Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЛЭСЬ ӞЕЧ ИВОР

Глава 12

12-тӥ ЛЮКЕТ

1Со вакыт, суббота нуналэ, Иисус кизем ю бусы вамен ортче вал. Дышетскисьёсызлэн кӧтсы сюмаз но соос ю шепъёсты чигылыса сиыны кутскизы.2Тае адӟыса, фарисейёс Солы шуизы: «Тани Тынад дышетскисьёсыд суббота нуналэ лэсьтыны ярантэм ужез лэсьто».

3Нош Иисус соослы шуиз: «Ӧд лыдӟе шат, мар кариз Давид, куке солэн аслаз но, соин ӵош луэмъёслэн но кӧтсы сюмаз?4Кызьы со Инмар корка пыриз но курбон нянез сииз, кудзэ солы но, соин ӵош луэмъёслы но, священникъёслы сяна, нокинлы но сиыны уг яра вал?5Законысь лыдӟемды ӧвӧл шат ”субботае храмын священникъёс субботаез тӥяло, но янгыш уг луо”?6Тӥледлы верасько: татын Со, Кин храмлэсь бадӟымгес.7Тодысалды ке тӥ, мар шуэм со: ”Курбонэз кулэ уг кариськы, гажан-жалянэз кулэ карисько”, соку янгыштэм муртъёсты судить ӧй карысалды.8Адями Пи субботалы но кузё луэ ук».

9Отысь кошкыса, соослэн сӥнагогаязы пыриз.10Тани, отын суйыз куасьмыса висись адями вал. Янгыше уськытон вылысь Иисуслэсь юазы: «Яра-а суббота нуналэ бурмытыны?»11Нош Со соослы шуиз: «Кин тӥ пӧлысь, одӥг гинэ ыжез луыса, суббота нуналэ со гуэ усиз ке, уз басьты, уз потты сое гуысь?12Кӧня пол адями ыжлэсь ӟечгес! Озьыен, суббота нуналэ ӟеч уж лэсьтыны яра».13Соку со адямилы шуиз: «Кидэ шонер кар». Со шонер кариз; мукетыз кадь ик со йӧн луиз.

14Нош фарисейёс потыса, кызьы ке но Сое быдтон вылысь куспазы кенеш ортчытӥзы. Нош Иисус тодэм бераз отысь кошкиз.15Со бӧрсьы трос калык мынӥз, Со ваньзэс бурмытӥз,16Ассэ шарае поттыны соосты ӧз лэзьы,17Исаия пророк пыр тазьы верам кыл мед быдэсмоз:18«Тани Мынам бырйыса басьтэм Пие, Мынам Яратонэ, Со бордын Мынам ӟеч мылкыды улэ; Со вылэ Мон Аслэсьтым Духме поно, Со калыкъёслы шонер суд сярысь ивортоз;19уз кереты, уз кеськы, ульчаосысен нокин но Солэсь куаразэ уз кылы;20шонер судлы вормон вайытозяз, чигтэм камыш бодыез уз тӥялты, гыбдась етӥнэз уз кысы;21Солэн нимызлы калыкъёс оскиськыса улозы».*a

22Соку Иисус доры синтэм, кылтэм перияськем муртэ вайизы; бурмытӥз сое. Синтэм, кылтэм мурт вераськыны но, адӟыны но кутскиз.23Вань калык паймыса шуиз: «Та Давидлэн Пиез, Христос, ӧвӧл-а?»24Фарисейёс нош тае кылыса шуизы: «Периослэн эксэйзылэн веельзевуллэн кужмыныз гинэ Со периосты улляса потта».

25Таослэсь малпанъёссэс тодыса, Иисус соослы шуиз: «Котькыӵе но эксэйлык аслыз ачиз пумит люкиськиз ке, тырттэм кылёз; котькыӵе город яке юрт аслыз ачиз пумит люкиськиз ке, быдэс уз кыльы.26Шайтан шайтанэз улляса поттэ ке, со аслыз ачиз пумит люкиськиз: кызьы меда солэн эксэйлыкез быдэс возиськыны быгатоз?

