыкын кин ваньмызлэсь бадӟымез?»2Иисус пичи пиналэз ӧтиз но соослэн шоразы султытыса3шуиз: «Зэм ик тӥледлы верасько: ӧд ке берыктӥське, пичи пиналъёс кадесь ӧд ке луэ, Ин Эксэйлыке уд пыре.4Озьыен, кин ассэ ачиз та пинал кадь покчи кариз ке, со ик Ин Эксэйлыкын бадӟымез.5Мынам нимы понна кин одӥгзэ таӵе пиналэз кабыл басьтэ, со Монэ кабыл басьтэ.

6Нош кин одӥгзэ та пичиос пӧлысь, Мыным оскисез, сьӧлыке пыртӥз ке, солы умойгес луысал, чыртыяз вуко кӧ ошыса, зарезь пыдсы выйытысалзы ке.7Куректон дуннелы сьӧлыке пыртӥсь ужъёслэсь, нош соос лыктытэк уз кыле; эшшо но куректон со адямилы, кин пыр визь сынаськон лыктэ.8Киыд яке пыдыд тонэ сьӧлыке пыртэ ке, ӵогыса соосты бордысьтыд кушты. Умойгес луоз тыныд китэк, пыдтэк улонэ пырыны, кык киыныд, кык пыдыныд ноку но кысылӥсьтэм тыл пушкы куштӥськонлэсь.9Синмыд тонэ сьӧлыке пыртэ ке, ишкалты но сое бордысьтыд кушты: умойгес луоз тыныд пал синмыныд улонэ пырыны кык синмыныд но ӝуась гееннае куштӥськонлэсь.

10Чакласькелэ, та пичиос пӧлысь огзэс но синазькыль эн каре; уго тӥледлы верасько: Инмысен соослэн Кылчинъёссы Инмысь Атаелэсь ымнырзэ пырак ӵоже адӟыса уло.11Адями Пи лыктӥз уго бырисьсэ утчаны, утьыны.12Кызьы кадь потэ тӥледлы? Кинлэн ке но, шуом, вань сю ыжез, но соос пӧлысь одӥгез йыромем, соку со, укмыстон укмыссэ гурезе кельтыса, уз мыны-а йыромемзэ утчаны?13Шедьтыны быгатӥз на ке, зэм ик тӥледлы верасько, йыромымтэ укмыстон укмыс ыжъёсыз сярысь, таизлы со золгес шумпотоз.14Озьыен, тӥляд Инмысь Атайдылэн та покчиос пӧлысь огзэс но быдтэмез уг поты.

15Нош тынад братэд тыныд пумит сьӧлыказ ке, мын но кыкнады куспын гинэ солэсь шекъёссэ солы аслыз вера: со тонэ кылзӥськиз ке, соку со нош ик тыныд брат луоз.16Нош ӧз ке кылзӥськы, соку сьӧрад эшшо одӥгзэ яке кыксэ адӟисез басьты, кыкезлэн яке куинезлэн адӟисьёслэн ымысьтызы потэм кылын та уж но мед юнматӥськоз шуыса.17Соослэсь но ӧз ке кылзӥськы, черке вера; черклэсь но ӧз ке кылзӥськы, соку со тыныд язычник но выт бичась мурт интые мед кылёз.

18Зэм ик тӥледлы верасько: мае керттылоды музъем вылын, со керттэмын луоз Инмын; мае пертчылоды музъем вылын, со пертчемын луоз Инмын.19Зэм ик тӥледлы верасько: музъем вылын тӥ пӧлысь кык ӵошен кыӵе ке но уж сярысь огкылысь курыны кутскизы ке, мар гинэ уз куре, Мынам Инмысь Атае ваньзэ соослы сётоз.20Уго кытын кык яке куинь ӵошен Мынам нимы понна люкаськизы ке, отын Мон соос пӧлын луо».

21Соку Петр Солэн матаз лыктыса шуиз: «Кузё-Инмаре! Братэ мыным пумит сьӧлыказ ке, кӧня пол мон солы простить каром? Сизьым пол-а?»22Иисус солы шуиз: «Уг шуиськы тыныд ”сизьым пол”, но сизьымдонэз сизьым пол йылэтытозь.

23Соин ик Ин Эксэйлык ас ляльчиосызлэсь сётон-басьтонзэс лыдъяны мылкыд карем эксэйлы укша.24Лыдъяськыны кутскем бераз со доры дас сюрс талант тыроно муртэз вайиллям.25Тырыны моӵез луымтэысь, кузё сое ассэ но, кышнозэ но, нылпиоссэ но, ваньзэ, маиз вань, вузаны но пунэмзэ тырытыны косэм.26Соку та ляльчи пыдесъяськыса, йыбырттыса солы верам: ”Кузё! Чида ӧжытак, ваньзэ мон тыныд тыро”.27Кузё та ляльчиез жалям, лэзем сое, тыриськонзэ но куштэм.28Та ляльчи потэм бераз огзэ эшсэ пумитам, кудӥзлэн солы сю динарий тыронэз вылэм, сое ёртыса, кекатыса шуэм: ”Сёт мыным, кӧня тыронэд вань”.29Соку эшез, солэн пыд азяз уськытскыса, сюлворыса шуэм: ”Чида ӧжытак, ваньзэ тыныд сёто”.30Но со талы ярамтэ, мынэм но, тыронзэ сётытозьлы, пытсэтэ ворсатэм.31Тае адӟыса, эшъёсызлэн туж кӧтсы ӝож луэм, соос мыныса, мар луэм сярысь асьсэлэн кузёзылы ваньзэ вераллям.32Соку кузё сое ӧтьытыса ваем но солы шуэм: ”Урод ляльчи! Вань тырондэ мон тынэсьтыд куштӥ, уго тон монэ курид.33Тыныд но кулэ ӧй вал-а эштэ жаляны, кызьы мон но тонэ жаляй?”34Вожез потыса, кузё сое, вань тыронзэ тырытозязлы, курадӟытӥсьёс кие сётэм.35Озьы ик кароз тӥледыз Мынам Инмысь Атае, вань сюлмысьтыды ӧд ке куштэ браттылэсь лэсьтэм сьӧлыкъёссэ».


предыдущая глава Глава 18 следующая глава