Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЛЭСЬ ӞЕЧ ИВОР

Глава 13

13-тӥ ЛЮКЕТ

1Со нуналэ Иисус коркась потӥз но зарезь дуре мыныса пуксиз.2Со доры трос калык люкаськиз, соин ик Со пыже пыроно луиз, отын Со пукиз, нош вань калык ярдурын сылӥз.3Трос мадёнъёс пыр соосты Со дышетӥз, тазьы шуиз: «Тани, кизись кизьыны потэм.4Кизьыкуз куд-огез кидысэз сюрес дуре усем, тылобурдоос лыктӥллям но кокчаса быдтӥллям.5Куд-огез ӧжыт сюё, изо интые усем, ӝоген удаса потэм, малы ке шуоно сюез лазег вылэм.6Шунды потэм но, шуям, выжыез ӧвӧл бере, куасьмем.7Куд-огез бышкись будосъёс пӧлы усем, бышкись будос ӝужам но сое ӝокатэм.8Куд-огез ӟеч музъеме усем но будыса емыш ваем: огез сю полэс, нош мукетыз – куатьтон, куд-огез куамын полэс емыш ваем.9Кылыны пельыз вань мурт – мед кылоз!»10Дышетскисьёсыз, дораз лыктыса, Иисуслы шуизы: «Малы калыклы мадёнъёс пыр вераськод?»11Ответ сётыса, Иисус соослы шуиз: «Со понна: тӥледлы Ин Эксэйлыклэсь ватӥськыса улӥсь зэмлыксэ тодон сётэмын, нош соослы сётэмын ӧвӧл.12Уго кинлэн вань, солы сётэмын луоз, эшшо ватсаськоз но; нош кинлэн ӧвӧл, солэсь, маиз вань, соиз но басьтэмын луоз.13Мадёнъёс пыр соин соослы верасько: соос учко, – но уг адӟо, кылзо, – но уг кыло, уг но валало.14Соос бордын Исаиялэн азьпалзэ тодытыса верамез быдэсме, кудӥз шуэ:

”Пельыныды кылоды но, – уд валалэ;
синмыныды учкоды но, – уд адӟе.
15Чурытомемын уго та калыклэн сюлэмыз,
пельынызы но мырдэм кыло,
синзэс но кыниллям,
синмынызы медаз адӟе, пельынызы медаз кылэ,
сюлмынызы медаз валалэ,
Мон мед бурмытом шуыса, Мон пала уз но берытске”.

16Нош тӥляд синъёсты шудоесь: соос адӟо уго, пельёсты но кыло уго.17Зэм ик тӥледлы верасько: тросэзлэн пророкъёслэн но шонер улӥсьёслэн тӥлесьтыд адӟемдэс адӟемзы потэ вал, но ӧз адӟе; тӥлесьтыд кылэмдэс кылэмзы потэ вал, но ӧз кылэ.

18Нош тӥ кылзэлэ, мае возьматэ кизись сярысь мадён:19Котькуд адями доры, кин Эксэйлык сярысь кылэз кылзӥське, нош визьмыныз сое уг вала, шайтан лыктэ но, солэн сюлэмаз мар кизиськемын, сое лушка – тӥни кинэ возьматэ сюрес дуре кизиськем.20Нош изо интые кизиськемез возьматэ сыӵе муртэ, кин кылэз кылэ но соку ик сое шумпотыса кабыл басьтэ.21Нош аслаз пушказ выжыез ӧвӧл, мылкыдыз вошъяськись: куректон вуэ ке яке кыл понна улляны кутско ке, соку ик канжаськыса усе.22Бышкись будосъёс пӧлы кизиськемез возьматэ сыӵе муртэ, кин кылэз кылэ, но таизлэн дуннелэн сюлмаськонэз, узырлыклы синмаськон кылэз ӝокатэ, соин ик со емыш уг сёты.23Нош ӟеч музъеме кизиськемез возьматэ сыӵе муртэ, кин кылэз кылэ, сое вала но емыш сётӥсь луэ: огез сю полэс емыш сётэ, куд-огез – куатьтон полэс, нош куд-огез – куамын полэс».

24Соослы мукетсэ мадёнэз Со вераз: «Ин Эксэйлык ас бусыяз ӟеч кидыс кизем адямилы укша.25Адямиос изён дыръя тушмон лыктэм но чабей пӧлы букро кизьыса кельтэм.26Узьымез ӝужам но, шепез потыны кутскем, соку ик букро но ӝужаса потэм.27Корка кузёлэн ляльчиосыз лыктӥллям но солы шуиллям: ”Кузёмы! Ӟеч кидыс ӧд кизьы вал-а тон бусыяд? Кытысь бен букро потӥз?”28Соослы со шуэм: ”Тушмон адями лэсьтӥз тае”. Нош ляльчиосыз солы шуиллям: ”Кулэ-а тыныд, ми мыном но быръём соосты?”29Нош со шуэм: ”Уг яра, букроез быръён сямен соин ӵош чабеез медад ишкалэ.30Кельтэлэ, аран вуытозь соиз но, таиз но огазьын мед будозы. Аран дыръя арасьёслы мон шуо: ”Нырысь ик букроез октэ, сутыны вылысь культое думылэ; нош чабейме кеносам тырелэ”».

