Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЛЭСЬ ӞЕЧ ИВОР

Глава 17

17-тӥ ЛЮКЕТ

1Ог куать нунал ортчыса, Иисус Петрез, Иаковез, солэсь вынзэ Иоаннэз басьтӥз но соосты огназэс ӝужыт гурезь йылэ нуиз.2Соос азьын Со воштӥськиз: ымнырыз шунды кадь пиштыны кутскиз, нош дӥсянэз лымы кадь тӧдьы луиз.3Со куспын ик соослы Моисей но Илия возьматскизы, Соин вераськыса улӥзы.4Соку Петр Иисуслы шуиз: «Кузё-Инмаре! Милемлы татын улыны ӟеч; кулэ ке Тыныд, татчы куинь тылыс лэсьтом: одӥгзэ Тыныд, одӥгзэ Моисейлы, одӥгзэ Илиялы».5Со вераськон дыръя ик югыт пилем соосты шобыртӥз. Пилем пушкысь куара кылӥськиз, со куара шуиз: «Та Мынам Яратоно Пие, Со бордын Мынам ӟеч эрике, Солэсь кылзӥське».6Тае кылыса, дышетскисьёс музъем вылэ кымин выдӥзы, туж курдазы.7Нош Иисус доразы лыктӥз но бордазы йӧтӥськыса шуиз: «Султэлэ, эн кышкалэ».8Синъёссэс ӝутӥзы но, одӥг Иисусэз сяна, нокинэ но ӧз адӟе.

9Гурезьысь васькыкузы, Иисус соосты алыса вераз: «Та адӟемдэс, Адями Пи кулэмысь улӟыса султытозь, нокинлы но эн вералэ».10Дышетскисьёсыз Солэсь юазы: «Кызьы нош книга тодӥсьёс Илия нырысь ик лыктыны кулэ шуыса верало?»11Иисус соослы ответ сётыса шуиз: «Зэм, Илия, нырысь ик лыктыса, ваньзэ дасяны-тупатыны кулэ.12Но тӥледлы верасько: Илия ветлӥз ини, но сое ӧз тодмалэ, нош соин мар каремзы потӥз, сое каризы. Озьы ик Адями Пилы но соослэсь курадӟон адӟоно луоз».13Соку дышетскисьёсыз валазы, Со Иоанн Пылатӥсь сярысь соослы вераз шуыса.

14Калык доры вуэм беразы Со доры одӥг мурт лыктӥз но Со азе пыдесъяськыса15шуиз: «Кузё! Жаля мынэсьтым пиме; выль толэзь потыку со перияське но туж курадӟе: ӵем дыръя тыл пӧлы тэтча, ӵем дыръя вуэ но.16Мон сое Тынад дышетскисьёсыд доры вайи, но соос ӧз быгатэ сое йӧнатыны».17Иисус ответ сётыса шуиз: «Эй, оскисьтэм, азэм выжы! Кема уло на-а тӥ пӧлын? Кема-а чидало на тӥледыз? Ваелэ сое татчы Мон доры».18Иисус алыса вераз но пери со пушкысь потӥз. Пинал пи соку ик бурмиз.19Огназы кылён дыръя Иисус доры дышетскисьёсыз лыктыса шуизы: «Ми нош малы сое улляса поттыны ӧм быгатэ?»20Иисус соослы шуиз: «Осконды ӧвӧлэн. Зэм ик тӥледлы верасько: горчица кидыс быдӟа гинэ осконды луиз ке, та гурезьлы ”татысь выж отчы” шуиды ке, со выжоз; тӥледлы номыр но луонтэмез уз луы.21Нош та выжыез улляны луэ вӧсяськыса но визяса гинэ».

22Галилеяын улон дыръязы Иисус соослы шуиз: «Адями Пи адямиослэн ки улазы сётэмын луоз,23Сое виёзы, но куинетӥ нуналаз Со улӟыса султоз». Соос бадӟым куректонэ усизы.

24Капернауме вуэм беразы Петр доры дидрахма бичасьёс лыктыса шуизы: «Тӥляд Дышетӥсьты дидрахмазэ уз сёты меда?»25Со шуиз: «Сётоз». Корка пырем бераз Иисус сое азьвылтыса шуиз: «Тыныд кызьы кадь потэ, Симон? Музъем вылысь эксэйёс вуз люкетэз яке вытэз кинъёслэсь бичало? Асьсэ пиоссылэсь-а яке мурт адямиослэсь-а?»26Петр Солы шуиз: «Мурт адямиослэсь». Иисус солы шуиз: «Озьыен, пиоссылы тырытэк яра;27нош соосты сьӧлыке пыртонтэм вылысь, мын зарезь дуре, визнандэ лэзь, нырысь сюрем чорыгедлэсь ик ымзэ усьты но отысь статир шедьтод. Сое басьты но Мон понна но, ачид понна но соослы сёт».


*а 17:24 дидрахма – Рим кунысь уксё

*а 17:27 статир – ньыль драхма коньдон


предыдущая глава Глава 17 следующая глава