Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЛЭСЬ ӞЕЧ ИВОР

Глава 15

15-тӥ ЛЮКЕТ

1Соку Иисус доры Иерусалимысь книга тодӥсьёс, фарисейёс лыктыса шуизы:2«Малы Тынад дышетскисьёсыд вашкала пересьёслэсь косэмзэс сӧрыса уло? Нянь сиыкузы, кизэс уг мисько уго».3Нош Со, ответ сётыса, соослы шуиз: «Малы тӥ но, пельысь пеле вуэм верандэс быдэсъяса, Инмарлэсь курон-косонзэ сӧрыса улӥськоды?4Инмар косӥз ук: ”Атайдэ но, анайдэ но сӥлы кар”; ”Атайзэ яке анайзэ урод кылын куаретӥсь мурт кулонэн мед кулоз”.5Нош тӥ шуиськоды: ”Кин атаезлы яке анаезлы шуиз ке: ”Тӥледлы сётонозэ Инмарлы сётыны сӥзи ни”,6со мурт аслэсьтыз атайзэ яке анайзэ сӥлы ӧз ке но кары, яралоз”; озьы тӥ Инмарлэсь курон-косонзэ асьтэ сямъёсын палэнтӥды.7Чеберъяськисьёс! Азьпалзэ тодытыса тӥ сярысь умой вераз Исаия пророк, со шуиз:

8”Та адямиос ымынызы Мынам матам лыкто,
кылынызы Монэ сӥлы каро;
нош сюлмынызы Мынэсьтым кыдёкын уло.
9Адямиослэн малпам дышетонъёссылы,
курон-косонъёссылы дышетыса,
Монэ юнме гинэ сӥлы каро”».

10Калыкез ӧтьыса, соослы вераз: «Кылзӥське но валатске:11мар ымтӥ пыре, со уг сапта адямиез, нош мар потэ ымтӥ, со сапта адямиез».12Соку дышетскисьёсыз, матаз лыктыса, Солы веразы: «Тодӥськод-а, фарисейёс, та кылэз кылыса, сьӧлыке пыризы?»13Нош Со ответ сётыса шуиз: «Инмысь Атаелэн мерттымтэ будосэз ваньмыз ик выжытэм быдтӥськоз.14Кельтэ соосыз, соос синтэмъёслэн синтэм валтӥсьёссы; нош синтэм валтэ ке синтэмез, соос кыксы ик гуэ усёзы».15Петр Солы вазиськыса шуиз: «Валэкты милемлы та мадёнэз».

16Иисус шуиз: «Оло, тӥ но ялан уд на-а валаське?17Али но уд валаське шат: ваньмыз, ымтӥ пырисез кӧтэ ваське, отысен куштӥське?18Нош ымтӥ потӥсез – сюлэмысь потэ, таиз сапта адямиез.19Уго сюлмысь пото уродэсь-лекесь малпанъёс, адями виылон, азон-калгон сьӧлыке пырон, азыса-калгыса улон, лушкаськонъёс, ӧрекчаськыса ӧвӧлтэмзэ веранъёс, Инмарез сантэман, –20та сапта адямиез; нош миськымтэ киын сиськон уг сапта адямиез».

21Отысь потыса, Иисус Тир но Сӥдон ёросъёсы кошкиз.22Тани, та ёросысен хананей кышно потыса Солы черектӥськиз: «Кузё-Инмаре, Давидлэн Пиез, жаля Монэ! Нылы туж зол перияськемын».23Но солы Со пал кыл но ӧз вазьы. Дышетскисьёсыз, дораз лыктыса, Сое куризы: «Лэзь сое, со ми бӧрсьын кесяськыса ветлэ».24Иисус ответ сётыса шуиз: «Мон ыстэмын Израиль юртлэн бырем ыжъёсыз доры гинэ».25Нош со кышно, матаз лыктыса, Солы йыбырттыса шуиз: «Кузё-Инмаре! Юртты мыным».26Иисус шуиз: «Ӟеч ӧвӧл, нылпиослэсь няньзэс басьтыса, пуныослы куштыны».27Кышномурт Солэн пумитаз шуиз: «Зэм, озьы, Кузёе! Но пуныос но кузёоссылэн ӝӧк вылысьтызы усьылэм пырыосты сиё».28Соку, солы ответ сётыса, Иисус шуиз: «О-о, кышномурт! Туж бадӟым тынад осконэд, тынад куронэд мед быдэсмоз». Со куспын ик солэн нылыз йӧназ.

29Отысь выжыса, Иисус Галилей зарезь дуре вуиз, гурезь йылэ тубыса, отчы пуксиз.30Со доры туж трос калык лыктӥз, сьӧразы чутъёсты, синтэмъёсты, кылтэмъёсты, сӧсырмемъёсты, трос мукетъёссэ вайизы но Иисуслэн пыд азяз соосты пуктылӥзы; соосты Со йӧнатӥз.31Озьы, кылтэмъёслэсь вераськемзэс кылыса, сӧсырмемъёслэсь йӧнамзэс, пыдтэмъёслэсь ветлэмзэс, синтэмъёслэсь синмо луэмзэс адӟыса, калык паймиз но Израильлэсь Инмарзэ данъяз.

32Иисус Аслэсьтыз дышетскисьёссэ ӧтьыса шуиз: «Жаль потэ Мыным калык: Мон бордын куинь нунал уло ни, номыр сиёнзы но ӧвӧл; сюдытэк нош лэземе уг поты, сюрес вылысен медаз лябӟелэ».33Дышетскисьёсыз Солы шуизы: «Сомында калыкез сюдыны кыр дуннеын кытысь ми сомында нянь басьтомы?»34Иисус соослы шуиз: «Кӧня тӥляд няньды?» Соос шуизы: «Сизьым. Кӧня ке но чорыгмы вань».35Соку Со калыкез музъем вылэ пуксьылыны косӥз.36Сизьым нянез но чорыгъёсты басьтыса, тау кариз но, тӥялляса Аслаз дышетскисьёсызлы сётъяз, нош дышетскисьёсыз – калыклы.37Ваньзы кӧтсы тырытозь сиизы. Кылем нянь юдэсъёссэс сизьым кудые тыраз бичазы.38Нош сиськисьёс, нылкышноосты но нылпиосты лыдъятэк, ньыль сюрс мурт вал.

39Калыкез лэзем бераз Со, пыже пуксьыса, Магдала ёросэ вуиз.


*а 15:9 Ис. 29:13


предыдущая глава Глава 15 следующая глава