Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЛЭСЬ ӞЕЧ ИВОР

Глава 9

9-тӥ ЛЮКЕТ

1Соку Иисус пыже пыриз но мукет пал ярдуре выжиз, Аслаз городаз вуиз.2Валес вылэ поныса, Со доры пери шуккем муртэ вайизы. Осконзэс адӟыса, Иисус пери шуккем муртлы шуиз: «Сэзь лу! Тынад сьӧлыкъёсыд куштӥсько».

3Соку книга тодӥсьёс пӧлысь куд-огез асьсэ понназы веразы: «Со Инмарез сантэма».4Соослэсь малпанзэс тодыса, Иисус шуиз: «Малы тӥ сюлмады урод малпанэн улӥськоды?5Мае вераны капчигес: ”Тынад сьӧлыкъёсыд куштӥсько”, яке ”Султы но ветлы”?6Тӥ мед тододы: Адями Пилэн музъем вылын сьӧлыкъёсты куштыны кужымез-властез вань», – соку Со пери шуккем муртлы шуиз: «Султы, басьты валестэ но гуртад берт».7Со султыса валессэ басьтӥз но аслаз дораз кошкиз.8Калык тае адӟыса паймиз но, адямиослы таӵе кужым сётэмез понна, Инмарез данъяны кутскиз.

9Иисус, отысь кошкыкуз, выт бичан дорын пукись Матфей нимо адямиез адӟиз но солы шуиз: «Мон сьӧры мын». Со султыса Со сьӧры мынӥз.10Иисус коркан сиськыса улыку, трос выт бичасьёс, сьӧлыкоос лыктӥзы но Соин, Солэн дышетскисьёсыныз огазьын сиськизы.11Фарисейёс, тае адӟыса, Солэн дышетскисьёсызлы шуизы: «Малы тӥляд Дышетӥсьты выт бичасьёсын, сьӧлыкоосын огазьын сие-юэ?»12Тае кылыса, Иисус соослы шуиз: «Висисьтэмъёслы эмъясь кулэ ӧвӧл, висисьёслы кулэ.13Мынэлэ, дышетскелэ, мар шуэм со: ”Курбонэз кулэ уг кариськы, гажан-жалянэз кулэ карисько”? Уго Мон шонер улӥсьёсты ӧтьыны ӧй лыкты, сьӧлыкоосты ӧпкельыса сьӧлыкъёссылэсь куштӥськонэ ӧтьыны лыктӥ».

14Соку Со доры Иоаннлэн дышетскисьёсыз лыктыса шуизы: «Малы ми но, фарисейёс но трос визяськомы, нош Тынад дышетскисьёсыд визез уг утё?»15Соослы Иисус шуиз: «Эмеспи соос пӧлын улон дыръя мӧзмыса улозы-а сюанчиос? Но вуозы нуналъёс, – соос дорысь эмеспи басьтӥськоз, соку соос визялозы но.16Нокин но пӧсьтэм дӥськутэз гужатымтэ дэраен уг кышъя, малы ке шуоно выль кышъет вужез бордысь ӟезиськоз, соку пасез уката но уродгес луоз.17Выль винаез но вужмем сепысъёсы уг лэзё; уго сепысъёс соку кесисько но, вина кисьтӥське, сепысъёс но арам луо. Выль винаез выль сепысъёсы лэзё, соку соиз но, таиз но быдэс кылё».

18Тае соослы вераса улыкуз, Иисус доры кыӵе ке но кузёйыр лыктӥз но йыбырттыса шуиз: «Мынам нылы кулӥське ни. Лыктыса со вылэ Аслэсьтыд кидэ понӥд ке, со улэп кылёз».19Иисус султӥз но дышетскисьёсыныз ӵош со сьӧры мынӥз.

20Соку, бертӥз лыктыса, дас кык ар ӵоже вир виянэн курадӟыса улӥсь кышномурт Солэн дӥсянэзлэн сӧзы бордаз йӧтӥськиз.21Со аслыз ачиз шуэ вылэм уго: «Солэн дӥськут бордаз гинэ йӧтӥськи ке, бурмо».22Иисус берыктӥськыса учкиз но, сое адӟыса, шуиз: «Сэзь лу, нылмурт! Тынад осконэд тонэ утиз». Со часысен кышномурт йӧназ.

23Кузёйырлэн юртаз пырем бере Иисус чипчирган шудӥсьёсты, куалектыса улӥсь калыкез адӟиз но24соослы шуиз: «Потэлэ татысь; нылмурт кулэмын ӧвӧл, со изе». Сое серем каризы.25Калыкез поттэм бере, корка пырыса, нылмуртэз китӥз кутӥз но, – нылмурт султӥз.26Та сярысь ивор быдэс шаеразы вӧлмиз.

27Иисус отысь кошкыку, Со бӧрсьы кык синтэм адямиос тазьы кесяськыса мынӥзы: «Давидлэн Пиез Иисус, жаля милемыз!»28Корка пырем бераз синтэмъёс Со доры лыктӥзы. Иисус соослы шуиз: «Оскиськоды-а, Мон тае лэсьтыны быгатӥсько шуыса». Солы соос шуизы: «Бен, Кузёмы!»29Соку соослэн син бордазы Со йӧтӥськиз но шуиз: «Оскондыя тӥледлы мед луоз».30Соослэн синъёссы усьтӥськизы. Иисус юн алыса шуиз: «Учкелэ, нокин но медаз тоды».31Нош соос потӥзы но быдэс шаертӥзы Со сярысь шара вераса ветлӥзы.

32Соос потыку, Иисус доры перияськем кылтэм муртэ вайизы.33Периез улляса поттэм бере кылтэм мурт вераськыны кутскиз. Калык паймыса вераськиз: «Ноку но таӵе ужъёс Израильын ӧй на вал».34Нош фарисейёс периосты Со периослэн эксэйзылэн кужмыныз улляса потта шуыса вераськизы.

35Вань каръёстӥ, гуртъёстӥ, отысь сӥнагогаосазы дышетыса ветлӥз. Эксэйлыклэсь Евангелизэ тодытыса, пӧртэм висёнъёслэсь, лябӟонъёслэсь адямиосты бурмытъяса, Со ветлӥз.36Иисус люкаськем калыклэсь возьмаськисьтэк кылем ыжъёс кадь катьтэммемзэ, пазьгиськемзэ адӟыса жаляз соосты.37Соку Со Аслаз дышетскисьёсызлы шуиз: «Аран трос, нош ужасьёс ӧжыт.38Соин ик аранлэн Кузёезлэсь вӧсяськыса куре, Аслаз аран дораз ужасьёсты мед ыстоз шуыса».


предыдущая глава Глава 9 следующая глава