31Мукет мадён соослы Со вераз: «Ин Эксэйлык горчица кидыслы укша. Со кидысэз адями басьтэм но аслаз бусыяз кизем.32Вань кидысъёс пӧлысь со векчи ке но, нош будэ ке, вань шепо будосъёслэсь ӝужыт луэ, писпулы пӧрме – ин тылобурдоос лыктыса, солэн вайёсаз пегӟыса уло».

33Мукет мадён соослы Со вераз: «Ин Эксэйлык нянь шӧмлы укша. Со шӧмез кышномурт басьтэм но ӝужйытозязлы куинь мертэт пызь пӧлы понэм».

34Иисус калыклы ваньзэ мадёнъёс пыр вералляз, мадёнъёстэк соослы ӧз вера,35мед быдэсмоз пророк пыр верам кыл, кудӥз шуэ:

«Мадёнъёс пыр вераны усьто Аслэсьтым ымме;
дунне кылдэм дырысен ватыса воземез тӥледлы верало».

36Соку Иисус калыкез лэзиз но корка пыриз. Солэн дораз дышетскисьёсыз лыктыса, Солы шуизы: «Валэкты милемлы бусыысь букро сярысь мадёнэз».37Соослы ответ сётыса, Со шуиз: «Ӟеч кидыс кизись – со Адями Пи;38бусы – со дунне; ӟеч кидыс – со Эксэйлыклэн нылпиосыз, нош букро – шайтанлэн нылпиосыз;39соосты кизись тушмон – со диавол; аран – со дунне бырон, нош арасьёс – со Кылчинъёс.40Кызьы букроез бичаса тылын суто, озьы ик луоз та дуннелэн бырон дыръяз но:41Адями Пи Аслэсьтыз Кылчинъёссэ ыстоз но Солэн Эксэйлыкысьтыз сьӧлыке пыртӥсь вань пӧяськетъёсты, законлы пумит улӥсьёсты люкалозы,42собере соосты ӝуась гуре куштозы. Отын бӧрдон, пинь сыскон луоз.43Соку шонер улэмъёс Атайзылэн Эксэйлыказ шунды кадь пиштыса улыны кутскозы. Кылыны пельыз вань мурт – мед кылоз!

44Ин Эксэйлык бусые ватэм узырлыклы укша. Сое адями шедьтэм но ватэм. Шумпотэменыз мыныса, маиз вань, ваньзэ вузам но со бусыез аслыз басьтэм.

45Ин Эксэйлык укша на умой марӟан басьтыны утчась вузчилы.46Со одӥг гинэ дуно марӟан шедьтэм, мыныса, маиз вань, ваньзэ вузам но со марӟанэз аслыз басьтэм.

47Ин Эксэйлык укша на зарезе куштэм калтонлы, кудаз пӧртэм пумо чорыгъёс сюриллям.48Калтон пачыл луэм бере сое ярдуре поттӥллям но пуксьыса ӟечъёссэ чорыгъёсты посудаязы тыриллям, нош уродэсьёссэ палэнэ сэрпалтӥллям.49Тазьы луоз дунне бырыку: потозы Кылчинъёс, шонер улӥсьёс пӧлысь лек муртъёсты соос поттозы50но ӝуась гуре куштозы: отын бӧрдон, пинь сыскон луоз».51Иисус соослэсь юаз: «Ваньзэ тае тӥ валады-а?» Соос Солы шуизы: «Бен, Кузё-Инмармы!»52Нош Со соослы шуиз: «Соин ик котькудӥз Ин Эксэйлыклы дышетэм книга тодӥсь шыкысысьтыз вужзэ но, выльзэ но арбериоссэ поттӥсь кузёлы укша».

53Иисус та мадёнъёссэ вераса быдтэм бераз отысь кошкиз. Аслаз улоно музъемаз вуэм бераз соосты сӥнагогаязы дышетӥз.54Нош соос паймыса вераськизы: «Кытысь Солэн таӵе визьмыз, паймымон ужъёс лэсьтыны кужымез?55Тӥрен ужасьлэн пиез ӧвӧл-а Со? Мария шуыса уг-а нимало Солэсь Анайзэ, братъёсыз но Солэн Иаков, Иосий, Симон, Иуда шуыса уг-а нимасько?56Сузэръёсыз но ваньзы ик асьме пӧлын ӧвӧл-а? Кытысь бен ваньмыз та Солэн?»57Озьы Со пумысен сьӧлыказы. Нош Иисус соослы шуиз: «Пророк сӥтэм-сантэм уг луы, луэ ке, луэ аслаз вордӥськем музъемаз, аслаз дораз гинэ».

58Соослэн оскымтэенызы сэрен отын Со трос ик паймымон ужъёс ӧз лэсьты.


*а 13:15 Ис. 6:9-10

*б 13:25 букро – чабейлы кельшись жаг турын; ӟуч сямен: плевелы

*в 13:35 Пс. 77:2


предыдущая глава Глава 13 следующая глава