Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЛЭСЬ ӞЕЧ ИВОР

Глава 11

11-тӥ ЛЮКЕТ

1Аслаз дас кык дышетскисьёсызлы валэктонъёс сётэм бераз отысен Иисус соослэн городъёсазы дышетыны, тодытыны потӥз.2Иоанн пытсэтысен Христослэн ужъёсыз сярысь кылӥз но аслэсьтыз кык дышетскисьёссэ ыстӥз3Солэсь юаны: «Тон-а Со, Кудӥз лыктыны кулэ, яке милемлы мукетсэ-а витёно?»4Иисус соослы ответ сётыса шуиз: «Мар кылӥськоды, мар адӟиськоды, мынэлэ но вералэ Иоаннлы:5синтэмъёс адӟыны кутско, чутъёс ветло, гижлочерен висисьёс дунмало-чылкытало, пельтэмъёс кыло, кулэмъёс улӟо, куанеръёс Ӟеч Ивор тодыто.6Мон пумысен визь сынаськонлы сётскисьтэм мурт шудо».

7Соос кошкем бере Иисус Иоанн сярысь калыклы вераны кутскиз: «Кыр дуннее мае учкыны ветлӥды? Тӧл шорын веттаськись камыш бодыез-а?8Мае бен тӥ учкыны ветлӥды? Небыт дӥськутэн дӥсяськем адямиез-а? Небыт дӥськут нуллӥсьёс эксэйёслэн юртазы уло.9Мае бен тӥ учкыны ветлӥды? Пророкез-а? Тӥледлы верасько: бен, пророклэсь но вылӥысьсэгес.10Та со ук, кин сярысь гожтэмын:

”Тани, Мон Аслэсьтым Кылчинме Тынад азьтӥд ыстӥсько,

со Тынад азяд Тыныд сюрес дасялоз”.

11Зэм ик тӥледлы верасько: кышномуртлэсь вордӥськемъёс пӧлысь Иоанн Пылатӥсьлэсь быдӟымез ӧз на вордӥськы; нош Ин Эксэйлыкын покчиез но солэсь быдӟымгес.12Иоанн Пылатӥсь дырысен туннэ нуналозь Ин Эксэйлык кужымен басьтӥське, кужым поныса тыршисьёс киулто сое;13уго вань пророкъёс но, закон но Иоанн дырозь ик азьпалзэ тодытыса та сярысь веразы.14Кабыл басьтэмды потэ ке, Иоанн – со Илия, кудӥз лыктыны кулэ.15Кылыны пельыз вань мурт – мед кылоз!

16Кинлы укшатом та выжыез? Со укша ульчаын пукись нылпиослы, кудъёсыз эшъёссылы вазиськыса17шуо: ”Ми тӥледлы чипчирган шудӥмы, нош тӥ ӧд эктэ; ми тӥледлы ӝож гуръёс кырӟамы, нош тӥ ӧд викышъялэ”.18Иоанн лыктӥз, со уг но сиы, уг но юы, но шуо: ”Со пушкын пери”.19Адями Пи лыктӥз, Со сие но, юэ но, но шуо: ”Таиз адями сиськыны, вина юыны яратэ, Со выт бичасьёслэн, сьӧлыкоослэн эшсы”. Визьлыклэн нылпиосыз визьлыклэсь шонер луонзэ возьмато».

20Ӧпкельыса сьӧлыкъёссылэсь куштӥськымтэзы понна Иисус пыкылыны кутскиз городъёсты, кудъёсаз тужгес но трос Солэн паймымон ужъёсыз возьматэмын вал:21«Кайгу тыныд, Хоразин! Кайгу тыныд, Вифсаида! Тӥ дорын возьматэм паймымон ужъёс Тирын но Сӥдонын возьматэмын луысалзы ке, соос кемалась ини, вылазы чурыт бышкись дӥсь дӥсяса, йыр вылазы пень пызьнаса, сьӧлыкъёссы понна ӧпкельысалзы.22Но тӥледлы верасько: суд нуналэ Тирлы но Сӥдонлы, тӥледлы сярысь, капчигес луоз.23Тон но, инбамозь ӝутӥськем Капернаум, адэ куштӥськод, уго тон дорын возьматэм паймымон ужъёс Содомын возьматэмын луысалзы ке, со туннэ нуналозь но луысал на.24Но тӥледлы верасько: суд нуналэ Содом музъемлы, тыныд сярысь, капчигес луоз».

25Со дыре, веранзэ азьланьтыса, Иисус шуиз: «Данъясько Тонэ, Атае, Инлэн но, музъемлэн но Кузё-Инмарез, таосты Тон визьмоослэсь, нодоослэсь ватэмед но нуныослы усьтэмед понна.26Озьы, Атае! Сыӵе вылэм уго Тынад ӟеч эрикед.27Ваньзэ Мыным Атае сётӥз. Атай сяна Пиез нокин но уг тоды; Атаез но Пи сяна нокин но уг тоды, – кинлы Пилэн усьтэмез потэ, со Сое тодэ.28Ваньды курадӟыса, шугадӟыса улӥсьёс, лыктэлэ Мон доры, Мон тӥледыз буйгато.29Мынэсьтым зӥбетме вылады басьтэлэ, Мынэсьтым дышетске, Мон уго востэм, зӥбыт сюлэмо; соку лулдылы каньылан шедьтоды.30Мынам зӥбетэ ӟеч, ныпъетэ капчи».


*а 11:10 Мал. 3:1


предыдущая глава Глава 11 следующая глава