Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЛЭСЬ ӞЕЧ ИВОР

Глава 8

8-тӥ ЛЮКЕТ

1Иисус гурезьысь васькем бере Со бӧрсьы трос калык мынӥз.2Соку дораз гижлочерен висись мурт лыктӥз но Солы йыбырттыса шуиз: «Кузё-Инмаре! Чылкытатэмед потӥз ке, Тынад монэ чылкытатэмед луоз».3Иисус, кизэ ӝутыса, со борды йӧтӥськиз но солы шуиз: «Мынам чылкытатэме потэ, чылкыта». Со соку ик чылкытаз, гижлочерез быриз.4Иисус солы шуиз: «Уть, нокинлы но эн вера; священник доры мыныса, солы возьматӥськы, Моисейлэсь косэм курбонзэ сёт, та адямиослы тодытон понна со мед луоз».

5Иисус Капернауме пырем бере Со доры сю солдатэн кивалтӥсь лыктыса, Солэсь куриз:6«Кузёе! Ляльчие, пери шуккыса, дорам кылле, туж курадӟе».

7Иисус солы шуиз: «Мон лыктыса бурмыто сое».8Сю солдатэн кивалтӥсь ответ сётыса шуиз: «Кузёе! Тон мынам коркам пырон понна мон ярамон адями ӧвӧл; кыл гинэ вера но, мынам ляльчие бурмоз.9Мон уго ачим но мурт киулын ужась адями. Но мынам киулам солдатъёс вань, огезлы шуисько: ”Мын”, – со мынэ; мукетызлы: ”Лыкты”, – со лыктэ; ляльчиелы шуисько: ”Лэсьты сое”, – со лэсьтэ».

10Тае кылыса, Иисус паймиз но сьӧраз лыктӥсьёслы шуиз: «Зэм ик тӥледлы верасько: Израильысь но таӵе осконэз Мон ӧй шедьты.11Тӥледлы Мон верасько: тросэз шундыӝужанысь, шундыпуксёнысь лыктозы но Авраамен, Исаакен но Иаковен ӵош Ин Эксэйлыке интыяськозы,12нош эксэйлыклэн нылпиосыз педло, пеймыт азе сэрпалтэмын луозы: отын бӧрдон, пинь сыскон луоз».13Иисус сю солдатэн кивалтӥсьлы шуиз: «Мын, оскемедъя тыныд мед луоз». Соку ик солэн ляльчиез бурмиз.

14Иисус, Петрлэн корказ лыктыса, солэсь пӧськылен висись вармумизэ адӟиз.15Ки бордаз йӧтӥськиз но, пӧськылез быриз; кышномурт султӥз но соослы юрттӥськыса улыны кутскиз.

16Ӝыт вуэм бере Иисус доры трос перияськем адямиосты вайизы; периоссэс, кылын улляса, Со поттаз, вань висисьёсты бурмытӥз.17Исаия пророк пыр тазьы верам кыл: «Со милесьтым ляблыкъёсмес Ас вылаз басьтӥз, висёнъёсмес Ас вылаз нуиз» – мед быдэсмоз.

18Ас котырысьтыз трос калыкез адӟем бераз Иисус (дышетскисьёссэ) мукет пал ярдуре выжыны косӥз.19Соку одӥгез книга тодӥсь Со доры лыктыса шуиз: «Дышетӥсь! Кытчы гинэ Тон уд мыны, мон Тон сьӧры мыно».20Иисус солы шуиз: «Ӟичыослэн гутёзы вань, инмысь тылобурдоослэн – карзы, нош Адями Пилэн йырзэ понон интыез но ӧвӧл».21Солэн дышетскисьёсыз пӧлысь ик одӥгез Солы шуиз: «Кузё-Инмаре! Нырысь лэзь вал монэ аслэсьтым атайме ватыны мыныны».22Нош Иисус солы шуиз: «Мын Мон сьӧры, кулэмъёс асьсэлэсь кулэмъёссэс мед ватозы».

23Иисус пыже пырем бере Солэн бӧрсяз дышетскисьёсыз мынӥзы.24Тани, зарезь вылын кужмо сильтӧл ӝутскиз, тулкымъёс пыжез шобыртыны кутскизы; нош Со кӧлӥз.25Соку Солэн дышетскисьёсыз, матаз мыныса, Сое сайкатӥзы но шуизы: «Кузё-Инмармы! Уть милемыз: быриськомы».26Соослы Иисус шуиз: «Малы тӥ сокем кышкасесь, ӧжыт оскисьёс?» Собере султыса тӧлъёсыз но, зарезез но дугдытӥз, туж чалмыт луиз.27Адямиос нош паймыса вераськизы: «Кин Та, тӧлъёс но, зарезь но Солэсь кылзӥсько?»

28Мукет пал ярдуре, Гергесин шуон шаере, вуэм бераз, Сое шайгу пещераысь потэм кык перияськем адямиос пумитазы. Соос туж лекесь вал, соин ик нокин но со сюрес кузя ветлыны ӧз дӥсьты.29Соку соос черекъяны кутскизы: «Ми бордын Тынад мар ужед, Инмарлэн Пиез Иисус? Дырызлэсь вазь Тон татчы милемыз курадӟытыны лыктӥд».30Соослэн палэназыгес бадӟым парсь уллёез возьмало вал.31Периос Солэсь куризы: «Улляса поттӥд ке, милемыз парсь уллё пӧлы ысты».32Иисус соослы шуиз: «Мынэлэ». Потыса соос парсь уллё пӧлы мынӥзы. Соку быдэс парсь уллё меӵ ярысен зарезе тэтчаз но вуэ выйыса быриз.33Парсь возьмасьёс бызьыса кошкизы но, городэ вуыса, ваньмыз сярысь, перияськем адямиосын мар луэмез но веразы.34Соку быдэс городысь калык Иисуслэн пумитаз потӥз. Иисусэз адӟемзы бере соослэн улон ёросысьтызы Со мед кошкоз шуыса, Сое куризы.


предыдущая глава Глава 8 следующая глава