Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЛЭСЬ ӞЕЧ ИВОР

Глава 14

14-тӥ ЛЮКЕТ

1Со виын ньылетӥ люкетэн кивалтӥсь Ирод Иисус сярысь ивор кылӥз но2вӧзаз ужасьёсызлы шуиз: «Со Иоанн Пылатӥсь; со улӟыса султэм, соин ик со пыр паймымон ужъёс лэсьтӥсько».3Филипп нимо вынызлэн Иродиада кышноез понна Ирод Иоаннэз кутӥз но думылыса пытсэтэ ворсаз,4уго Иоанн солы вера вал: «Уг яра тыныд соин улыны».5Сое виыны турттэ вал, но калыклэсь кышказ, уго сое пророк шуыса лыдъяло вал.6Ирод вордӥськем нуналзэ ортчытон дыръя Иродиадалэн нылыз люкаськемъёс азьын эктӥз но Иродлы кельшиз;7соин ик со кыл сётыса вераз, со ныл мае гинэ уз куры, ваньзэ сётоз шуыса.8Нош со ныл анаезлэн узатэмезъя шуиз: «Тэркые поныса, Иоанн Пылатӥсьлэсь йырзэ мыным татчы вай».

9Куректонэ усиз эксэй. Но, куноосыз азьын кыл сётэмзэ тодаз вайыса, ныллэсь куронзэ быдэстыны косӥз,10пытсэтэ Иоаннлэсь йырзэ ӵогыны лэзиз.11Йырзэ тэркые поныса вайизы но нылмуртлы сётӥзы, нош со анаезлы нуиз.12Дышетскисьёсыз лыктӥзы но мугорзэ басьтыса ватӥзы; мыныса Иисуслы ивортӥзы.

13Та сярысь кылэм бераз Иисус пыже пуксиз но отысь калыктэм интые огназ кошкиз; нош калык, тае кылыса, городъёсысь потӥз но Со бӧрсьы пыдын мынӥз.14Иисус, ярдуре тубыса, трос калыкез адӟиз, Солы соос жаль потӥзы, висисьёссэс бурмытылӥз.15Ӝыт вуэм бере Со доры дышетскисьёсыз лыктыса шуизы: «Та кыр инты, дыр бер ини; калыкез гуртъёсы мыныны лэзь, асьсэлы сиён мед басьтозы».

16Нош Иисус соослы шуиз: «Соослы мыныны кулэ ӧвӧл; тӥ соослы сиён сётэлэ».17Нош соос Солы шуо: «Милям татын вить няньмы но кык чорыгмы гинэ вань».18Со шуиз: «Соосты Мыным татчы вае».19Калыкез турын вылэ пуксьылыны косӥз; вить нянез но кык чорыгез басьтӥз, ин пала учкыса, бакель кариз но, нянез тӥялтыса, дышетскисьёсызлы сётъяз, нош дышетскисьёсыз – калыклы.20Ваньзы сиизы, ваньзылэн кӧтсы тыриз. Кылем юдэсъёссэс дас кык кудые тыраз люказы.21Кышномуртъёсты но нылпиосты лыдъятэк, сиськисьёс пӧлын ог вить сюрс пиосмурт вал.

22Соку ик Иисус дышетскисьёссэ, пыже пырыса, Аслэсьтыз азьвыл тупала выжыны косӥз, нош Ачиз калыкез келяны кылиз.23Калыкез келям бераз Со гурезь йылэ тубиз Ас понназ кыльыса вӧсяськыны; ӝыт но отын огназ улӥз.24Пыж зарезь шорын вал ини, тулкымъёс бордаз йыгаськизы – пужит тӧл пельтӥз.25Ӵукна пал, ӟардон азьын, Иисус соос доры зарезь вылтӥ вамышъяса мынӥз.26Нош дышетскисьёсыз Солэсь зарезь ву вылтӥ вамышъяса лыктэмзэ адӟыса куалектӥзы, соос шуизы: «Та – пӧртмаськись»; кышкаменызы черектӥськизы.

27Иисус нош соку ик соосын вераськыны кутскыса шуиз: «Йыг-йыг кариське; Мон со, эн кышкалэ».28Солы ответ сётыса, Петр шуиз: «Кузё-Инмаре! Тон ке со, ву вылтӥ Тон доры лыктыны кос монэ».29Иисус шуиз: «Лыкты». Иисус доры вуон понна Петр пыжысь потӥз но ву вылтӥ мынӥз.30Нош кужмо тӧлэз адӟыса, кышкатскиз, выйыны кутскиз но черетскиз: «Кузё-Инмаре! Уть монэ».31Иисус соку ик кизэ сётӥз, китӥз кутыса, солы шуиз: «Ӧжыт оскись! Малы тон оскондэ ыштӥд?»32Пыже пырем беразы тӧл дугдӥз.33Пыжын пукемъёс, дораз лыктыса, Солы йыбырттыса шуизы: «Зэм ик, Тон Инмар Пи».

34Тупала выжыса, Геннисарет музъеме вуизы.35Сое тодмаса, та палан улӥсьёс котыр ёросэ ивортӥзы, Со доры вань висисьёсты вайизы.36Дӥсянэзлэн сӧзы бордаз гинэ йӧтӥськыны мед лэзёз вал шуыса, Солэсь куриськизы; кинъёс йӧтӥськизы – бурмизы.


*а 14:1 ньылетӥ люкетэн кивалтӥсь – четвертовластник; тетрарх, Рим кунысь кудӥзлэн ке но эксэйлыклэн ньылетӥ люкетэныз кивалтӥсь


предыдущая глава Глава 14 следующая глава