27Мон веельзевуллэн кужыменыз периосты улляса поттасько ке, тӥляд пиосты кинлэн кужыменыз улляло? Соин ик соос тӥледыз судить карисьёс луозы.28Нош Мон Инмарлэн Духеныз периосты улляса поттасько ке, соку, зэм но, Инмарлэн Эксэйлыкез тӥ доры вуиз.29Яке, кин ке но быгатоз-а кужмо муртлэн корказ пырыны но тӥрлыкъёссэ лушкаса кошкыны, нырысь ик ӧз ке думылы кужмо муртэ? Соку гинэ солэн юртысьтыз лушкаськыны быгатоз.30Кин Монэн ӧвӧл, со Мыным пумит; кин Монэн валче уг люка, со тарка.31Соин тӥледлы тае верасько: котькыӵе сьӧлык но курлан адямиослэсь куштӥськозы, нош Духез курлам адямиослэсь уз куштӥськы.32Кин Адями Пи вылэ урод кыл вераз ке, солэн сьӧлыкез куштӥськоз; нош Святой Дух вылэ урод кыл вераз ке, солэн сьӧлыкез таяз дуннеын но, вуонояз но уз куштӥськы.

33Лыдъяськоды ке лыдъялэ писпуэз ӟечен, емышсэ но ӟечен; яке, лыдъяськоды ке лыдъялэ писпуэз уродэн, емышсэ но уродэн; уго писпуэз емышезъя тодманы луэ.34Сьӧд кыйлэн вордосъёсыз! Лек луыса но, кызьы тӥ быгатӥськоды ӟечсэ вераны? Уго сюлэм пачылмыку, кыл вера.35Ӟеч адями ӟеч шыкысысьтыз ӟечсэ поттэ, нош лек адями лек шыкысысьтыз лексэ поттэ.36Тӥледлы верасько: котькыӵе но юнме шоры верам буш кылзы понна суд нуналэ адямиос кыл кутозы:37Уго аслад кылыд понна шонере потод, аслад кылыд понна ик судэ но сюрод».

38Соку книга тодӥсьёс, фарисейёс пӧлысь куд-огез шуизы: «Дышетӥсь! Милям адӟеммы потэ вал Тынэсьтыд тодмет возьматэмдэ».39Нош Со, ответ сётыса, соослы шуиз: «Кескич, азэм выжы тодмет утча, но, Иона пророклэн паймымон тодметэз сяна, солы мукет тодмет уз сётӥськы.40Кызьы Иона кит чорыглэн пушказ куинь нунал но куинь уй улӥз, озьы ик Адями Пи но музъемлэн сюлмаз куинь нунал но куинь уй улоз.41Ионалэн тодытонэз пыр ӧпкельыса сьӧлыкъёссылэсь куштӥськем Ниневия карын улӥсьёс та выжыен ӵош судэ султозы но та выжыез соос янгыше уськытозы; но тани татын Ионалэсь Быдӟымез сылэ.42Лымшорысь нылкышно эксэй та выжыен ӵош судэ султоз но та выжыез янгыше уськытоз, уго со дуннелэн пумысьтыз Соломонлэсь визьмо веранъёссэ кылзыны лыктӥз; но тани татын Соломонлэсь Быдӟымез сылэ.43Адями пушкысь пери потэ ке, со вутэм интыостӥ каньылэн улон инты утчаса ветлэ, но уг шедьты.44Соку со шуэ: ”Берытско аслам коркам, кытысь мон потӥ”. Лыктэ но адӟе: со тырттэм, ӵужемын, утялтэмын.45Соку со мынэ но ас бордаз мукетъёссэ, аслэсьтыз но лекесьёссэ сизьым периосты, басьтэ. Соос адями пушкы пыро но отын уло. Соку адямилы, нырысетӥез сярысь, берпуметӥез эшшо но уродгес луэ. Тазьы ик луоз та лек выжыен но».

46Иисус калыкен вераськыса улыку, Анаеныз братъёсыз корка пырытэк педлон сылӥзы: соослэн Соин вераськемзы потэ вал.47Кин ке но Солы шуиз: «Тани, Анаеныд братъёсыд, Тонэн вераськемзы потыса, педлон сыло».48Верась муртлы ответ сётыса, Со шуиз: «Кин Мынам анае, кин Мынам братъёсы?»49Киыныз Аслаз дышетскисьёсыз шоры возьматыса шуиз: «Тани Мынам анае но, тани Мынам братъёсы но.50Кин быдэсъя Инмысь Атаелэсь эриксэ, со луэ Мыным брат но, сузэр но, анай но».


*а 12:21 Ис. 42:1-4


предыдущая глава Глава 12 следующая глава