Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЛЭСЬ ӞЕЧ ИВОР

Глава 10

10-тӥ ЛЮКЕТ

1Аслэсьтыз дас кык дышетскисьёссэ ӧтиз но периосты вормыны, соосты улляса поттаны, котькыӵе висёнъёслэсь, лябӟонъёслэсь бурмытыны соослы кужым сётӥз.2Дас кык апостолъёсызлэн нимъёссы таӵеесь: нырысетӥез Петр шуон Симон но солэн Андрей выныз, Зеведейлэн Иаков пиез но солэн Иоанн выныз,3Филипп но Варфоломей, Фома но выт бичась Матфей, Алфейлэн Иаков пиез но Леввей, кудзэ Фаддей шуыса нимазы,4Кананит Симон но Искариот Иуда – Сое вузаса сётӥсь.

5Таосты, дас кыкназэс, Иисус ыстӥз, соослы таӵе косонъёс сётӥз: «Язычникъёс доры нуись сюрес вылтӥ эн ветлэ, самарян каре но эн пыралэ.6Тужгес но мынэлэ Израиль юртлэн бырем ыжъёсыз доры.7Мынэлэ, Ин Эксэйлык матэктӥз шуыса тодытэлэ;8висисьёсты бурмытылэ, гижлоӟемъёсты чылкытатэлэ, кулэмъёсты улӟытъялэ, периосты улляса потталэ; дунтэк басьтӥды, дунтэк сётэлэ.9Сьӧрады, кускерттонады зарни но, азвесь но, ыргон но эн басьтэ.10Сюрес вылэ пуйы но, кык дӥськут но, пыдкутчан но, боды но эн басьтэ. Уго ужась мурт сиён-юонлы ӟудыса улыны кулэ ӧвӧл.11Кыӵе гинэ городэ яке гуртэ пыриды ке, ярамон муртэ шедьтэ но кошкытозяды отын улэлэ.12Нош корка пырыкуды, ӟечкыласа тазьы шуэлэ: ”Каньыллык та коркалы”.13Та юрт ярамон ке, тӥляд каньыллыкты со вылэ лыктоз; нош ярантэм ке, тӥляд каньыллыкты тӥ доры берытскоз.14Нош кин тӥледыз ӧз ке пырты, ӧз ке кылзӥськы верам кылдэс, соку, та коркась яке та городысь потыкуды, пыдысьтыды сюйзэ курткыса кельтэ.15Зэм ик тӥледлы верасько: суд нуналэ со городлы, Содомен Гоморра музъемлы сярысь, секытгес луоз.

16Тани Мон тӥледыз, кызьы кионъёс пӧлы ыжъёсты ысто, озьы ыстӥсько: соин ик кый кадь амалоесь, дыдык кадь лякытэсь луэлэ.17Адямиослэсь утиське: соос тӥледыз судэ сётылозы, сӥнагогаосазы жугылозы.18Мон понна тӥледыз кивалтӥсьёс, эксэйёс доры нуозы, соос азьын, язычникъёс азьын тӥ Мон сярысь тодытоды.19Нош тӥледыз кутыса сётылыкузы, эн сюлмаське, кызьы яке мар вералом шуыса, – уго тӥледлы сётӥськоз со дыре мар вераны.20Соку тӥ уд вералэ, тӥ пушкысь Атайдылэн Духез вералоз.21Братэз братсэ кутыса виыны сётоз, атаез – пизэ; нылпиос анай-атайёссылы пумит султозы но соосты виёзы,22Мынам нимы понна ваньмыз тӥледыз адӟемпотостэм карозы; нош пумозяз чидам мурт – утиськоз.23Одӥгысьтыз городысь тӥледыз уллязы ке, мукетаз бызе. Зэм ик тӥледлы верасько: Израиль музъемлэсь городъёссэ ортчыса уд вуэ, кызьы Адями Пи лыктыса вуоз.

24Дышетскись дышетӥсезлэсь вылынгес ӧвӧл, ляльчи но кузёезлэсь вылынгес ӧвӧл.25Дышетскисьлы тырмоз дышетӥсез кадь луиз ке, ляльчилы но кузёез кадь луиз ке. Коркалэсь кузёзэ веельзевул шуизы ке, уката ик солэн корказ улӥсьёссэ но тазьы уз-а шуэ?26Озьыен, эн кышкалэ соослэсь: уго нокыӵе но ватӥськемлэн усьтӥськытэк кылемез уг луы, лушкемлыклэн но шарае потытэк кылемез уг луы.27Мае тӥледлы пеймыт азьын верасько, вералэ югыт азьын; пельыныды кылэмдэс липетъёс вылысен тодытэ.28Эн кышкалэ мугорез виисьёслэсь, кудъёсыз лулэз виыны уг быгато; нош ваньмызлэсь но юн кышкалэ Солэсь, Кин быгатэ лулдэс но, мугордэс но кысылӥсьтэм тыл пӧлын быдтыны.29Кык пичи тылобурдоос уг-а вузасько одӥг ассариен? Атайдылэн эрикезтэк соос пӧлысь одӥгез но музъем вылэ уз усьы;30нош тӥляд йырысьтыды йырсиосты но ваньмыз лыдъямын.31Эн кышкалэ ук: тӥ тросэзлэсь векчи тылобурдоослэсь умоесьгес.32Озьы, Монэ тодэмзэ калык азьын ватытэк верась котькудзэ адямиез Мон но Инмысь Атае азьын тодэмме ватытэк верало.33Нош кин калык азьын Мынэсьтым куштӥськиз ке, солэсь Мон но Инмысь Атае азьын куштӥсько.

34Эн малпалэ, музъем вылэ тупаса улон вайыны Мон лыктӥ шуыса; тупаса улон вайыны ӧй лыкты, палаш вайыса лыктӥ,35Мон лыктӥ уго адямиез атаезлэсь, нылзэ анаезлэсь, кензэ анайзылэсь люкыны.36Адямилэн тушмонъёсыз – семья пушказ.

37Кин атайзэ яке анайзэ, Монэ сярысь, тросгес яратэ, со Мыным ярамон ӧвӧл; кин пизэ яке нылзэ, Монэ сярысь, тросгес яратэ, со Мыным ярамон ӧвӧл;38кироссэ басьтыса, Мон сьӧры мынӥсьтэм мурт Мыным ярамон ӧвӧл.39Лулзэ утем мурт сое ыштоз; нош Мон понна лулзэ ыштэм мурт сое утёз.

40Кин тӥледыз кабыл басьтэ, со Монэ кабыл басьтэ, нош кин Монэ кабыл басьтэ, со Монэ Ыстӥсез кабыл басьтэ;41кин пророкез пророклэн нимыз понна кабыл басьтэ, со пророклэсь медзэ-кузьымзэ басьтоз; кин шонер улӥсез шонер улӥсьлэн нимыз понна кабыл басьтэ, со шонер улӥсьлэсь медзэ басьтоз.42Та покчиос пӧлысь одӥгзэс дышетскисьлэн нимыз понна сюмык кезьыт вуэн гинэ сектаз ке, зэм ик тӥледлы верасько, аслэсьтыз медзэ-кузьымзэ со уз ышты».


*а 10:29 ассарий – Рим кунысь векчи ыргон уксё

*б 10:40 кабыл басьтыны – ӟеч мылкыдын (шумпотыса) сюлме-визьме пыртыны (принять карыны)


предыдущая глава Глава 10 следующая глава